(၁)
ကိုယ့်ထက်မြင့်တဲ့လူကို မော့ကြည့်ရတာ ဘာဆန်းလို့လဲဗျာ။ ၀န်မလေးပါဘူး။
အဲ... ဒါပေမယ့်၊ ဒါပေမယ့်ပေါ့ဗျာ.....
နိမ့်တဲ့လူတွေကိုပဲ ခဏခဏ (အမြဲတမ်း) မော့ကြည့်နေရတာကတော့ သိပ်မနိပ်လှဘူး။ ဒူးခေါင်းတွေ နာတယ်ဗျ။
(၂)
အမှိုက်မပစ်ရဆိုတဲ့ ဆိုင်းဘုတ်တွေ၊ စာရွက်တွေကိုတော့ နေရာတိုင်းမှာ တွေ့ရတယ်။
အဲ... ဒါပေမယ့်...
အမှိုက်ပုံးကိုတော့ ဘယ်လိုက်ရှာရမှန်း မသိဘူး။
(၃)
ဆင်ဖြူမျက်နှာ ဆင်မည်းမကြည့်ဝံ့တဲ့။
အဲ... ဒါပေမယ့်လည်း.....
ဆင်မည်းမျက်နှာကို မကြည့်ဝံ့တဲ့ ဆင်ဖြူတွေလည်း ရှိတယ်ဆိုတာကို သိလိုက်ရတဲ့အချိန်မှာ ကျွန်တော့်ရင်ထဲမှာ ဘာတွေဖြစ်သွားသလဲဆိုတာ ပြန်တောင်မတွေးချင်ဘူး။
(၄)
လူညီရင် ဤကို ကျွဲလို့ ဖတ်ကြသတဲ့။
သူတို့ဝိုင်းဖတ်နေကြတဲ့ စာလုံးကြီးကိုက "ကျွဲ" ဆိုတာကို မသိတဲ့လူတွေ များလိုက်တာဗျာ။
(၅)
ပဒိုင်းသီးဆိုတဲ့ အသံကြားတာနဲ့ ပြုံးတတ်ကြတယ်။
အဲ... ဒါပေမယ့်၊ ဒါပေမယ့်ပေါ့ဗျာ.....
ကိုယ်တိုင်ရော လူ့ပဒိုင်းသီး ဖြစ်နေသလားဆိုတာတော့ ဘယ်သူကမှ မတွေးချင်ကြဘူး။
(၆)
စွပ်စွဲသမျှကို ပြန်ရှင်းပြတော့
မှန်တာပြောရင် မခံနိုင်ဘူးဖြစ်ကြတာပေါ့တဲ့။
ဘာမှပြန်မပြောဘဲ ငြိမ်နေပြန်တော့လည်း
ဆိတ်ဆိတ်နေခြင်းမို့ ၀န်ခံခြင်းမည်သတဲ့။
(ကျွန်တော်မျိုးကြီး သေသင့်ပါတယ်လို့ပဲ အော်သင့်နေပြီထင်ပ)
(၇)
လက်ခုပ်တီးတယ်ဆိုတာ အားပေးခြင်းရဲ့ သင်္ကေတပါလို့ ကိုင်ဇာကတော့ ခံစားချက်အပြည့်နဲ့ ဆိုတာပဲ။
အဲ... ဒါပေမယ့်၊ ဒါပေမယ့်ပေါ့ဗျာ.....
အားပေးခြင်းမဟုတ်တဲ့ လက်ခုပ်သံတွေ ရှိသေးတယ်ဆိုတာကို သူလည်းသိနေမလားလို့ တွေးနေမိတယ်။
ကိုဉာဏ် (ပန်းလောင်မြေ)
၂၀၁၀ ပြည့်နှစ် မတ်လ ၂၀ ရက်၊ စနေနေ့။
ည ၈ နာရီ ၄၀ မိနစ်တွင်ပြီး၏။
No comments:
Post a Comment