ဆန်ကုန်မြေလေး
အလုပ်နှင့် တည်ဆောက်ထားသော ဤကမ္ဘာမြေကြီးသည် အလုပ်မလုပ်သူနှင့် လုံးဝ မထိုက်တန်ပေ။ ဆန်ကုန်မြေလေးသာ ဖြစ်ချေတော့မည်။ ထိုသူကို လူစာရင်း မသွင်းသင့်ပါ။
နှမြောစရာကောင်းသောအချိန်
အချိန်တွေ မကုန်စေနှင့်။ ၀တ်လို့ အချိန်ကုန်၊ စားလို့ အချိန်ကုန်၊ ပျင်းလို့ အချိန်ကုန်၊ အဲဒီလို မဖြစ်စေနဲ့။ ကံကောင်းထောက်မလို့ လူ့ပြည်ရောက်တာ၊ ကုသိုလ်မဖြစ်ဘဲ အချိန်ကုန်သွားရင် ပြီးပါရောဗျာ။ အချိန်ဆိုတာ စိစစ်ယူရတယ်။ ယနေ့ ငါ့မှာ ဘာကုသိုလ် ဖြစ်သလဲ။ မဖြစ်သေးရင် ဖြစ်အောင်လုပ်။ အရှုံးမခံနှင့်။ ကနေ့ နက်ဖြန် ပြန်မဖြစ်တော့ဘူး။ နင်တို့ မသိလို့။ အင်မတန်မှ နှမြောစရာကောင်းတယ်။
ရိုးသား၍ ကြိုးစားသော်
လောကတွင် ရိုးသားသောစိတ်၊ ဖြောင့်မတ်စိတ်၊ တည်ငြိမ်စိတ်ကို အဓိကပင်တိုင် ထားရမည်။ ထိုစိတ်ကို ပုံမှန်ထား၍ ကံ၊ ဉာဏ်၊ ၀ီရိယစွမ်းအင်ကို အခြေအနေအလျောက် အရင်းတည်ပြီး မနေမနား ကြိုးစားနေလေ့ရှိသူများသည် ထန်းပင်၊ ပေပင်ကြီးများကဲ့သို့ အစဉ်တိုးတက်နေကြသည်။ မရိုးသားသူများအပေါ် ကျော်တက်သွားကြသည်။ ရိုးသားဖြောင့်မတ်သူများသည် မဖြောင့်မတ်သူများကို နောက်ချန်ထားခဲ့ကြမြဲဖြစ်၏။
အပြစ်မရှာပါနှင့်
တစ်ဦးနှင့်တစ်ဦး အပြစ်မရှာပါနှင့်။ အပြစ်မပြောပါနှင့်။ မပုတ်ခတ်မိပါစေနှင့်။ နှုတ်စောင့်စည်းပါ။ အထူးသတိပြု၍ ရှောင်ကြဉ်ပါ။ တစ်ဦးနှင့်တစ်ဦး အပြစ်ရှာကြမယ်ဆိုရင် သူ့မှာ အပြစ်ရှိနေသလို ကိုယ့်မှာလည်း အပြစ်ရှိနေဦးမှာပဲ။ ပုထုဇဉ်ပုဂ္ဂိုလ်မှန်က အနည်းနှင့်အများ ဘယ်ပုဂ္ဂိုလ်မှ အပြစ်မကင်းနိုင်ကြပေ။
မုသားကင်းပါစေ
ဒကာလေးတို့က မုသားပါမှ စကားချောပြီး ရောင်းရမယ်၊ စီးပွားဖြစ်မယ် ထင်နေတာကိုး။ အေးလေ - ဒါလည်း လူငယ်ဆိုတော့ မသိရှာဘူးပေါ့။ ဒကာလေးရေ စွဲစွဲမြဲမြဲ မှတ်ထားပါ။ ခန္ဓာမွေးတော့ မြေစာကျွေးဖို့၊ ဥစ္စာစုက ထိုက်သူယူဖို့တဲ့။ စီးပွားဥစ္စာဆိုတာ ကိုယ်က ဘယ်လောက်ရှာရှာ ထိုက်တဲ့သူ စံသွားမှာပဲ။ စီးပွားတက်မှု၊ မတက်မှုဆိုတာကလည်း ကံအတိုင်းပဲ။ စီးပွားရှိသည်ဖြစ်စေ၊ မရှိသည်ဖြစ်စေ သေရင် စွန့်ပစ်ခဲ့ရမှာပဲ။ ဘာမှ ကိုယ့်နောက်ပါမှာ မဟုတ်ဘူး။ ကိုယ့်နောက် မပါတာချင်းအတူတူ ဘာဖြစ်လို့ မုသာဝါဒ အကုသိုလ်တွေကို အပိုယူသွားချင်ရတာလဲ။ ဒီတော့ ဒကာလေးတို့ ဘုန်းကြီးဆီကိုလာတာ ခဏအလည်လာကြသလို သံသရာခရီးထွက်ရင်လည်း ဒကာလေးတို့က လူ့လောကကြီးက ခဏလေး အလည်သဘော လာကြတာပဲ။ ဒီတော့ အကုသိုလ်၊ ဒုစရိုက် ကင်းကင်းရှင်းရှင်းလေးနဲ့ အလည်လာကြရင် မကောင်းဘူးလား။
ပြဿဒါးဟူသည်
"ပြဿဒါးနေ့မှာ ထန်းလျက်ခဲကိုစားရင် မချိုဘူးလား"
"ချိုပါတယ် ဘုရား"
"ကုသိုလ်လုပ်ရင် ကုသိုလ် မဖြစ်ဘူးလား"
"ဖြစ်ပါတယ် ဘုရား"
"ကုသိုလ်ကံသည် အကျိုးပေးခွင့်ရသော်လည်း ပြဿဒါးနေ့မှာ အကျိုးမပေးသေးဘဲ ဆိုင်းငံ့နေတယ်လို့ ဘုရားဟောပါသလား"
"မဟောပါ ဘုရား"
"ဒီလိုဆိုရင် ကံကောင်းထောက်ပံ့နေသောသူသည် ပြဿဒါးနေ့မှာ အိမ်တိုင်ထူခြင်းကြောင့် မကောင်းကျိုးကို ရဦးမှာလား"
"မရပါ ဘုရား"
"ကြောက်စရာမဟုတ်၊ အကုသိုလ်ကိုသာ ကြောက်ရမယ် မဟုတ်လား"
"မှန်ပါ့ ဘုရား"
"ဒီလိုဆိုရင် ပြဿဒါးနေ့က ကြောက်စရာမဟုတ်၊ အကုသိုလ်ကိုသာ ကြောက်ရမယ် မဟုတ်လား။ အဲဒါကြောင့် အကုသိုလ်ကို မကြောက်ဘဲ ပြဿဒါးကိုကြောက်လျှင် ဗြဟ္မဏဘာသာ။ ပြဿဒါးကိုမကြောက် အကုသိုလ်ကိုကြောက်မှ ဗုဒ္ဓဘာသာလို့ မှတ်ကွဲ့"
စာမှာရှိသော အလိမ္မာကို လူတို့ထံပို့ဆောင်ပါ
အလိမ္မာ စာမှာရှိသည် ဆိုသည့်အတိုင်း စာမှာရှိသော အလိမ္မာကို လူတို့ထံရောက်အောင် ဆောင်ရွက်ပေးနိုင်လျှင် လူလိမ္မာ၊ ရဟန်းလိမ္မာတို့ ဖြစ်ကြ၍ ၎င်းတို့သည် သာသနာတော် သန့်ရှင်းတည်တံ့ ပြန့်ပွားရေးအတွက် တန်ဖိုးမဖြတ်နိုင်သော ရတနာများ ဖြစ်ကြပါသည်။
No comments:
Post a Comment