ကြည့်ဖြစ်ခဲ့သော မြန်မာဗီဒီယိုဇာတ်ကားများ

(၁)
ဇာတ်ကားအမည် - အီမို ဘန်ကောက်
အောင်ဗပါဝါ ရေးညွှန်းရိုက်ကူးသည်။
သရုပ်ဆောင်များ - နေတိုး၊ အိန္ဒြာကျော်ဇင်၊ ဗေလုဝ၊ ကျော်ထူး၊ ငှက်ပျောကြော်၊ ညီဂျော်၊ တက္ကသိုလ်ဂွမ်းပုံ၊ မြို့တော်ချစ်ဖွယ်၊ ပွင့်၊ ချစ်စရာ

(ကျွန်တော့်အမြင်)
ပထမဆုံး အဲဒီဇာတ်ကားကို တအားရယ်ရတာပဲလို့ အညွှန်းကောင်းခဲ့တဲ့ သူငယ်ချင်းမယ်စုကို အပြစ်တင်ရမယ်။ အဟုတ်မှတ်လို့ ငှားကြည့်မိပါတယ်။ စာတန်းထိုးတဲ့အချိန်မှာ အောင်ဗပါဝါဆိုတဲ့ နာမည်ကို မြင်လိုက်ရကတည်းက လူကအတော်ကြီးကို သေချင်စော်နံသွားပြီ။ တစ်ကားတစ်လေများ ကောင်းနေမလားလို့ ဆက်ကြည့်ဖြစ်ပါတယ်။ ပြီးဆုံးတဲ့အထိ ဆိုပါတော့။ ပြီးသွားတဲ့အချိန်မှာ ဘာသံသယမှမရှိဘဲ ချဖြစ်တဲ့မှတ်ချက်ကတော့ ပေါရက်ပါပေ့ကွယ် ဆိုတာပါပဲ။ အေးလေ... အဲဒါမှလည်း အောင်ဗပါဝါ ဖြစ်တော့မှာကိုး။ အံ့သြမိတာက နေတိုးနဲ့ အူဝဲဟာ အဲလိုဇာတ်ကားမျိုးကို ဘာဖြစ်လို့ ရိုက်သလဲဆိုတာပါပဲ။ ပွင့်ကို ဆင်ဆာဖြတ်ထားတာကိုတော့ နည်းနည်းအံ့သြမိတယ်။ ဒီခန္ဓာကိုယ်ကြီးကို ဆင်ဆာရအောင်ဖြတ်တဲ့ ပညာရှင်တွေကိုလည်း ချီးကျူးမိတယ်။ ပွင့်ကလည်း တအားဟော့နေလို့ ဖြစ်မှာပါလေ။ (ဟားဟားဟား)။ ပြောသမျှ စကားတွေအကုန်လုံးက အဓိပ္ပါယ်နှစ်ခွထွက်တယ်။ တစ်ခုမှ အောက်ပိုင်းမလွတ်ဘူး။ အူဝဲရဲ့ အဖေလုပ်တဲ့ မြို့တော်ချစ်ဖွယ်ကလည်း ပေါလိုက်ကြောင်လိုက်တာမှ သြချယူရတယ်။

(၂)
ဇာတ်ကားအမည် - နတ်သမီးချစ်တဲ့ ပင်လယ်
ဇာတ်လမ်း၊ ဇာတ်ညွှန်း၊ ဒါရိုက်တာ - မောင်အောင် (ရူပဗေဒ)
သရုပ်ဆောင်များ - နေတိုး၊ ပုလဲဝင်း၊ ၀တ်မှုန်ရွှေရည်၊ ဟိန်းမင်း

(ကျွန်တော့်အမြင်)
ဇာတ်သိမ်းခါနီးမှာ ညီအစ်မနှစ်ယောက်နဲ့ ဇာတ်လမ်းကို လှည့်ထားတာကလွဲရင် တစ်ကားလုံး ချာတူးလန်လို့ ပြောရမယ်။ ဒီထုတ်လုပ်ရေးကပဲထုတ်တဲ့ ပင်လယ်ကောက်ကြောင်းဇာတ်ကား ရိုက်ရင်းနဲ့ တစ်ချက်ခုတ် အချက်များစွာပြတ်ဆိုပြီး ရိုက်ထားတဲ့ဇာတ်ကားလား မပြောတတ်ဘူး။ သရုပ်ဆောင်တွေက ဒီလူတွေချည်းပဲ။ နေတိုးကလည်း ဒီဇာတ်ကားမှာပါ ပန်းချီတွေဆွဲနေပြန်ပါရောလား။ ပင်လယ်ကမ်းခြေမှာ ၀တ်မှုန်ရွှေရည် ရေကူးတာလေးတွေ၊ လျှောက်ပြေးတာလေးတွေနဲ့ ဗန်းပြပြီး လုပ်စားသွားတဲ့ ဇာတ်ကားတစ်ခုလို့ပဲ ကျွန်တော်ကဆိုရင် ကြည့်ပြီးတဲ့လူတွေက မလွန်ဘူးဗျလို့ ထောက်ခံကြမယ် ထင်ပါရဲ့ဗျာ။

(၃)
ဇာတ်ကားအမည် - ရေရုပ်ရေးခြယ်သူ
ဝတ္ထု - ရှင်မြတ်နိုး
ဇာတ်ညွှန်း - မင်းညီ
ဒါရိုက်တာ - နေပိုင်
သရုပ်ဆောင်များ - ပြေတီဦး၊ ပိုင်ဇေရဲထွန်း၊ မေကဗျာ၊ သန်းသန်းစိုး

(ကျွန်တော့်အမြင်)
ရင်ထဲမှာ နင့်ကနဲဖြစ်သွားရတဲ့ ဇာတ်လမ်းတစ်ခုပါ။ မေတ္တာဆိုတာ၊ အချစ်ဆိုတာ ရောင်ပြန်ဟပ်စမြဲပဲလို့ ယုံကြည်တဲ့လူတွေအတွက်တော့ တသသပြောစရာ ဇာတ်လမ်းတစ်ခုပေါ့။ အထူးသဖြင့် အရမ်းချစ်တတ်သူတွေအတွက် ကြည့်လို့မ၀တဲ့ ဇာတ်ကားတစ်ခု ဖြစ်မှာပါ။ အချစ်ကို သာမန်ပဲ ယုံကြည်ယူဆသူတွေအတွက်တော့ အိုဗာဖြစ်လွန်းတယ်၊ မဖြစ်နိုင်တာကြီးလို့ ပြောကြမယ့် ဇာတ်ကားပါ။ ဒါပေမယ့် အတော်လေးကိုကောင်းတဲ့ ဇာတ်လမ်းဆိုတာကိုတော့ လက်တို့လိုက်ပါရစေ။ သြော်... တစ်ခုမေ့နေလို့... ထိခိုက်ခံစားလွယ်ပြီး မျက်ရည်လွယ်တဲ့သူတွေကတော့ သူငယ်ချင်းတွေနဲ့အတူ မကြည့်သင့်တဲ့ ဇာတ်ကားပါ။ တစ်ယောက်တည်းထိုင်ပြီး လက်ကိုင်ပုဝါတစ်ထည်နဲ့ အေးအေးဆေးဆေး ခံစားကြည့်သင့်ပါတယ်။

(၄)
ဇာတ်ကားအမည် - သမီးရှင်
ဝတ္ထု - မီကိုဇူးဇင်
တွဲဘက်ဒါရိုက်တာ - ကျောက်ဒိုး
ဇာတ်ညွှန်းနှင့် ဒါရိုက်တာ - ခင်မောင်ဦး၊ စိုးသိန်းထွဋ်
သရုပ်ဆောင်များ - မိုးအောင်ရင်၊ လင်းလက်ဟိန်း၊ ရဲအောင်၊ စိုးမြတ်သူဇာ၊ မေသဉ္ဇာဦး၊ ပြည့်ဖူးခိုင်၊ မေသက်ခိုင်၊ ဆုကဗျာ

(ကျွန်တော့်အမြင်)
ကြည့်ဖြစ်အောင်ကြည့်သင့်တဲ့ ဘ၀သရုပ်ဖော် ဇာတ်ကားတစ်ခုပါ။ ဇာတ်ကားတစ်ခုလုံးရဲ့ အသက်ဖြစ်တဲ့ သမီးရှင်ဆိုတဲ့ ဇာတ်ရုပ်နေရာမှာ စိုးမြတ်သူဇာကို ထားတယ်ဆိုကတည်းက ဒီဇာတ်ကားရဲ့ အခြေအနေကို ခန့်မှန်းကြည့်လို့ ရမယ်ထင်ပါရဲ့။ အပျင်းပြေ ရယ်စရာဟာသကားတွေ ကြည့်ချင်သူတွေအတွက်တော့ အဆင်ပြေမှာမဟုတ်တဲ့ အလေးအနက် ဇာတ်လမ်းတစ်ခုပါ။

(၅)
ဇာတ်ကားအမည် - တိမ်တွေသွားတဲ့လမ်း
ဇာတ်လမ်း၊ ဇာတ်ညွှန်း - ဆာတိုရီ၊ မင်းထင်ကိုကိုကြီး
ဒါရိုက်တာ - မင်းထင်ကိုကိုကြီး
သရုပ်ဆောင်များ - ရဲတိုက်၊ ထွန်းအိန္ဒြာဗို၊ မေ၊ ထွန်းထွန်းဝင်း၊ မေသဉ္ဇာဦး

(ကျွန်တော့်အမြင်)
ဆာတိုရီ၊ မင်းထင်ကိုကိုကြီးနဲ့ ရဲတိုက်တို့ရဲ့ ထုံးစံအတိုင်း သာမန်ကြည့်နေကျ ဇာတ်ကားတွေနဲ့ မတူတာတော့ ပြောစရာလိုမယ် မထင်ပါဘူး။ ဥပဒေအကြောင်းအရာတွေနဲ့ ပတ်သက်ပြီး စိတ်ဝင်စားအောင် ရိုက်ပြထားတဲ့ ဒီဇာတ်လမ်းကို အမှတ်ပေးမိတာ အမှန်ပါ။ ရှေ့နေတွေရဲ့ဘ၀၊ ကျင့်ဝတ်တွေ၊ လုပ်ထုံးလုပ်နည်းတွေကို ပညာသားပါပါနဲ့ ဇာတ်ကွက်တွေထဲမှာ ထည့်ပြသွားတာဟာ Love Story in Harvard ကိုတောင် ပြန်လွမ်းမိသွားတယ်။ ရဲတိုက်နဲ့ ထွန်းအိန္ဒြာဗိုတို့ရဲ့ သရုပ်ဆောင်အားပြိုင်မှုကို မြင်ခွင့်ရလိုက်တယ်။ ဒါပေမယ့် သမ္ဘာက အရမ်းစကားပြောလွန်းတယ်။ ရဲတိုက်က တအားကို အားကြိုးမာန်တက် ကြိုးစားပြီး သရုပ်ဆောင်ပြရတာကို ထွန်းအိန္ဒြာဗိုက ပေါ့ပေါ့ပါးပါးလေးနဲ့ မျက်လုံးလေးချီလိုက်၊ နှုတ်ခမ်းလေးမဲ့လိုက်နဲ့ လုပ်ပြသွားတယ်။ ကျွန်တော်က အခုမှကြည့်ရတာမို့ ကြည့်ပြီးသူတွေ များနေလောက်ပါပြီ။ မကြည့်ရသေးတဲ့သူတွေကိုတော့ ကြည့်ဖြစ်အောင်ကြည့်ဖို့ တိုက်တွန်းချင်တဲ့ ဇာတ်ကားတစ်ခုပါ။

(၆)
ဇာတ်ကားအမည် - ကရုပ်ကလေး
ဝတ္ထု - လွန်းထားထား (ဆေးတက္ကသိုလ်)
ဇာတ်ညွှန်း - ချင်းတွင်းတာရာ
ဒါရိုက်တာ - သန့်စင်အောင်
သရုပ်ဆောင်များ - ခန့်စည်သူ၊ သက်မွန်မြင့်၊ မိုးဒီ

(ကျွန်တော့်အမြင်)
ထုတ်လုပ်သူတစ်ယောက်နဲ့ တက်သစ်စမင်းသမီးတစ်ဦးရဲ့ ဇာတ်လမ်းပါ။ မထူးပေမယ့် မရိုးတဲ့ ဇာတ်လမ်းဆိုပါတော့။ ကျွန်တော့်မှတ်ဉာဏ်တွေ ကောင်းသေးတယ်ဆိုရင်တော့ ဒီလိုဇာတ်လမ်းမျိုး နောက်ထပ်နှစ်ကားလောက် ကြည့်ဖူးတယ်ထင်တာပါပဲ။ ဇာတ်လမ်းကျောရိုးက ဒီပုံစံချည်းပါပဲ။ အင်း... ဘယ်လိုပြောရမှန်းတောင် မသိတဲ့ဇာတ်ကားပဲဗျ။ ပေါကြောင်ကြောင် ဇာတ်ကားတွေထက်စာရင်တော့ အချိန်ပေးပြီး ကြည့်ရကျိုးနပ်တဲ့ ဇာတ်ကားတစ်ခု ဆိုပါတော့ဗျာ။ သက်မွန်မြင့်ခရေဇီတွေကတော့ ကြိုက်ကြမှာပါ။

အမှတ်တရ
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ ဧပြီလ ၂၅ ရက်၊ တနင်္ဂနွေနေ့။
ည ၈ နာရီ ၄၈ မိနစ်တွင်ပြီး၏။