(အဲဒီနေ့ စာပေဟောပြောပွဲမှာ ဗိုလ်စွဲသွားသူကတော့ ဆရာနွမ်ဂျာသိုင်းဖြစ်ပါတယ်။ နှစ်နာရီခန့်ကို လုံးဝမနားဘဲ ပြောသွားနိုင်သလို အောက်မှာရှိနေတဲ့ ကျွန်တော်တို့ပရိသတ်တွေလည်း လုံးဝကို မနားဘဲ ၀ါးလုံးကွဲ ရယ်လိုက်ရပါတယ်။ စင်ပေါ်ကိုတက်လာတော့ ရုပ်တည်ကြီးနဲ့ အတည်အခန့်တွေ ပြောတော့မယ် အောက်မေ့နေတာ ဘယ်ဟုတ်လို့လဲ စကားပြောကလည်း ကောင်းပါပေ့၊ သူပြောချင်တဲ့ အကြောင်းအရာကို ပရိသတ်တွေ ပါလာအောင်၊ စိတ်ဝင်စားအောင် လုပ်သွားတာလည်း ကောင်းပါပေ့ဗျာ။ ဆရာနွမ်ဂျာသိုင်းရဲ့ ဟောပြောမှုကနေ ကျွန်တော်အများကြီး ရလိုက်ပါတယ်။ နားထောင်နေတဲ့ တစ်ဖက်လူကို အတုံးလိုက် အတစ်လိုက်မဟုတ်ဘဲ ရယ်စရာလေးတွေနဲ့ နားဝင်အောင် ထည့်ပေးသွားနိုင်တာ ဆရာ့ရဲ့ အရည်အချင်းပါ။ အပေါ်ယံပဲ ကြည့်မယ်ဆိုရင်တော့ နှစ်နာရီလုံး ဟာသတွေ ပြောသွားခဲ့တာပါ။ ဒါပေမယ့် အဲဒီဟာသတိုင်းမှာ တွေးစရာတွေ၊ မှတ်စရာတွေ ပါနေခဲ့တယ်ဆိုတာ ကျွန်တော်ကောင်းကောင်း သိခဲ့ပါတယ်။ ဘာပဲဖြစ်ဖြစ် အများနဲ့ စကားပြောတဲ့နေရာမှာ စိတ်ဝင်စားအောင် ဘယ်လိုပြောရမယ်ဆိုတာကို ကျွန်တော်နားလည်လိုက်သလိုပါပဲ။ နှစ်နာရီလောက်ပြောအပြီး ည ၁၂ နာရီထိုးနေပြီဖြစ်တဲ့အတွက် နိဂုံးချုပ်လိုက်တဲ့အချိန်မှာ အတော်ကို စိတ်ညစ်သွားပါတယ်။ ဖြစ်နိုင်ရင် ဆက်ပြီး နားထောင်ချင်သေးတာပါ။ ဆရာနွမ်ဂျာမှာလည်း ပြောစရာတွေက ကုန်ဦးမယ် မထင်ပါဘူး။ အတွေ့အကြုံလည်းများ၊ တွေ့ကြုံရသမျှကို ပြန်ပြောတာကလည်း စိတ်ဝင်စားဖို့ကောင်းဆိုတော့ ကျွန်တော့်မှာ နားထောင်ရတာ လုံးဝကို မတင်းတိမ်နိုင်ပါဘူး)
ဟောပြောသူ - နွမ်ဂျာသိုင်း
ခေါင်းစဉ် - စာရေးသူမှ စာဖတ်သူသို့
ကျွန်တော်က ငယ်ငယ်လေးကတည်းက ဈေးကွက်စီးပွားရေးစနစ်ကို ကျင့်သုံးခဲ့တာခင်ဗျ။ အခုခေတ် ဈေးကွက်စီးပွာရေးစနစ်ဆိုတာ ကျွန်တော့်ထက် အများကြီးနောက်ကျတယ်။ ဆရာချစ်နိုင် ပြောသွားသလို ရူးပါဆိုလို့ ငယ်ငယ်တုန်းက အရူးကောင်းခဲ့တာ စာတွေဖတ်ပြီး ရည်စားစာရေးဖို့ အသက်မပြည့်သေးတဲ့ အရွယ်မှာပဲ သူများတွေကို အခကြေးငွေယူပြီး ရည်းစားစာ ရေးပေးနေရပြီ။
(ပရိသတ်ရယ်သံများ)
တကယ့်အနုအဖတ်၊ အချစ်စာတွေ၊ ကဗျာတွေဖတ်ပြီးရင် ကျွန်တော်က စာအုပ်ထဲမှာ ကူုးထားတတ်တယ်။ အဲဒီတုန်းက မောင်ပန်းမွှေးကဗျာတို့ ဘာတို့ဆိုတာ နာမည်ကြီးပေါ့။ ကျွန်တော့်စာအုပ်ထဲမှာ စာသားနုနုရွရွလေးတွေ၊ အချစ်ကဗျာတွေ အများကြီးမှ တကယ့်အများကြီးပဲ၊ အဲလိုမှတ်ထားတာ။
ကိုးတန်း၊ ဆယ်တန်းက ကျောင်းသားကြီးတွေက သိလည်းမသိ၊ ရင်းလည်းမရင်းနှီးဘဲ အကြောင်းမဲ့သက်သက် ကျွန်တော့်ကို မုန့်တွေ ၀ယ်ကျွေးကြတယ်။ ကျွန်တော်လည်း ဘာမှန်းမသိ၊ ညာမှန်းမသိဘဲ မုန့်စားရနည်းလားဆိုပြီး စားတာပေါ့။ နောက်ကျတော့မှ ဘယ်ဟုတ်လို့လည်း သူတို့အတွက် ရည်းစားစာ ရေးပေးခိုင်းတာကိုး။ ကိုယ်တိုင်က ရည်းစားစာရေးဖို့ အသက်တောင် မပြည့်သေးဘူး၊ ဒါပေမယ့် အဲဒီအချိန်ကတည်းက သူများကို ရည်းစားစာ ရေးပေးနေရပြီ။ အစကတော့ အားလုံးကို အခမဲ့ပါပဲ။ အဲဒီလောက် စီးပွားရေး မသောင်းကျန်းသေးပါဘူး။ (ပရိသတ်ရယ်သံများ)
ကျွန်တော်ရေးပေးလိုက်တာတွေက အတော်လေးအောင်မြင်တယ်လို့ ပြန်ပြန်ကြားရတယ်။ ကျွန်တော်လည်း အတော်ကိုမြောက်တာပေါ့။ ငါရေးပေးလိုက်တဲ့ ရည်းစားစာတွေကြောင့် ရည်စားတွေဖြစ်ကုန်ကြပြီဆိုတဲ့ ပီတိက ဘာနဲ့မှ မတူဘူးဗျ။
တစ်ရက်တော့ ကျွန်တော့်တို့အိမ်ကို နယ်ကအစ်မ၀မ်းကွဲတွေ ရောက်လာတယ်။ တစ်လလောက်ကြာမယ်ပေါ့။ ပြောလို့ပြောတာမဟုတ်ဘူး ကျွန်တော်အစ်မတွေက ကျွန်တော့်လိုပဲ အတော်ချောချောလှလှတွေဗျ။ (ပရိသတ် ရယ်သံများ) တစ်ပတ်လောက်ကြာတော့ အိမ်မျက်စောင်းထိုးက အစ်ကိုကြီးနဲ့ ကျွန်တော့်အစ်မတစ်ယောက် ရည်းစားဖြစ်နေကြသတဲ့။ ဟင်... ရောက်တာမှ တစ်ပတ်ပဲ ရှိသေးတယ်။ ဘယ်လိုဖြစ်ကြတာလဲပေါ့။ (ပရိသတ်ရယ်သံများ) ဒါနဲ့ အစ်မကို မေးကြည့်တယ်၊ အစ်မရယ် ဘယ်လိုဖြစ်ပြီး တစ်ပတ်လောက်အတွင်းမှာ ကြိုက်သွားရတာလဲလို့။ အဲဒီတော့ အစ်မက ဘာပြန်ပြောလဲဆိုတော့ ငါလည်း အစက မကြိုက်ပါဘူးဟယ်... ဒါပေမယ့် သူပေးတဲ့ ရည်းစားစာလေးက လွမ်းစရာကောင်းတော့ ပြန်ကြိုက်လိုက်တာတဲ့။ ကျွန်တော်ထိတ်ခနဲ ဖြစ်သွားတယ်။ (ပရိသတ်ရယ်သံများ) အဲဒီလူပုံစံကြည့်ရတာ အဲဒီလိုတွေလည်း ရေးတတ်မယ့်ပုံ မပေါ်ပါဘူး။ ဒါနဲ့ ကျွန်တော်လည်း အစ်မရဲ့ ရည်းစားစာကို ပြစမ်းပါဦးဆိုပြီး တောင်းကြည့်ရတယ်။ ပရိသတ်များထင်ထားသလိုပါပဲ ကျွန်တော် အဲဒီအစ်ကိုကြီးရဲ့ သူငယ်ချင်းတစ်ယောက်ကို ရေးပေးဖူးတဲ့ ရည်းစားစာဖြစ်နေတယ်ခင်ဗျ။ (ပရိသတ် ရယ်သံများ) ကျွန်တော့်ရည်းစားစာတွေက အဲဒီလောက်အထိ အောင်မြင်တယ်။ အစတုန်းက ညီလေးတို့ဘာတို့လုပ်နေတဲ့လူက အခုတော့ ကျွန်တော့်ကို ယောက်ဖတဲ့။ (ပရိသတ်ရယ်သံများ) အဲဒီကစပြီး ကျွန်တော်လည်း ရည်းစားစာရေးရင် အရင်လို အခမဲ့မရတော့ဘူး။ ကြမ်းခင်းဈေးသတ်မှတ်ပြီး ပိုက်ဆံယူပြီး ရေးရတော့တာပေါ့။ အနည်းဆုံးကြမ်းခင်းဈေးက နှစ်ကျပ်ပဲ။ အဲဒီတုန်းက မုန့်ဟင်းခါးတစ်ပွဲကို ပြားသုံးဆယ်ပဲ ပေးရတဲ့ခေတ်။ အဲဒီလောက်အထိ စီးပွားဖြစ်ခဲ့တာ။
ရည်းစားစာကို ပိုက်ဆံယူတယ်ဆိုတာလည်း အဆင့်တွေတော့ ရှိသေးတယ်ဗျ။ မေးလိုက်လို့ "ကိုယ် အဲဒီကောင်မလေး အိမ်ရှေ့ကို နှစ်ရက် သုံးရက် သွားကြည့်ပြီးပြီ၊ ကိုယ့်ကိုတွေ့ရင် ပြုံးပြတယ်ကွ" ဆိုတဲ့လူဆိုရင် နှစ်ကျပ်ပေါ့။ အဲ "ကိုယ် သူတို့အိမ်ရှေ့ကိုသွားတာ တစ်ပတ်လောက်ရှိပြီ ညီလေးရာ၊ ကိုယ့်ကို ဘာမှလည်း ပြုံးမပြ၊ ဘာမှလည်း မထူးခြားဘူး" ဆိုတဲ့လူကျရင် ဈေးကိုင်ရတာပေါ့။ "ဟာ.. အစ်ကိုကြီး၊ လွယ်တော့မလွယ်ဘူး၊ ကျွန်တော် နည်းနည်းအကွက်ဆင်မှရမယ်၊ ကျွန်တော့်ပညာတွေအကုန် ထုတ်သုံးရနိုင်တယ်၊ အဲဒီတော့ အရင်ဈေးနဲ့တော့ မရဘူး၊ နည်းနည်းတော့ ဈေးကြီးမယ်အစ်ကိုကြီးပေါ့"။ (ပရိသတ်ရယ်သံများ) ဟိုလူကလည်း စိတ်က ငယ်ထိပ်ရောက်နေတာကိုး။ ရပါတယ်ညီလေးရာ၊ ဘယ်လောက်ပေးရမလဲပေါ့။ ကျွန်တော်က အဲဒီလိုလူဆိုရင်တော့ ငါးကျပ် ယူပါတယ်။ "လမ်းမှာကိုယ့်ကိုတွေ့တာနဲ့ မျက်နှာလွှဲသွား၊ တံတွေးထွေးသွား၊ ခြေဆောင့်သွားတယ်ကွာ" ဆိုတဲ့လူတွေကိုတော့ ကျွန်တော် ခုနစ်ကျပ် ယူပါတယ်။ (ပရိသတ်ရယ်သံများ)
တစ်ခုကြိုပြောပါရစေ။ ကျွန်တော်အခုပြောမယ့်ဟာက ဒီမြို့ကလူတွေနဲ့ လုံးဝမဆိုင်ပါဘူးနော်။ ကျွန်တော်ဒီမြို့မှာလည်း ရည်းစားစာ ရေးမပေးဖူးပါဘူး။ (ပရိသတ်ရယ်သံများ) ရည်းစားစာရေးတဲ့နေရာမှာ ကျွန်တော် ဈေးအကြီးဆုံးယူတာကတော့ အပျိုကြီးတွေကို ပေးတဲ့ရည်းစားစာပါ။ တစ်ဆယ်မှ မရရင် ကျွန်တော် လုံးဝမရေးပါဘူး။ (ပရိသတ်များ မရပ်မနားရယ်ကြသည်။ အကြာကြီး ရယ်ကြသည်။ ဆရာနွမ်ဂျာ ရေသောက်ရင်းစောင့်ရသည်)
နောက်ထပ်တစ်ဆင့် ရှယ်ဈေးနဲ့ရေးတဲ့ ရည်းစားစာ ရှိပါသေးတယ်။ (ရယ်သံများ) ရည်းစားစာပေးမယ့်လူဟာ အပျိုကြီးလည်းဖြစ်တယ်၊ ကျောင်းဆရာမလည်း ဖြစ်တယ်ဆိုရင်တော့ တစ်ဆယ့်ငါးကျပ်မှမရရင် ကျွန်တော်လုံးဝကို မရေးပါဘူး။ (ပိုဆိုးသွားသည်၊ ပရိသတ်များ ခွက်ထိုးခွက်လန် ရယ်ကြသည်)
ကျွန်တော်စာရေးသက် နှစ် ၃၀ ကျော်ပါပြီ။ စာပေဟောပြောပွဲ လိုက်တာတင်ကို ၂၈ နှစ်ကျော် ရှိပြီဖြစ်ပါတယ်။ အခုလိုမျိုး ပရိသတ်တွေနဲ့ တွေ့ရင် ကျွန်တော်ပျော်ပါတယ်။ ကိုယ့်ဘာသာကိုယ် အခန်းထဲမှာ တစ်ယောက်တည်း စာရေးရတဲ့အခါ ဖိစီးမှု အရမ်းများပါတယ်။ အခုလို ဟောပြောပွဲတွေ လိုက်တဲ့အခါ စိတ်အပြောင်းအလဲဖြစ်သလို ပရိသတ်တွေ ကျွေးမွေးတဲ့ဟာတွေကိုစား၊ ပေးတဲ့ဟာတွေကိုယူရတာ အရမ်းကို ပျော်စရာကောင်းပါတယ်။ (ရယ်သံများ) ပြီးတော့ ဆုံးဖြတ်ထားပါတယ်။ ရောက်တဲ့အရပ်က ကျွေးသမျှကို သမိုင်းပေးတာဝန်လို့ ခံယူပြီး အကုန်စားပါ့မယ်။ (ရယ်သံများ) ပေးသမျှကိုလည်း တစ်ခုမှမငြင်းဘဲယူဖို့ အိမ်ကမထွက်ခင်ကတည်းက ဆုံးဖြတ်ထားပါတယ်။ (ရယ်သံများ)
နောက်ထပ် ဟောပြောပွဲတွေကို ကျွန်တော်အမြဲတမ်းလိုက်ဖြစ်တဲ့ အကြောင်းတစ်ချက် ရှိပါသေးတယ်။ ဒီလိုပါ။ ကျွန်တော် စာအုပ် သုံးအုပ်လောက် ထွက်ပြီးတဲ့အချိန်မှာ တစ်ခုသိလိုက်ပါတယ်။ ငါတော့ ကလောင်နာမည်ရွေးတာ မှားသွားပြီဆိုတာပါပဲ။ ဘာကြောင့်လဲဆိုတော့ စာအုပ်သုံးအုပ်လောက် ထွက်ပြီးတဲ့အချိန်မှာ ကျွန်တော့်ဆီကို မိတ်ဆက်စာတွေ လာကြတယ်။ ကျွန်တော်လည်း ပျော်တာပေါ့။ ၀မ်းသာအားရဖတ်တာပေါ့။ အဲဒီမှာ ကျွန်တော့်ကလောင်နာမည်နဲ့ ပတ်သက်ပြီး ကချင်လားလို့ မေးတယ်၊ ရှမ်းလားလို့ မေးတယ်၊ တိုင်းရင်းသားလားလို့ မေးကြတယ်။ တချို့က ဘယ်လိုစိတ်ကူးနဲ့ မေးကြတယ်မသိပါဘူး။ ဆရာ့နာမည်က နွမ်ဂျာသိုင်းဆိုတော့ မူစလင်လားတဲ့။ (ရယ်သံများ) အဲဒီအထိ ကျွန်တော်ခံနိုင်ပါတယ်။ တစ်ခုပဲ... ကျွန်တော့်ကို မိန်းမစာရေးဆရာမ ထင်နေကြတာကိုတော့ ကျွန်တော်လုံးဝကို ခံစားလို့မရပါဘူး။(ပရိသတ်များ အားပါးတရရယ်ကြသည်) ဘယ်လိုကြီးမှန်းကို မသိပါဘူးဗျာ။
မိတ်ဆက်စာတွေရေးတဲ့နေရာမှာ ကျွန်တော့်ဆီကို ရေးတဲ့လူက နှစ်မျိုးနှစ်စားပဲ ရှိတယ်။ ပထမတစ်မျိုးက မြီးကောင်ပေါက်တွေပါ။ ကောင်မလေးတွေမဟုတ်ပါဘူး။ ကောင်ကလေးတွေပါ။ (ရယ်သံများ ဆူညံသွားသည်) သူတို့ရေးသမျှကလည်း အစချီတာက တစ်ပုံစံတည်း ဖြစ်တတ်ပါတယ်။
"ချစ်မမ နွမ်" တဲ့။
(ပရိသတ်များ ထိန်းမရသိမ်းမရ ရယ်ကြသည်)
နောက်တစ်မျိုးကတော့ အဲဒီအချိန်က ရှေ့တန်းရောက် တပ်မတော်သားတွေ ဖြစ်ကြပါတယ်။ ကျွန်တော့်ဆီကို ရှေ့တန်းကနေ တကူးတက စာရေးကြတယ်၊ ကျွန်တော့်စာအုပ်တွေ ဖတ်ကြတယ်ဆိုတော့ ကျွန်တော်လည်း ပျော်တာပေါ့နော်။ ၀မ်းသာအားရ ဖတ်တာပေါ့။ သူတို့အားလုံး ရေးထားတဲ့စာတွေမှာ အစချီပုံတွေကလည်း ဆင်တူရိုးမှားတွေပါပဲ။ အများစု ရေးလေ့ရှိကြတာက-
"ချစ်ညီမလေး နွမ်" တဲ့။
(ပရိသတ်များ ပတ်တုပ်မရအောင် ရယ်ကြသည်)
ပိုဆိုးတာက စာထဲမှာရေးထားတာတွေပါ။ "ညီမလေးရဲ့စာအုပ်ထဲမှာ ရေးထားတဲ့ စာလုံးလေးတွေကိုဖတ်ပြီး ညီမလေးရဲ့ မျက်နှာလှလှလေးကို မြင်ယောင်လာမိတယ်" (ရယ်သံများ) အဲဒီအထိ ထားပါတော့ဗျာ။ "ညီမလေးရဲ့ လှပကျော့ရှင်းတဲ့ ခန္ဓာကိုယ်လေးကို မျက်စိထဲမှာ မြင်လာတယ်" (ကျယ်လောင်သော ရယ်သံများ) ဘယ်နှယ့်ဗျာ... စာလုံးတွေကိုဖတ်တာနဲ့ ကျွန်တော့်ရဲ့ ခန္ဓာကိုယ်ကို မြင်လာတယ်ဆိုတော့ အတော်ကြောက်စရာကောင်းတဲ့ လူတွေပါလားနော်။ ဖတ်နေရင်းနဲ့ ကျွန်တော့်မှာ ကြက်သီးတွေ ထလာတယ်။ (အားရပါးရ ရယ်သံများ)
ကျွန်တော့်ရဲ့ ပထမဆုံး စာပေဟောပြောပွဲလိုက်ခဲ့ရတဲ့ အတွေ့အကြုံလေးကို ပြောပြပါရစေဦး။ စာရေးဆရာက စုစုပေါင်း ကျွန်တော်အပါအ၀င် (၅) ယောက်။ သွားတဲ့စာရေးဆရာအားလုံးထဲမှာ ကျွန်တော်က အငယ်ဆုံး၊ မျက်နှာသစ်။ မျက်စိသူငယ်၊ နားသူငယ်ပေါ့။ သွားရတဲ့နေရာက ဆရာချစ်နိုင်ရဲ့ ဇာတိမြေ ချောက်မြို့။ ကျွန်တော်တို့ စာရေးဆရာတွေကို လာကြိုပြီး ရေနံအရာရှိ ဧည့်ရိပ်သာကို ခေါ်သွားတယ်။ ကျွန်တော်တို့အတွက် ဧည့်ရိပ်သာမှာ အခန်းနှစ်ခု ပြင်ထားပေးတယ်။ ဧည့်ရိပ်သာ(၁)မှာ ကျန်တဲ့ စာရေးဆရာ (၄)ယောက်ကို တစ်ပေါင်းတည်း စီစဉ်ပေးထားတယ်။ ကျွန်တော့်အတွက်ကျတော့ ဧည့်ရိပ်သာ(၂)မှာ နေရမယ်ဆိုပြီး လိုက်ပို့တယ်။ သွားတဲ့ (၅)ယောက် အတူတူကို ကျွန်တော့်ကို တစ်ယောက်တည်း သီးသန့်ကြီးထားတော့ အားငယ်လိုက်တာဗျာ။ အဲဒါနဲ့ မေးကြည့်တော့ သူတို့တွေက စာရေးဆရာတွေအတွက် တည်းခိုဖို့နေရာ စီစဉ်ပေးပါဆိုလို့ စီစဉ်ပေးတာပါတဲ့။ စာရေးဆရာကြီး (၄)ယောက်နဲ့ တက်သစ်စ စာရေးဆရာမလေး (၁)ယောက် ပါမယ်ဆိုလို့၊ ဆရာမလေးကိုတော့ စာရေးဆရာကြီးတွေနဲ့ အတူထားလို့ မဖြစ်ချေဘူးဆိုပြီး သီးသန့်အခန်းတစ်ခန်း စီစဉ်ပေးထားတာပါတဲ့။ (ပရိသတ် ရယ်သံများ)
အမယ်... အခန်းထဲကိုဝင်သွားတော့ ပြင်ဆင်ထားတာ နုနေတာပဲဗျာ။ အိပ်ရာခင်း၊ ခေါင်းအုံးစွပ်ကအစ တကယ့်ကို နုနုကလေးတွေ။ (ပရိသတ် ရယ်သံများ) ဗီရိုကိုဖွင့်လိုက်တော့ အထုပ်ကလေးတွေ တွေ့တယ်။ ဘာမှန်းသေချာမသိပေမယ့် လေးထောင့်ထုပ် ပျော့စိစိလေးတွေဆိုတော့ ဗိုက်ဆာရင်စားရအောင် ပေါင်မုန့်ထည့်ပေးထားတာပဲလို့ နားလည်လိုက်တယ်။ အတော်လေးကို ပြည့်စုံအောင် စီစဉ်ပေးထားတာပါလားလို့ ၀မ်းတွေသာလို့ပေ့ါလေ။ ဒီကကျွန်တော်ကလည်း နဂိုကမှ အစားအသောက်ဆိုရင် သိတဲ့အတိုင်းပဲ ဘယ်နေလိမ့်မလဲ။ တစ်ခုလောက် စားလိုက်ဦးမယ်ဆိုပြီး တစ်ထုပ်ဖောက်လိုက်တာပေါ့။ အဲဒီလိုဖောက်နေတဲ့အချိန်မှာပဲ ရိပ်သာက လူတစ်ယောက် အမောတကောနဲ့ ပြေးဝင်လာတယ်။ ကျွန်တော်ဖောက်နေတဲ့ အထုပ်ကိုလည်းတွေ့ရော... မျက်ကလူးဆန်ပြာနဲ့... ဆရာ... မဖောက်နဲ့၊ မဖောက်နဲ့ အဲဒါ ဆရာ့အတွက် မဟုတ်ဘူးတဲ့။ ဘာဖြစ်လို့လဲဆိုတော့ "အဲဒါ အမျိုးသမီး လစဉ်သုံးပစ္စည်းတွေဆရာ" တဲ့။ (ပရိသတ်ရယ်သံများ အတောမသတ်တော့) ကဲ... မှတ်ကရော။ ကျွန်တော့်ကို စာရေးဆရာမလို့ထင်ပြီး အစစအရာရာ လိုလေသေးမရှိအောင် ပြင်ဆင်ထားပေးကြတာလေ။ (ရယ်သံများ မရပ်သေး)
ဘာပဲဖြစ်ဖြစ် ကျေးဇူးတင်ပါတယ်။ အခုတော့ ဟောပြောပွဲတွေ အများကြီးလည်း လိုက်ခဲ့ပြီးပြီ၊ နယ်တွေအစုံလည်း ရောက်ခဲ့ဖူးပြီဆိုတော့ ကျွန်တော့်ကို အမျိုးသားစာရေးဆရာမှန်း သိနေကြပါပြီ။ (ရယ်သံများ)
တစ်ခါက မြစ်ဝကျွန်းပေါ်ဒေသဘက်ကို စာပေဟောပြောပွဲ သွားစဉ်တုန်းကပေါ့ဗျာ။ နာဂစ်ဖြစ်ပြီးကာစ ကာလပေါ့။ ကျွန်တော်တို့မှာ အခုလို ဟီးဟီးဟားဟား ဟီလာတိုက်နေလို့လည်း မကောင်းဘူးလေ။ အဲဒီတော့ မျက်နှာလေးတွေ ငယ်အောင်လုပ်ပြီး စိတ်မကောင်းတဲ့ ပုံစံလေးတွေနဲ့ နေကြရတာပေါ့။ (ဆရာနွမ်ဂျာက အမူအရာလုပ်ပြနေသဖြင့် ပရိသတ်များ တ၀ါးဝါးနှင့် ပွဲကျနေလေသည်) အဲဒါနဲ့ ထမင်းစားချိန်ရောက်တော့ အိမ်သေးသေးလေးတစ်အိမ်မှာ ထမင်းစားရမယ်ပေါ့။ အမှန်အတိုင်းပြောရရင် သူတို့တွေဆီက ထမင်းကို ကျွန်တော်မစားရက်ပါဘူး။ သူတို့တွေမှာ ဒုက္ခကိုယ်စီနဲ့ ရုန်းကန်နေရတဲ့ အချိန်မဟုတ်လား။ ဒါပေမယ့်လည်း သမိုင်းပေးတာဝန်ကိုတော့ ကျေပွန်အောင် ထမ်းဆောင်ရဦးမှာပဲ ဆိုတဲ့စိတ်နဲ့ မစားမဖြစ် စားရတာပေါ့နော်။ (အသံနေအသံထားနှင့် ပြောလိုက်သဖြင့် ပရိသတ် ရယ်သံများ ဆူညံသွားသည်) ထင်ထားတာက ဟင်းချိုလေးတစ်ခွက်၊ ဟင်းလေးတစ်ခွက်လောက်ပေါ့။ ထမင်းဝိုင်းမှာလည်း ထိုင်လိုက်ရော... ကျွန်တော် အတော်လေးကို အံ့သြသွားတယ်။ ပုစွန်တုပ်ကြီးတွေဆိုတာ နည်းတာမဟုတ်ဘူး။ ပန်းကန်လုံးတစ်လုံးမှာ ပုစွန်တုပ် ၅ ကောင်လောက် ထည့်ပေးထားတာ။ ပန်းကန် (၃)လုံးလောက် ချပေးထားတာဆိုတော့ သိတဲ့အတိုင်းပဲ။
ရန်ကုန်မှာကလည်း ပုစွန်ဆိုတာက စားရခက်တယ်လေ။ အိတ်စပို့ ပို့ကုန်ဆိုတော့ တရားဝင်ရောင်းလို့ မရဘူးတဲ့။ ဈေးထဲမှာ ခိုးပြီးတော့ ရောင်းတာလည်း ရှိတာပေါ့။ ဒါပေမယ့် ပုစွန်တုပ်ရောင်းတဲ့လူခမြာ မြင်မြင်ထင်ထင်လည်း ရောင်းလို့မဖြစ်တော့ ဖက်တို့ဘာတို့နဲ့ အုပ်ထားရတာပေါ့။ ဘယ်နှယ့်နော်... ဈေးသည်ပါဆိုမှ ကိုယ်ရောင်းမယ့်ပစ္စည်းကို ပြထားမှ အဆင်ပြေမှာပေါ့နော်။ အဲဒီတော့ သူတို့ခမြာ မကြာခဏဆိုသလို လှန်,လှန်ပြရတာပေါ့။ (ပရိသတ်များ အတောမသတ်ရယ်မောသံများ) အုပ်ထားတဲ့ ဖက်တို့ဘာတို့ကို ပြောတာပါ။ (ဆရာနွမ်ဂျာက အမူအရာ လုပ်ပြသည်)(ရယ်သံများ ဆူညံနေဆဲ)
ပြန်ဆက်ရရင် မြစ်ဝကျွန်းပေါ်က အိမ်တစ်အိမ်မှာ စောစောကပြောသလို ထမင်းစားကြတာပေါ့။ ကျွန်တော်သိပ်ကြိုက်တဲ့ ပုစွန်တုပ်ကြီးတွေလည်း အားရပါးရ စားရတာပေါ့ဗျာ။ ဒါနဲ့ ကျွန်တော်လည်း မနေနိုင်တော့ မေးကြည့်မိတယ်။ ပုစွန်တုပ်တွေက ပေါလှချည်လားပေါ့။ ဟုတ်တယ်ဆရာတဲ့၊ နာဂစ်ဖြစ်ပြီးတော့ ဘယ်သူက စ,ဖွလိုက်တယ်မသိပါဘူး။ ပုစွန်တုပ်တွေရဲ့ ခေါင်းထဲမှာ လက်စွပ်ကလေးတွေ၊ နားကပ်ကလေးတွေ တွေ့ရတယ်တဲ့။ အဲဒီတော့ သက်ဆိုင်ရာက ဒီကပုစွန်တုပ်တွေကို ရောင်းခွင့်ပိတ်လိုက်တယ်လေ။ မရောင်းရမယ့်အတူတူ မထူးပါဘူးဆိုပြီး ဆရာတို့ကို ချက်ကျွေးတာပါတဲ့။ (ပရိသတ် ရယ်သံများ)
နာဂစ်ဖြစ်တုန်းက လျှပ်တစ်ပြက်အတွင်းမှာ ဖြစ်သွားတာဆိုတော့ ဘာကိုမှ မပြင်ဆင်လိုက်နိုင်ဘူး။ သေသွားတဲ့လူတွေကိုလည်း ချက်ချင်းဆယ်နိုင်၊ပြုနိုင်တာမဟုတ်တော့ မြစ်ချောင်းတွေထဲမှာ ပြည့်နေခဲ့တာပေါ့။ အဲဒီမှာ စောစောကပြောတဲ့ ပုစွန်တို့ဘာတို့က သူတို့အစာအမှတ်နဲ့ တွတ်ကြ၊ စားကြတာပေါ့။ သူတို့အနေနဲ့ တစ်ကိုယ်လုံးကို စားဖို့ဆိုတာလည်း မဖြစ်နိုင်ဘူးလေ။ အဲဒီတော့ လွတ်နေတဲ့၊ အစွန်းထွက်နေရာလေးတွေကို ကိုက်ဖြတ်စားသောက်ကြတာပေါ့။ (ပရိသတ် ရယ်သံများ) နားရွက်ကလေးကို ကိုက်လိုက်တဲ့အချိန်မှာ နားကပ်ကလေးပါ ပါသွားမယ်၊ လက်ချောင်းကလေးတွေကို ကိုက်လိုက်တဲ့အခါ လက်စွပ်လေးတွေပါ ပါသွားနိုင်တယ်လေ။ (ပရိသတ်များ ရယ်သံများ)
(ကျန်အကြောင်းအရာများကို ဆင်ဆာအရ ကျွန်တော့်ဘာသာ ချန်ထားခဲ့ပါသည်)
စာပေဟောပြောပွဲတွေမှာ စာရေးဆရာတွေအားလုံးနီးပါးလောက် ပြောကြတာတွေကို အနှစ်ချုပ်လိုက်ရင် တစ်ခုတည်းပါ။ ကျွန်တော်အခု ပြောနေတာတွေကလည်း အဲဒီတစ်ခုတည်းကိုပဲ ဦးတည်နေတာပါ။ စာလုံးလေးသုံးလုံးတည်းပါ။ သိပ်အများကြီး မဟုတ်ပါဘူး။ အဲဒါကတော့-
"စာဖတ်ပါ"
စာရေးဆရာကြီးတွေအားလုံး စာပေဟောပြောပွဲတွေမှာ ပြောချင်တဲ့ အဓိကရည်ရွယ်ချက်က စာဖတ်ကြဖို့ပါ။ အဲဒီတော့ ဘယ်လိုစာတွေ ဖတ်ရမှာလဲဆိုတဲ့ မေးခွန်းပေါ်လာတယ်။ အမျိုးမျိုးပြောကြပါတယ်။ ကျွန်တော့်အမြင်၊ ကျွန်တော့်ခံယူချက်ကတော့ စာအားလုံးကို ဖတ်ပါလို့ပဲ တိုက်တွန်းလိုပါတယ်။
ကျွန်တော်တို့ ရှေးလူကြီးတွေ ပြောလေ့ရှိပါတယ်။ "စာတစ်လုံး ဘုရားတစ်ဆူ" တဲ့။ စာလုံးလေးတစ်လုံးတိုင်းမှာ အဓိပ္ပါယ်တွေ ရှိနေပါတယ်။ အကြောင်းမဲ့သက်သက် ရေးထားခဲ့တာ လုံးဝမရှိပါဘူး။ စာလုံးတိုင်းမှာ တရားဓမ္မတွေ ရှိနေတယ်ဆိုတဲ့ အဓိပ္ပါယ်နဲ့ စာတစ်လုံး ဘုရားတစ်ဆူလို့ ပြောခဲ့ကြတာပါ။ ကျွန်တော်ပြောချင်တာကတော့ စာအားလုံးမှာ တစ်ခုမဟုတ်တစ်ခုတော့ စွမ်းအားတွေ ရှိနေတယ်ဆိုတာပါပဲ။
အဲဒါကို ကျွန်တော်က ဥပမာလေးနှစ်ခုနဲ့ သက်သေပြပါ့မယ်။
(၁) အနိမ့်စား ဥပမာ
(၂) အမြင့်စား ဥပမာ
အနိမ့်စားဥပမာရဲ့ အကြောင်းခံက ဒီလိုပါ။ တစ်ခါ စာပေဟောပြောပွဲတစ်ခုအဖြစ် ဘယ်ကိုသွားရသလဲဆိုတော့ ကင်းဝန်မင်းကြီးရဲ့ရွာကို သွားရတာပါ။ အဲဒီရွာမှာ ကင်းဝန်မင်းကြီးရဲ့ ခြေရာတွေ အများကြီးရှိပါတယ်။ ကင်းဝန်မင်းကြီး မွေးတဲ့နေရာ၊ ကင်းဝန်မင်းကြီး စာသင်ခဲ့တဲ့ကျောင်း၊ စသဖြင့်ပေါ့။ ကျွန်တော့်မှာ အကျင့်တစ်ခုရှိပါတယ်။ တစ်နေရာရာကို ရောက်ပြီဆိုတာနဲ့ အိမ်သာတွေကို သုတေသနလုပ်တတ်တဲ့ အကျင့်ပါ။ (ပရိသတ် ရယ်သံများ) အခုလည်း ငါရောက်နေတာက ကင်းဝန်မင်းကြီးရဲ့ရွာ။ အဲဒီတော့ ဒီကအိမ်သာတွေမှာလည်း တစ်ခုခုတော့ ထူးခြားတာ ရှိမှာပဲဆိုပြီး လိုက်ကြည့်ခဲ့ပါတယ်။ အဲဒီမှာ စောစောကကျွန်တော်ပြောမယ့် အနိမ့်စား ဥပမာလေးကို ရခဲ့တာပါ။
အိမ်သာထဲမှာ ရေးထားတဲ့ စာသားလေးတွေကို ပြောပြချင်ပါတယ်။ အဲဒီစာသားလေးတွေကို ကြိုက်လွန်းတဲ့အတွက် ကျွန်တော့်ရဲ့ "ယုံအောင်လည်း ပြောတတ်တယ်၊ လွမ်းအောင်လည်း ချွဲတတ်တယ်" ဆိုတဲ့ ၀တ္ထုထဲမှာကို အဲဒီစာသားလေးတွေကို ထည့်ရေးထားပါတယ်။ အိမ်သာနံရံမှာ ရေးထားတဲ့ စာသားလေးတွေက ဒီလိုပါ-
"သြော်... ဘ၀ ဘ၀
စားခဲ့သမျှ ထားခဲ့ရပေါ့
ဝါးခဲ့သမျှ သွားခဲ့ကြပေါ့
မြိုခဲ့သမျှ ယိုခဲ့ရပေါ့" တဲ့။
(ပရိသတ်များ လှိုက်လှိုက်လှဲလှဲ ရယ်ကြသည်)
ကျွန်တော်တို့တွေ အစားသောင်းကျန်းခဲ့သမျှဟာ စောစောက စာသားလေးတွေလိုပါပဲ အချိန်တန်ရင် ထားခဲ့ကြရမှာပဲမဟုတ်လား။ သေသွားတဲ့အခါ ယူသွားလို့လည်း ရတာမဟုတ်ပါဘူး။ ယူချင်သည်ဖြစ်စေ၊ မယူချင်သည်ဖြစ်စေ ပါသွားမှာကတော့ ကိုယ်လုပ်ခဲ့တဲ့ ကုသိုလ်၊ အကုသိုလ်ကံတရားတွေပါပဲ။ အကုသိုလ်နဲ့ယှဉ်ပြီး စားခဲ့၊ ၀ါးခဲ့၊ မြိုခဲ့ရင် အလကားနေရင်း အကုသိုလ်တွေ အတုံးလိုက်၊ အတစ်လိုက် သယ်သွားသလို ဖြစ်နေကြပါလိမ့်မယ်။ သတိပြုကြဖို့၊ စဉ်းစားကြဖို့ပါ။
ကြုံတုန်းပြောချင်တာက စာဖတ်ဖို့ဆိုတဲ့နေရာမှာ အခုအခါ ကျေးရွာတိုင်းလိုလိုမှာ စာကြည့်တိုက်တွေ လိုက်ထူထောင်ပေးနေတာ လေးသောင်းကျော်သွားပြီလို့ သိရပါတယ်။ ကျွန်တော်ရောက်ဖူးတဲ့ တချို့ရွာတွေဆိုရင် စာကြည့်တိုက်ဆိုတာတော့ ရှိပါရဲ့၊ အထဲမှာ နွားမကြီးက စားမြုံ့ပြန်ရင်း အိပ်နေတယ်။ (ပရိသတ်ရယ်သံများ) တချို့ရွာတွေကျတော့လည်း အထဲမှာတော့ စာအုပ်တွေရှိပါရဲ့၊ ဖုံတွေတက်လို့၊ အပေါက်မှာ ခွေးသားအမိ တစ်ပြုံကြီးက အိပ်နေတယ်။ (ပရိသတ်ရယ်သံများ) ကျွန်တော်က မကောင်းပြောတာမဟုတ်ပါဘူးခင်ဗျာ။ အပင်ပန်းခံပြီး လိုက်လုပ်နေတဲ့ ဆရာချစ်နိုင်တို့ကို သိစေချင်လို့ပါ။ ဒါမှလည်း ထိန်းသိမ်းနိုင်မှာမို့ပါ။
စာကြည့်တိုက်တွေကို တကယ့်ကို စနစ်တကျလုပ်နေတဲ့ ရွာတွေလည်း ရှိပါတယ်။ တကယ့်ကို အံ့မခန်းပါပဲ။ ရေးဘက်က အစင်ရွာ ဆိုတဲ့ရွာလေးက စာကြည့်တိုက်တော့ တကယ့်ကို အပျံစားကြီးပါပဲ။ ၀န်ထမ်း (၅)ဦးနဲ့ လည်ပတ်နေပါတယ်။ အနိမ့်ဆုံးဝန်ထမ်းရဲ့ လစာက (၅)သောင်းရှိပါတယ်။ အထဲမှာလည်း စာအုပ်စာတမ်းတွေမှ အပြည့်ပါပဲ။ ရတနာသုံးပါကိုလည်း အင်မတန်မှ ကြည်ညိုတဲ့ ရွာလေးဖြစ်ပါတယ်။ သက်ကြီးပူဇော်ပွဲလုပ်တာ အသက်(၈၀) အဘိုးအဘွား (၁၅၀)တောင် ရှိသတဲ့။ ပူဇော်ကန်တော့ပွဲလုပ်တော့ ကန်တော့တဲ့လူထက် အကန်တော့ခံတဲ့ လူဦးရေက ပိုများနေသလိုတောင် ဖြစ်နေသေးတယ်။ ပွဲစီစဉ်တဲ့လူတွေက တကယ်ဆိုရင် သူတို့က အသက်(၇၀)အထက်တွေအားလုံးကို ကန်တော့ချင်တာပါတဲ့။ ဒါပေမယ့် အသက်(၇၀)အထက်က များလွန်းတော့ ခန်းမနေရာက ဘယ်လိုမှကို အဆင်မပြေပါဘူးတဲ့။ အဲဒီလိုလုပ်ချင်ရင် ဘောလုံးကွင်းကြီးထဲမှာ စင်ထိုးပြီး လုပ်မှပဲ အဆင်ပြေမှာမို့ အခုလိုမျိုး အသက်(၈၀)အထက်ဆိုပြီး ဖြတ်လိုက်ရတာပါတဲ့။ အဲဒီလောက်အထိ သီလအား၊ သမာဓိအားတွေ ကောင်းတဲ့ရွာလေး ဖြစ်ပါတယ်။ လုပ်တဲ့အလုပ်ကတော့ တံငါအလုပ်ဖြစ်ပါတယ်။ ချမ်းသာတာကတော့ ဘာချမ်းသာသလဲမမေးနဲ့။ ရေးမှာတောင် မရှိတဲ့ ရေခဲခန်းဆိုတာ အဲဒီရွာမှာ နှစ်ခုတောင် ရှိသတဲ့။ အဲဒီရွာမှာ နာရေးကူညီမှုအသင်းရှိတယ်။ အသင်းဝင်လူငယ် ၅၀၀ ကျော် ရှိသတဲ့။ သူတို့ရွာမှာ ကိုယ်ပိုင် မီးသဂြိုဟ်စက် (၂)လုံး ရှိသတဲ့။ တစ်လုံးက လူတွေအတွက်၊ တစ်လုံးက ရဟန်းသံဃာတွေအတွက် ခွဲပြီး မီးသဂြိုဟ်ပါသတဲ့။ ရန်ကုန်မှာတောင် မရှိတဲ့ စနစ်ဖြစ်ပါတယ်။ အင်မတန်မှကို ချီးကျူးစရာပါ။
ဒါနဲ့ ရေးကိုရောက်တော့ သတင်းစာကိုယ်စားလှယ်ကို မေးကြည့်မိပါတယ်။ အစင်ရွာက သတင်းစာတကယ် ယူသလားဆိုတော့ ဟုတ်တယ်တဲ့။ ကျွန်တော့်ဆီက သတင်းစာအားလုံးရဲ့ တစ်ဝက်က အစင်ရွာက ယူတာတဲ့။ ရန်ကုန်က ထွက်သမျှ ဂျာနယ်၊ မဂ္ဂဇင်း၊ စာအုပ် အားလုံးကိုလည်း သူ့အလှူရှင်နဲ့သူ အားလုံးယူတယ်တဲ့။ ပြီးရင် စာကြည့်တိုက်ကို ပို့ပေးရတယ်တဲ့။ ကဲ... အဲဒီလောက်အထိ စာကြည့်တိုက်ကို တန်ဖိုးထား၊ စာပေကို အလေးထားတဲ့ ရွာပါ။ ကျွန်တော်တို့ကို စာပေဟောပြောပွဲဖိတ်တော့လည်း သူတို့ဆီက ကိုယ်ပိုင် ဆလွန်ကားနဲ့ ရန်ကုန်အထိ၊ အိမ်တိုင်ယာရောက် လာကြိုပေး၊ ပြန်ပို့ပေးတာဖြစ်ပါတယ်။ ပြီးတော့ သူတို့ရွာတစ်ခုတည်းကို လာပြီး တကူးတက ဟောပြောပေးလို့ဆိုပြီး တစ်ယောက်ကို ငွေတစ်သိန်းစီ ကန်တော့လိုက်ကြတယ်။ ကျွန်တော်တို့က နေ့တိုင်းကို စာပေစကားတွေ ကြားချင်တာလို့ ပြောလိုက်ကြသေးတယ်။ အစင်ရွာဆိုတာ အဲဒီလိုရွာပါ။
အမြင့်စားဥပမာအနေနဲ့ ဆရာဇော်ဂျီရဲ့ တို့တိုင်းပြည် ကဗျာကို ရွတ်ဆိုပြပြီး အဓိပ္ပါယ်ရှင်းလင်းပြသွားခဲ့ပါတယ်။ ဟန်နဲ့မာန်နဲ့ရွတ်ပြီး အဓိပ္ပါယ်တွေကို တစ်ခုချင်းစီ ရှင်းပြပြောပြသွားတာပါ။
(အသေးစိတ်ရေးဖို့ အချိန်အခက်အခဲ ရှိတဲ့အတွက် စိတ်မကောင်းစွာဘဲ ချန်လှပ်ခဲ့ပါတယ်)
ကိုယ့်နိုင်ငံအရေးကို ကိုယ်တွေပဲ ဖြေရှင်းရတယ်။ ဘယ်သူ့ကိုမှ အားကိုးမနေနဲ့။ အဝေးကလူကိုလည်း မယုံဘူး။ အနီးကလူတွေကိုလည်း မယုံဘူး။ အနီးကလူတွေအကြောင်း သိချင်ရင် မန္တလေးကို သွားကြည့်။
(ပရိသတ်ထဲမှ ဖုန်းသံမြည်လာသဖြင့် ဆရာနွမ်ဂျာသိုင်း ခေတ္တရပ်နားသေးသည်။ ကျေးဇူးရှင် ဖုန်းပိုင်ရှင်ကလည်း တော်တော်နဲ့ မကိုင်ဘူး။ အတော်စိတ်ညစ်ဖို့ကောင်းတယ်။ အမယ်ဖုန်းကိုကိုင်တော့လည်း ပြောတောင်ပြောနေလိုက်သေးတယ်။ ဆရာကတော့ နောက်ရှာပါတယ်။ တီးလုံးသံကြားတော့ ကျွန်တော်က ကချင်စိတ်၊ ဆိုချင်စိတ်တောင် ပေါ်လာတယ်ဗျာတဲ့။ တစ်ဆက်တည်းမှာပဲ ကျွန်တော်နိဂုံးချုပ်တော့မှာပါဆိုပြီး ပြောရှာပါသေးတယ်)
အဲဒီနောက် ဟိုနည်းနည်းဒီနည်းနည်းပြော၊ နဂါးနီစာအုပ်အသင်းအကြောင်း ပြောပါတယ်။ နဂါးနီစာအုပ်အသင်းကြီးကြောင့် မြန်မာ့လွတ်လပ်ရေးကြိုးပမ်းမှု သမိုင်းစာမျက်နှာ ပြောင်းလဲခဲ့ရတာလို့ ဆရာက အတိအလင်းကို ချီးမွမ်းသွားပါတယ်။ နဂါးနီစာအုပ်တိုက်ရဲ့ စာအုပ်တွေကို အဲဒီအချိန်ကလူငယ်တွေ သောင်းသောင်းဖြဖြ ဖတ်ကြပြီးတဲ့အချိန်မှာ မျက်စိပွင့်၊ နားပွင့်နဲ့ လွတ်လပ်ရေးပန်းကို အရလှမ်းဖို့ ကြိုးပမ်းနိုင်ခဲ့ကြတယ်လို့ ဆိုပါတယ်။
အားလုံးကို ကျေးဇူးတင်ပါတယ်ခင်ဗျား။
(ပရိသတ် လက်ခုပ်သံများ အကြာကြီးတီးကြသည်)
ကိုဉာဏ် (ပန်းလောင်မြေ)
၂၀၁၀ ပြည့်နှစ် ဖေဖော်ဝါရီလ ၅ ရက်၊ သောကြာနေ့။
ညနေ ၅ နာရီ ၁၇ မိနစ်တွင်ပြီး၏။
No comments:
Post a Comment