သတ္တ၀ါတိုင်း အကောင်းဆုံးကို ကြိုက်မြဲဖြစ်သည်။ သို့သော် ဘယ်အရာအကောင်းဆုံးဟု ရွေးချယ်နိုင်ရန် သိရှိဖို့ လိုအပ်ပေသည်။ အကောင်းဆုံးအရာများကို ရွေးချယ်စုစည်းအပ်ပါသည်။ ဆင်ခြင်ကြည့်နိုင်ကြဖို့ ရည်သန်ပါသည်။
အကောင်းဆုံးပုဂ္ဂိုလ်
ကိုယ်တိုင်ပင် ဖြစ်ပါသည်။ လောကတွင် ကိုယ့်ထက်ပို၍ ကိုယ့်အကြိုက်လိုက်မည့်သူ မရှိနိုင်ပါ။ ကိုယ့်ထက်ပို၍ ကိုယ့်အကြောင်းသိသူ မရှိနိုင်ပါ။ ကိုယ့်ထက်ကိုယ်ကျိုးကို လိုလားပေးမည့်သူ မရှိနိုင်ပါ။ ထို့ပြင် ကိုယ်ပြုသော စေတနာကံသည် ကိုယ့်အကျိုးကိုပင် ဖြစ်စေမည်ဖြစ်သည်။ ကိုယ်လုပ်မှသာ ကိုယ်ရမည်ဖြစ်သည်။ ဘုရားရှင်ကလည်း "ကိုယ့်ကိုယ်ကိုယ်သာ ကိုးကွယ်ရာ"၊ "ကိုယ့်ကံကြမ္မာ ကိုယ်သာဖန်တီးသည်" ဟု ဟောပြထားပြီး ဖြစ်ရာ ကိုယ်ကောင်းချင်လျှင် အကောင်းဆုံးပုဂ္ဂိုလ်ဖြစ်ရန် ကြိုးစားစီမံရန်သာတည်း။
အကောင်းဆုံးအချိန်
ယခုအချိန်သည် အကောင်းဆုံးအချိန် ဖြစ်သည်။ အဘယ်ကြောင့်ဆိုသော် နောင်အချိန်တွင် ယခုအချိန် မရှိတော့၍ဖြစ်သည်။ လုပ်သင့်လုပ်ထိုက်သည်များကို ယခုလုပ်မှသာ ပြီးစီးနိုင်မည်ဖြစ်သည်။ နောင်မှဆိုလျှင် မသေချာတော့ပါ။ ဖြစ်ပျက်တတ်သော သဘောရှိသည့် လောက၌ လက်ရှိအချိန်သည်သာ အသေချာဆုံးဖြစ်သည်။ "သင်သည် မြစ်တစ်ခုကို နှစ်ကြိမ်မဆင်းနိုင်" ဟု ဆိုရိုးရှိသည်နှင့်အညီ မြစ်သည်လည်း စီးဆင်း၍ သွားတတ်သည်။ သင်သည်လည်း ပြောင်းလဲ၍သွားပြီ ဖြစ်သည်။ ထို့ကြောင့် တစ်ပြိုင်တည်းကြုံရမည့် ယခုလက်ရှိအချိန်တွင် မြစ်ရေ၏ လန်းဆန်းမှု၊ အေးမြမှုကို ကြည်နူးစွာခံစားမိဖို့ လိုသည်။ ကိုယ်၊ လက်၊ မျက်နှာ သန့်စင်မိဖို့ လိုသည်။ ထို့ပြင် ရေစီးနှင့် မမြောဖို့၊ မနစ်မြုပ်ဖို့ ထိန်းသိမ်းရန် လိုသည်။ ဤကဲ့သို့ မြစ်တွင်းဆင်းမိစဉ် သင်လုပ်ဆောင်မိလျှင် ဤသဘောမျိုးပင် အချိန်ကို အသုံးချမိလျှင် ရရှိအပ်သော ယခုအချိန်မှာ သင် အကောင်းဆုံးလုပ်ဆောင်မိပြီ ဖြစ်သည်။
အကောင်းဆုံးပညာ
မဂ်ပညာသည် အကောင်းဆုံးပညာဖြစ်သည်။ အခြားပညာများသည် အကျိုးတစ်ခုသာ ပြုမြဲဖြစ်သည်။ သံသရာမှ အပြီးအပြတ် လွတ်မြောက်ခြင်းကို မပေးနိုင်။ သံသရာမှ လွတ်မြောက်ကြောင်းကို မဂ်ဉာဏ်၊ ဖိုလ်ဉာဏ်ရှိမှသာ ဆောင်ရွက်နိုင်သည်။ ထို့ကြောင့် မဂ်တရား၊ ဖိုလ်တရားတို့ကို ရရှိစေနိုင်သော ၀ိပဿနာပညာ၏ ပန်းတိုင်ဖြစ်သော မဂ်ပညာသည်သာ အကောင်းဆုံးပညာ ဖြစ်သည်။
အကောင်းဆုံးလက်နက်
မေတ္တာတရားသည် အကောင်းဆုံးလက်နက်ဖြစ်သည်။ မေတ္တာသည် ရန်အောင်ကြောင်း တရားတို့အနက် အကောင်းဆုံးဖြစ်သည်။ ရှင်တော်မြတ်ဘုရားသည် အောင်မြင်ရန်ခက်ခဲသော ရန်မှန်သမျှကို မေတ္တာဖြင့်သာ အောင်မြင့်ခဲ့သည်သာတည်း။ မေတ္တာ၏သဘောသည် ခွင့်လွှတ်ခြင်းနှင့် အကျိုးလိုလားခြင်း ဖြစ်သည်။ ပင်ကိုယ်သဘာဝ ဖြူစင်ခြင်း၊ သန့်ရှင်းကြည်လင်ခြင်း ဓာတ်သဘာဝရှိသည်။ မေတ္တာထားလျှင် ရန်ဟူသမျှ မရှိနိုင်တော့။ ရန်မရှိမှ ရန်အောင်မြင်ရန် မလိုတော့။ ထို့ကြောင့် မေတ္တာလက်နက်ကို သုံးခြင်းသည် သေချာသော ရန်အောင်မြင်မှုသာတည်း။
အကောင်းဆုံးဆရာ
အတွေ့အကြုံသည် အကောင်းဆုံးဆရာဖြစ်သည်။ လက်တွေ့သိအပ်သော ဆင်ခြင်သုံးသပ်အပ်သော ရရှိထားသည့် ကြိမ်ဖန်များစွာ အတွေ့အကြုံသည် ဆောင်ရွက်ရန်ရှိသော လုပ်ငန်းများကို အကောင်းဆုံး လမ်းညွှန်မှုပေးနိုင်မည်သာ။ ထို့ကြောင့် စမ်းသပ်လုပ်ဆောင်ကြည့်ခြင်း၊ ဆင်ခြင်သုံးသပ် တွေးခေါ်ကြံဆခြင်းတို့ တိုးပွားအောင် ဆောင်ရွက်ခြင်းဖြင့် အတွေ့အကြုံကောင်းများ ရလာနိုင်သည်။ ထို့ပြင် အလုပ်မှန်သမျှ တတ်ကျွမ်းရန် လေ့ကျင့်ရမြဲဖြစ်သည်။ လေ့ကျင့်မှုများလေလေ ကျွမ်းကျင်မှု ရှိလာလေလေသာတည်း။ ထို့ကြောင့် အတွေ့အကြုံကောင်းများ ရရှိနိုင်ရန် လေ့ကျင့်မှု လိုအပ်ပါသည်။
အကောင်းဆုံးဆုလာဘ်
ကျန်းမာခြင်းသည် အကောင်းဆုံးဆုလာဘ် ဖြစ်သည်။ ကျန်းမာမှသာ ကာယသုခ ဖြစ်စေနိုင်သည်။ ကာယသုခမှသည် စိတ္တသုခသို့ ကူးစက်စေမည် ဖြစ်သည်။ မကျန်းမာဘဲ သုခမဖြစ်နိုင်ပါ။ ကျန်းမာမှသာ ကိုယ်စိတ်နှစ်ပါး ချမ်းသာခြင်းကို ရရှိနိုင်သောကြောင့် ကျန်းမာခြင်းသည် အကောင်းဆုံးဆုလာဘ် ဖြစ်ပေသည်။
အကောင်းဆုံးသမားတော်
ကိုယ်တိုင်ဖြစ်သည်။ "ကိုယ့်ဝမ်းနာ ကိုယ်သာသိ" ဟု ဆိုရိုးရှိသည့်အတိုင်း ကိုယ့်ဝေဒနာ ကိုယ်ခံစားရမှုကို ကိုယ်တိုင်အသိဆုံး ဖြစ်သည်။ ထို့ကြောင့် စဖြစ်ချိန်မှစ၍ ချက်ချင်းလိုအပ်သလို ကုစားမည်ဆိုပါက ရောဂါရင့်ခြင်း၊ ပြင်းထန်ခြင်းများ မဖြစ်စေနိုင်။ ထို့ပြင် ကံ၊ စိတ်၊ ဥတု၊ အာဟာရ သင့်တော်အောင် စီမံပေးရမည့်သူမှာလည်း ကိုယ်တိုင်ပင် ဖြစ်သည်။ ကိုယ်တိုင် ကျန်းမာရေးအတွက် ဆောင်ခြင်း၊ ရှောင်ခြင်းများ ပြုလုပ်ရမည် ဖြစ်သည်။ ထို့ကြောင့် မိမိ၏ တစ်ကိုယ်ရည်ကျန်းမာရေးကို အကောင်းဆုံး သမားတော်ဖြစ်သည့် ကိုယ်တိုင်စောင့်ရှောက်ခြင်းသည် အကောင်းဆုံးဖြစ်သည်။
အကောင်းဆုံးအလုပ်
ဝါသနာထုံ၍ စေတနာကြီးစွာဖြင့် စူးစူးစိုက်စိုက် လုပ်ဆောင်သော အလုပ်သည် သင့်အတွက် အကောင်းဆုံးအလုပ်တည်း။ ထိုလုပ်ဆောင်မှုသည် အောင်မြင်မှုနှင့် နီးသလို အကျိုးပေးသန်မှာလည်း သေချာလှပေသည်။ စူးစိုက်ခြင်းသည် ဈာန်သဘော၊ စေတနာသည် ကံ၏ အရင်းခံ၊ ၀ါသနာသည် အထုံဗီဇဖြစ်သည်။ ထိုအခြင်းအရာများ ပေါင်းစပ်သော လုပ်ဆောင်မှုသည် အကောင်းဆုံး လုပ်ဆောင်မှုဖြစ်သည်။
အကောင်းဆုံးပီတိ
ဥဒါန်းကျူးရင့်အပ်သော မိမိလိုလားရာပန်းတိုင်ကို ကြိုးစား၍ ရယူအောင်မြင်ချိန်သည် အကောင်းဆုံးပီတိကို ရရှိနိုင်သော အချိန်သာတည်း။ သတ္တ၀ါမှန်လျှင် လိုအင်ဆန္ဒရှိမြဲဖြစ်သည်။ အဓိပတိဖြစ်လိုသော ဆန္ဒ၊ အဓိပတိ ဖြစ်လိုသောစိတ်တို့ ဦးဆောင်သော ကောင်းစွာကြိုးပမ်းခြင်း ၀ီရိယဖြင့် အတွေ့အကြုံမှပေးသော ပညာတို့ဖြင့် အဓိပတိဖြစ်၍ ထောက်ပံ့မှု အားကောင်းချိန်တွင် လိုလားရာပန်းတိုင်ကို ရောက်ရှိနိုင်ပေသည်။ ထိုအချိန်သည် ရည်မှန်းရာ အမြင့်ဆုံးတောင်ထွဋ်ကို ရောက်ချိန်သာတည်း။ ကြိုးပမ်းမှုအတွက် အကောင်းဆုံးရလဒ်ကို ရရှိချိန်ပင်တည်း။ ထိုအချိန်တွင် သင်သည် အကြီးမားဆုံး၊ အကောင်းဆုံး အောင်မြင်ပြီဟု ဥဒါန်းကျူးရင့်မိမည့် အချိန်သာတည်း။ ထိုအချိန်တွင် သင်သည် ၀မ်းမြောက်ဝမ်းသာမှုအတွက် ကြီးစွာသောပီတိကို ရရှိခံစားရမည်သာတည်း။
အကောင်းဆုံးများ ပိုင်ဆိုင်နိုင်ရန် အကောင်းဆုံးကြိုးစားမှုများ ဖြစ်လာနိုင်ကြပါစေ။
အတွဲ (၆) အမှတ် (၂၄)
စာမျက်နှာ - ၃၄
No comments:
Post a Comment