နိုင်ငံရေးအသေးစားနှင့် ဒေသပုံပြင် - မောင်စူးစမ်း

နိုင်ငံရေးဟာလာပြင်
မြန်မာ့နိုင်ငံရေးသည် ၂၀၁၀ ပြည့်နှစ် အကြိုရွေးကောက်ပွဲကာလနှင့် ၂၀၁၀ ပြည့် ရွေးကောက်ပွဲအပြီး ကာလတို့ဟူ၍ ကာလနှစ်ရပ်ကို ဖြတ်သန်းရမည်။ ဤသို့ ဖြတ်သန်းရသောအခါ၌ အဆင့်နှစ်ဆင့် တွေ့ကြုံမည်။ ပထမအဆင့်၌ နိုင်ငံရေးပါတီများ လှုပ်ရှားခွင့်မရှိသော ကာလဖြစ်၍ နိုင်ငံရေးဟာလာပြင် Political Void ပေါ်သည်ဟု ဆိုရမည်။ ယခု ၂၀၁၀ ပြည့်နှစ်ရွေးကောက်ပွဲ ကျင်းပတော့မည်။ ဖွဲ့စည်းပုံအခြေခံဥပဒေနှင့်အညီ ရွေးကောက်ပွဲဆိုင်ရာ ဥပဒေနှင့် နိုင်ငံရေးပါတီများဥပဒေတို့ ပြဋ္ဌာန်းပြီးလျှင် နိုင်ငံရေးပါတီတို့ လှုပ်ရှားလာကြမည်။ သို့ဖြင့် နိုင်ငံရေးဟာလာပြင်တစ်မျိုး ပီပြင်သွားမည်။

အခြေအနေအရပ်ရပ်ကို သုံးသပ်၍ စာရေးသူက အနာဂတ်မြန်မာနိုင်ငံရေး အထူးသဖြင့် ရွေးကောက်ပွဲနှင့် လွှတ်တော်နိုင်ငံရေးတို့တွင် သမိုင်း၊ အိုင်ဒီယိုလိုဂျီတို့သည် ဆီလျော်ဖွယ်မရှိဟု သုံးသပ်ရေးသားခဲ့သည်။ ရွေးကောက်ပွဲတို့တွင် သမိုင်းအကြောင်း အိုင်ဒီယိုလိုဂျီအကြောင်းတို့ကို ရှေ့တန်းတင်၍ မဲဆွယ်လျှင် မဲဆန္ဒရှင်လူထုသည် နားမလည်နိုင်တော့ပြီဟု တွက်သည်။ သို့တည်းမဟုတ် လူထုသည် သမိုင်းနှင့် အိုင်ဒီယိုလိုဂျီတို့ကို အမောဆိုက်နေပြီဟု ထင်သည်။

လူအုပ်စိတ်
ဤသဘောမှ ကြီးကျယ်ခမ်းနားသော စူပါအိုင်ဒီယာတို့သည် မြန်မာ့နိုင်ငံရေး၌ ထင်တိုင်းကြဲခံခဲ့ရပြီး ဖြစ်သည်။ ဥပမာ- ဆိုရှယ်လစ်စနစ်၏ အတွေ့အကြုံကို လက်တွေ့ဖြတ်သန်းခဲ့ဖူးပြီဖြစ်ရာ မြန်မာ့အနာဂတ်တွင် စူပါအိုင်ဒီယာကြီးတွေ ပွဲမတိုးနိုင်တော့ဟုထင်သည်။ အလားတူစွာ ခေတ်ပြောင်းတော်လှန်ရေး သဘောတရားတို့သည်လည်း ရွေးကောက်ပွဲတွင် ဆူဆူညံညံ ဂယက်မရှိနိုင်တော့ဟု ခန့်မှန်းရသည်။ မျိုးချစ်စိတ်ဖြင့် မဲဆွယ်ရန်မှာလည်း ဤစိတ်သည် စုပေါင်းအသိစိတ် ဘုံအသိစိတ် Collective Consciousness ဖြစ်သည်။ ထူးထူးခြားခြား စူးရှစရာ မရှိပေ။

ထို့ကြောင့် ကျန်ရှိသောအရာမှာ သုံးပါးသာဖြစ်မည်။ ပထမအချက်မှာ လူအုပ်စိတ် Crowd Mentality ဖြစ်သည်။ သူများလုပ်တာကိုကြည့်၍ ကိုယ်က လိုက်လုပ်ခြင်းဖြစ်သည်။ ဒုတိယအချက်မှာ စီမံခန့်ခွဲမှုတုံ့ပြန်မှု Managed Response ဖြစ်သည်။ ပါဝါသြဇာအရှိန်ကိုကြည့်၍ တုံ့ပြန်ခြင်းဖြစ်သည်။ တတိယအချက်မှာ ဒေသပုံပြင် Local Narrative ဖြင့် တုံ့ပြန်ခြင်း ဖြစ်သည်။ ၎င်းကို နိုင်ငံရေးအသေးစား Micro Politics ဟူ၍လည်းကောင်း၊ နိစ္စဓူဝဘ၀ အခြေစိုက် နိုင်ငံရေးဟူ၍လည်းကောင်း ခေါ်ဝေါ်သည်။ နေ့စဉ်တွေ့နေရသော ဘ၀ပြဿနာတို့ကို အခြေခံ၍ လှုပ်ရှားမှုတုံ့ပြန်ခြင်းကို ရည်ညွှန်းသွားသည်။ ဥပမာ - ရေမရသည့် ပြဿနာ၊ မီးမလာသည့် ပြဿနာမျိုးတို့ ဖြစ်ကြသည်။ နိစ္စဓူဝ ဘ၀ပြဿနာတို့သည် ရွေးကောက်ပွဲ၌ လှုံ့ဆော်သောပြဿနာ ဖြစ်နိုင်သည်။

ဒေသပုံပြင်
ထို့ကြောင့် ၂၀၁၀ ပြည့်နှစ် ရွေးကောက်ပွဲသည် နိုင်ငံရေးစနစ်သစ်သို့ ကူးပြောင်းရန် ဖိုရမ်ဖြစ်သည့်အပြင် ဆိုခဲ့ပါ အချက်တို့ဖြင့်လည်း ထူးခြားနေမည်။ လမ်းညွှန်ဒီမိုကရေစီအရ စစ်ဘက်မှ စပွန်ဆာလုပ်သော ရွေးကောက်ပွဲဖြစ်သည်။ ဤရွေးကောက်ပွဲတွင် စူပါအိုင်ဒီယာနှင့် အိုင်ဒီအိုလိုဂျီတို့က လွှမ်းမိုးစရာမရှိ။ ရွေးကောက်ပွဲ၌ မဲဆန္ဒရှင်တို့က အသေးစား နိုင်ငံရေး (၀ါ) နိစ္စဓူဝဘ၀ပြဿနာတို့အပေါ် အာရုံထားပါလိမ့်မည်။ ရွေးကောက်ပွဲက တစ်မူထူးခြားပေသည်။ သို့သော် ရွေးကောက်ပွဲ၌ အဆုံးအဖြတ်ပေးမည့် ပြဿနာတို့က ဒေသပုံပြင် Local Narrative တို့ ဖြစ်ကြမည်။ နိစ္စဓူဝ ဘ၀ပြဿနာတို့ ဖြစ်ကြမည်။

ရန်ကုန်တိုင်းမ် ဂျာနယ်
အတွဲ (၆) အမှတ် (၇)
Political Times, Supplement (A)
ဖေဖော်ဝါရီ ၁၈-၂၄၊ ၂၀၁၀