ကာလအတန်ကြာ ရပ်နားထားခဲ့တဲ့ ၂၀၁၀-၂၀၁၁ အင်္ဂလန်အမှတ်ပေးဖလား ပရီမီးယားလိဂ်ပြိုင်ပွဲတွေ မကြာခင်မှာ စတင်တော့မှာ ဖြစ်ပါတယ်။ အဲဒီလို မစတင်ခင်မှာ တစ်ကမ္ဘာလုံးက ဘောလုံးပရိသတ်တွေအတွက် စိတ်ဝင်တစားနဲ့ စောင့်ကြည့်ခဲ့ရတဲ့ ပြိုင်ပွဲတစ်ခု ရှိနေပါတယ်။ ပရီမီးယားလိဂ်ရာသီအကြို ပြိုင်ပွဲလို့တောင် ခေါ်ဝေါ်တတ်ကြပါတယ်။ အခြားမဟုတ်ပါဘူး၊ ကွန်မြူနတီဒိုင်းလို့ ခေါ်တဲ့ ရန်ပုံငွေပြိုင်ပွဲတစ်ခု ဖြစ်ပါတယ်။ အဲဒီပွဲစဉ်က ရသမျှဝင်ငွေတွေကို ဆုကြေးပေးအပ်ခြင်းမရှိဘဲ အခြားသော လူမှုရေးအဖွဲ့အစည်းတွေကို လှူဒါန်းမှုတွေ ပြုလုပ်လေ့ရှိပါတယ်။ ဒါကြောင့်မို့ ယခင်ကဆိုရင် ချာရတီဒိုင်းလို့တောင် နာမည်ခေါ်တွင်ခဲ့ကြပါတယ်။ ပြိုင်ပွဲအသွင်ထက် ချစ်ကြည်ရေးရန်ပုံငွေပွဲသဘောမျိုး ပိုဆန်တယ်လို့ ဆိုနိုင်ပါတယ်။ ဒါပေမယ့်လည်း ယှဉ်ပြိုင်ကစားကြတဲ့ အသင်းတွေဟာ ရာသီသစ်အဖွင့်မှာ စိတ်ဓာတ်မြှင့်တင်လိုတဲ့စိတ်၊ အနိုင်ရလဒ်နဲ့ အဖွင့်ကောင်းချင်တဲ့စိတ်တွေကြောင့် ပြိုင်ဆိုင်မှုပြင်းထန်ပြီး ကြည့်ကောင်းလေ့ရှိပါတယ်။ ယှဉ်ပြိုင်ကစားရတဲ့ အသင်းတွေကလည်း ပြီးခဲ့တဲ့နှစ် အမှတ်ပေးချန်ပီယံနဲ့ အက်ဖ်အေဖလား ချန်ပီယံအသင်းတွေ ဖြစ်ကြလေတော့ အသင်းကြီးအချင်းချင်းသာ တွေ့ဆုံကြလေ့ရှိပါတယ်။ တစ်ခါတလေမှသာ အက်ဖ်အေဖလားကို ကြားဖောက်ပြီးရတတ်တဲ့ အသင်းငယ်တစ်ချို့နဲ့ အသင်းကြီးတွေ ဆုံတွေ့တာမျိုး ဖြစ်တတ်ပါတယ်။ အခုနောက်ပိုင်းကတော့ မန်ယူ၊ ချဲလ်ဆီး၊ အာဆင်နယ်၊ လီဗာပူးလ် စတဲ့ အသင်းကြီးတွေထဲက အနည်းဆုံးတစ်သင်းတော့ ယှဉ်ပြိုင်ကစားနေရတာမို့ ပရိသတ်တွေအဖို့ စိတ်ဝင်စားစရာ ဖြစ်နေခဲ့တာပါ။
၂၀၁၀ ပြည့်နှစ်ရဲ့ ကွန်မြူနတီဒိုင်းမှာ ဆုံတွေ့ကြတဲ့ အသင်းနှစ်သင်းကတော့ မနှစ်ကတစ်နှစ်လုံး ပြိုင်ဆိုင်မှုပြင်းထန်ခဲ့တဲ့ ချဲလ်ဆီးနဲ့ မန်ယူတို့ ဖြစ်ကြပါတယ်။ ဘယ်အသင်းမှ မရဖူးသေးတဲ့ စံချိန်ဖြစ်တဲ့ လေးနှစ်ဆက် အမှတ်ပေးချန်ပီယံဘွဲ့အပြင် အင်္ဂလန်နိုင်ငံမှာ အအောင်မြင်ဆုံးကလပ်ဆိုတဲ့ ဂုဏ်ပုဒ်ကိုပါ ရယူဖို့အတွက် လက်တစ်ကမ်းအလိုကို ရောက်ခဲ့ပြီးကာမှ ချဲလ်ဆီးရဲ့ အလဲထိုးခြင်းကို ခံခဲ့ရတဲ့ မန်ယူအသင်းအတွက် ယခုလိုပြိုင်ပွဲမှာ လာရောက်ဆုံတွေ့နေတဲ့ ချဲလ်ဆီးအသင်းဟာ ခါးသီးတဲ့ပြိုင်ဘက် ဖြစ်နေပါတယ်။ ဒါကြောင့်လည်း တစ်ကမ္ဘာလုံးက ပရိသတ်တွေအတွက် ပိုမိုစိတ်ဝင်စားစရာ ဖြစ်ခဲ့ရတာပါ။ မန်ချက်က ဘယ်လိုနှက်မလဲ ဆိုတဲ့လူတွေနဲ့ ချဲလ်ဆီးက ဘယ်လိုတီးမလဲဆိုတာကို စိတ်ဝင်စားသူတွေရဲ့ ပါးစပ်တိုက်ပွဲတွေက ပွဲမစခင်ကတည်းက ပြင်းထန်နေခဲ့ပါတယ်။ နှစ်သင်းလုံးဟာ ကြီးကြီးမားမား အပြောင်းအလဲ ပြုလုပ်ထားတာမျိုး မရှိခဲ့ဘဲ ယမန်နှစ်က အဓိက ကစားသမားတွေကိုပဲ အားပြုကစားမှာဖြစ်တာကြောင့် ကြည့်ကောင်းမယ့်ပွဲလို့ ခန့်မှန်းခဲ့ကြပါတယ်။
မန်ယူအသင်း လူစာရင်း
(ဂိုး) ဗန်ဒါဆား၊ (နောက်တန်း) ဗီဒစ်၊ အိုရှေးလ်၊ ဖာဘီယို၊ အီဗန်၊ (အလယ်တန်း) ပေါစခိုးလ်၊ ကားရစ်၊ ပက်ဂျီဆန်၊ ဗလင်စီယာ၊ (ရှေ့တန်း) အိုဝင်၊ ရွန်းနီ။
(အရံ) ကုဇက်၊ ဂစ်၊ ဟာနန်ဒက်ဇ်၊ ဘာဘာတော့ဗ်၊ စမောလင်း၊ ဖလက်ချာ၊ နာနီ။
ချဲလ်ဆီးအသင်း လူစာရင်း
(ဂိုး) ဟီလာရီယို၊ (နောက်တန်း) တယ်ရီ၊ အက်ရ်ှလေကိုး၊ ဖာရဲယား၊ အီဗန်နိုဗစ်၊ (အလယ်တန်း) လမ်းပတ်၊ အက်ဆီယန်၊ မီခေးလ်၊ (ရှေ့တန်း) အနယ်လ်ကာ၊ ကာလူး၊ မာလူဒါ။
(အရံ) တန်ဘူးလ်၊ ဘီနာယောင်၊ ဒရော့ဘာ၊ ဇာကော့ဗ်၊ ဘရူးမား၊ စတားရစ်ခ်ျ၊ ဗန်အန်းဟော့လ်တ်။
ပွဲစပြီး ၁၀ မိနစ်လောက်အထိ ချဲလ်ဆီးအသင်းက အပေးအယူမိမိနဲ့ ပွဲကိုစိုးမိုးထားနိုင်ခဲ့ပါတယ်။ ဒါပေမယ့် နောက်ပိုင်းမှာ အလယ်တန်းက ပေါစခိုးလ်နဲ့ ကားရစ်အတွဲအဖက် မိသွားတဲ့အတွက် မန်ယူအသင်းကပဲ ဘောလုံးပိုင်ဆိုင်မှုအသာနဲ့ ကစားလာနိုင်ခဲ့ပါတယ်။ ချဲလ်ဆီးကွင်းလယ်က အက်ဆီယန် ခြေပေါ်ခဲ့ပေမယ့် လမ်းပတ်နဲ့ မီခေးလ်က အလုပ်မဖြစ်ခဲ့တဲ့အတွက် အလယ်တန်းကစားကွက် အသာစီး မရခဲ့တာပါ။ မန်ယူအသင်းကတော့ ပေါစခိုးလ် ခြေစွမ်းပြပြီး ကွင်းလယ်ကို ထိန်းကျောင်းသွားနိုင်ခဲ့ပါတယ်။ ရွန်းနီကလည်း အလယ်တန်းအထိ ဆင်းကူပေးခဲ့လို့ ချဲလ်ဆီးတို့ ဘောလုံးရဖို့ ခက်ခဲခဲ့ရပါတယ်။ မန်ယူရှေ့တန်းက အိုဝင်နဲ့ ညာနောက်ခံလူ အိုရှေးလ်တို့ကတော့ ဒီနေ့ပွဲမှာ အညံ့ဆုံးလို့တောင် ဆိုရမယ်ထင်ပါတယ်။ အိုဝင်ကလည်း ပြန်နာမှာကြောက်ပြီး မတိုးရဲသလို အရင်ကလို လျင်မြန်မှုတွေလည်း မတွေ့ရတော့ပါဘူး ငှက်မြန်လေးမဟုတ်ဘဲ လဒအိုကြီး ဖြစ်နေသလိုပါပဲ။ အိုရှေးလ်ကလည်း မလိုအပ်ဘဲ ရှေ့တန်းကို အလွန်အကျွံလိုက်ပါမှုကြောင့် သူ့ဘက်ခြမ်းကနေ မကြာခဏ ပေါက်ထွက်နေခဲ့ပါတယ်။ မာလူဒါ၊ အနယ်လ်ကာနဲ့ ကာလူးတို့ ညံ့လွန်းလို့သာ ဂိုးစောစောစီးစီး မပေးရတာပါ။
မန်ယူဘယ်နောက်ခံကနေ ၀င်ကစားတဲ့ ဖေဘီယိုဟာ အများကြီးတိုးတက်လာတာကို တွေ့ရပါတယ်။ ရင့်ကျက်မှုပိုင်း လိုအပ်နေသေးပေမယ့် သူ့တာဝန်ကိုတော့ သူကျေပွန်အောင် ကစားပြနိုင်ခဲ့ပါတယ်။ ဒီနေ့ပွဲအတွက် ပြောစရာဖြစ်ခဲ့တာက သက်ကြီးဂိုးသမား ဗန်ဒါဆားနဲ့ ပေါစခိုးလ်တို့ရဲ့ ငယ်ခြေ၊ ငယ်လက်တွေ ပြန်ရနေတာပါပဲ။ မထင်မှတ်တဲ့ ပေးပို့မှုတွေ ဖြတ်တင်ဘောတွေကို ပေါစခိုးလ် လုပ်ပြခဲ့သလို ဗန်ဒါဆားကလည်း သေချာပေါက်ဂိုးတွေကို အံ့သြဖွယ် ကာကွယ်ပြနိုင်ခဲ့ပါတယ်။ ချဲလ်ဆီးအသင်းက အက်ဆီယန် ခြေစွမ်းပြနိုင်ခဲ့ပြီး လမ်းပတ်ကတော့ ယုံကြည်မှု ပျောက်ဆုံးနေခဲ့ပုံ ပေါ်နေခဲ့ပါတယ်။ အနယ်လ်ကာ လေးနေခဲ့ပြီး မာလူဒါကလည်း အံ့သြဖွယ်ရာ ပေးပို့မှုတွေ မပြုလုပ်ပေးနိုင်ခဲ့ပါဘူး။ ချဲလ်ဆီးအသင်းအတွက် အဓိကအားနည်းချက်ကတော့ ဘောလက်အစား အလယ်တန်းအဖျက်နေရာမှာ လူမဖြည့်နိုင်တာနဲ့ နောက်တန်းနဲ့ ဂိုးသမားတို့ အားနည်းနေတာပါပဲ။ တယ်ရီတစ်ယောက်တည်း ထိန်းနေရတဲ့ နောက်တန်းဟာ တိုက်စစ်အသားပေးတဲ့ အသင်းတွေနဲ့ဆိုရင် မလွဲမသွေ ဂိုးပေးရမှာ အသေအချာပါပဲ။ ပီတာဆက်ခ်ျမရှိတဲ့ ဂိုးပေါက်ကြောင့် နောက်တန်းတွေအနေနဲ့ စိုးရိမ်စိတ်များပြီး ဖိအားဝင်နေခဲ့ပုံ ရပါတယ်။
ဒီနေ့ပွဲမှာ ပရိသတ်တွေက ရွန်းနီ၊ လမ်းပတ်၊ တယ်ရီ၊ အက်ရ်ှလေကိုးတို့ ဘောလုံးရတိုင်း ဘူးမှုတ်ပြီး အော်ဟစ်လှောင်ပြောင်ခဲ့ကြပါတယ်။ ကမ္ဘာ့ဖလားမှာ ခြေစွမ်းမပြနိုင်ဘဲ အင်္ဂလန်အသင်း မရှုမလှ ရှုံးနိမ့်ခဲ့ရတဲ့ အကျိုးဆက်တစ်ခု ဖြစ်ပါတယ်။
မန်ယူအတွက် အဖွင့်ဂိုးကိုတော့ ပေါစခိုးလ်ရဲ့ တိကျတဲ့ ပေးပို့မှု၊ ရွန်းနီရဲ့ မခိုမကပ်ကြိုးစားမှုနဲ့ အကွက်မြင်မြင်နဲ့ အမှတ်မထင် ချပေးလိုက်တာကို အလိုက်သင့်ပြေးလာတဲ့ တောင်ပံကစားသမား ဗလန်စီယာက အသာအယာ ပိတ်သွင်းယူသွားခဲ့တာပါ။ ရွန်းနီရဲ့ ပေးပို့မှုဟာ ဘယ်လိုမှ ထင်မှတ်မထားတဲ့ အနေအထားကနေ ပြုလုပ်သွားခဲ့တာ ဖြစ်ပါတယ်။ ပထမပိုင်းမှာ မန်ယူအသင်းက တစ်ဂိုးအသာနဲ့ အနိုင်ရနေခဲ့ပါတယ်။
ဒုတိယပိုင်းအစမှာတော့ ဖာဂူဆန်ဟာ တစ်ပြိုင်နက်တည်း သုံးယောက်တွဲ လူစားလဲမှုတစ်ခုကို ပြုလုပ်ခဲ့ပါတယ်။ ခြေမပေါ်တဲ့ အိုဝင်၊ ခြေစမ်းပွဲကန်ရဦးမယ့် ရွန်းနီနဲ့ ခြေစွမ်းမပြနိုင်တဲ့ ပက်ဂျီဆန်တို့ကို ထုတ်ပြီးတဲ့နောက် ဟာနန်ဒက်ဇ်၊ ဘာဘာတော့ဗ်နဲ့ နာနီတို့ကို ထည့်သွင်းခဲ့ပါတယ်။ ဖာဂူဆန်ရဲ့လုပ်ရပ် မှန်ကန်ခဲ့တယ်လို့ ဆိုရမှာပါပဲ။ မန်ယူအသင်းရဲ့ တိုက်စစ်ကစားပုံ ပိုမိုကောင်းမွန်လာခဲ့ပြီး ကစားကွက်လည်း မြိုင်လာခဲ့ပါတယ်။ ချဲလ်ဆီးအသင်းကလည်း ဒုတိယပိုင်းမှာ အနယ်လ်ကာ၊ မီးခေးလ်၊ မာလူဒါ စတဲ့ကစားသမားတွေကို ထုတ်ပြီး ဒရော့ဘာ၊ စတားရစ်ခ်ျ၊ ဘီနာယောင်နဲ့ ဇာကော့ဗ်တို့ကိုထည့်ပြီး တိုက်စစ်မြှင့်ခဲ့ပါတယ်။
လူစားလဲမှုတွေ ပြုလုပ်ပြီးတဲ့နောက်မှာ နှစ်သင်းစလုံးရဲ့ ကစားကွက်ဟာ ပထမပိုင်းကထက် ပိုကောင်းလာခဲ့တာကို တွေ့ရပါတယ်။ ချဲလ်ဆီးအသင်းကလည်း ချေပဂိုးရဖို့အတွက် ဂိုးပေါက်ကို အကြိမ်ကြိမ်ခြိမ်းခြောက်ခဲ့ပေမယ့် ဗန်ဒါဆား လက်စွမ်းပြနေတာကြောင့် ထင်တိုင်းမပေါက် ဖြစ်ခဲ့ရပါတယ်။ နှစ်ဖက်အသင်းက နောက်ဝင်လာတဲ့ လူငယ်ကစားသမားတွေဖြစ်တဲ့ မန်ယူရဲ့ ဟာနန်ဒက်ဇ်နဲ့ ချဲလ်ဆီးရဲ့ စတားရစ်ခ်ျတို့ရဲ့ ကစားပုံဟာ အထင်ကြီးစရာပါ။ သူတို့တွေရဲ့ တိုးအား၊ လှုပ်အား၊ ကြိုးစားမှုတွေကြောင့် ပွဲဟာအတော်လေးကို အသက်ဝင်ခဲ့ပါတယ်။
မန်ယူအတွက် ဒုတိယဂိုးကိုတော့ ညာတောင်ပံက ဗလန်စီယာရဲ့ ချိန်သားကိုက် ပေးပို့မှုကနေတစ်ဆင့် ဟာနန်ဒက်ဇ်က အပြင်းကန်သွင်းပြီး ရယူသွားခဲ့ပါတယ်။ ဂိုးသမားရဲ့ ညာဖက်ထောင့်ကို အပြင်းကန်သွင်းခဲ့ပေမယ့် ဘောလုံးဟာ မျက်နှာကိုလာမှန်ပြီး ဂိုးသမားရဲ့ ဘယ်ဖက်ထောင့်ကို ၀င်သွားခဲ့တာဖြစ်ပါတယ်။ ဘယ်လိုပဲဖြစ်ဖြစ် ဂိုးဝင်မှာဖြစ်ပေမယ့် ခြေထောက်နဲ့ကန်တဲ့ ဘောလုံးဟာ မျက်နှာကိုမှန်ပြီး ၀င်သွားတဲ့အတွက် ဟာသအဖြစ် ပြောစရာကျန်ရစ်ခဲ့ပါတယ်။ မန်ယူအသင်းသားတွေဟာ ဟာနန်ဒက်ဇ်အပေါ် နွေးထွေးစွာနဲ့ အရေးပေးတာကို တွေ့ရပါတယ်။
ချဲလ်ဆီးရဲ့ ချေပဂိုးကိုတော့ စတားရစ်ခ်ျရဲ့ ကြိုးစားအားထုတ်မှုကြောင့် ပြန်ထွက်လာတဲ့ဘောလုံးကို ကာလူးက ချိန်သားကိုက်သွင်းယူပြီး ရယူခဲ့တာပါ။ ဒီဂိုးဟာ မန်ယူနောက်ခံညာအစွန်လူ အိုရှေးလ်ရဲ့ လူကပ်ကစားပုံ ပေါ့လျော့မှုနဲ့ မကျွမ်းကျင်မှုကြောင့် ပေးလိုက်ရတာ ဖြစ်ပါတယ်။ စတားရစ်ခ်ျရဲ့ ဧရိယာထိပ်က အပြင်းကန်သွင်းချက်ကို ဗန်ဒါဆား ပုတ်ထုတ်ကာကွယ်ခဲ့ပေမယ့်လည်း ပြန်ထွက်လာတဲ့ ဘောလုံးကို ထပ်မံဖျက်ထုတ်ဖို့အတွက် မန်ယူနောက်ခံလူတွေ ရှိမနေခဲ့ဘဲ ကန်သွင်းယူမယ့် ကာလူးကပဲ လွတ်လွတ်ကျွတ်ကျွတ် သွင်းယူသွားခဲ့တာပါ။
ချဲလ်ဆီးရဲ့ ချေပဂိုးဟာ ပွဲအပေါ်မှာ အများကြီးသက်ရောက်သွားခဲ့ပါတယ်။ ချေပဂိုးရသွားတဲ့အတွက် ချဲလ်ဆီးအသင်းဟာ တင်ကစားလာခဲ့ပါတယ်။ နောက်ထပ်ချေပဂိုးတစ်ဂိုး ရရုံနဲ့တင် ပင်နယ်တီကန်သွင်းကြရမှာမို့ နောက်ဆုံးမိနစ်တွေမှာ အသည်းအသန် အားထည့်ခဲ့ကြပါတယ်။ မန်ယူနောက်တန်းနဲ့ အလယ်တန်းကစားသမားတွေရဲ့ ဖျက်ထုတ်ရှင်းလင်းမှုတွေကြောင့်သာ ချေပဂိုးပြန်မပေးခဲ့ရတာ ဖြစ်ပါတယ်။
မန်ယူအတွက် အနိုင်သေချာစေမယ့် အနိုင်ဂိုးကိုတော့ ထပ်ဆောင်းအချိန်ပို ၂ မိနစ်ခန့်မှာ ဘာဘာတော့ဗ်က သူ့ရဲ့ကျွမ်းကျင်မှုကို အသုံးချပြီး လှလှပပ သွင်းယူသွားခဲ့တာပါ။ နာနီရဲ့ မထင်မှတ်တဲ့ ပေးပို့မှုကို တစ်ချက်ထိန်းပြီး ရှေ့ထွက်နေတဲ့ ဂိုးသမားကိုကျော်ပြီး အသာအယာ ပိတ်သွင်းယူသွားပုံက ပရိသတ်တွေအတွက် တသသဖြစ်ပြီး ကျန်ရစ်ခဲ့စေပါတယ်။ အဲဒီဂိုးဟာ ချဲလ်ဆီးရဲ့ စိတ်ဓာတ်ကို ရိုက်ချိုးလိုက်ရုံတင်မဟုတ်ဘဲ ပွဲအခြေအနေကိုပါ ငြိမ်သက်သွားစေခဲ့ပါတယ်။ ရလဒ်ပိုင်း အပြောင်းအလဲ မရှိနိုင်တော့တဲ့အတွက် နှစ်သင်းစလုံးဟာ လက်ကျန်မိနစ်ကို ထိန်းကစားပြီး ပွဲပြီးဆုံးစေခဲ့ပါတယ်။
ဒီနေ့ပွဲမှာ ထူးထူးခြားခြားအဖြစ် နှစ်သင်းစလုံးဟာ အတင်းဝင်၊ အတင်းဖျက် ခပ်ကြမ်းကြမ်း ကစားခဲ့တာမျိုး မရှိခဲ့ဘဲ ထိန်းထိန်းသိမ်းသိမ်းနဲ့ ကစားသွားတာပါပဲ။ ဒီနှစ်သင်းတွေ့တိုင်း ပြိုင်ဆိုင်မှုပြင်းထန်ပြီး ခပ်ကြမ်းကြမ်းကစားလေ့ရှိပေမယ့် ဒီနေ့ပွဲမှာ ကစားသွားပုံကိုတော့ ချီးကျူးရပါလိမ့်မယ်။ ရာသီသစ်အစမှာ ဒဏ်ရာအနာတရကြောင့် အဖွင့်ပွဲစဉ်တွေနဲ့ မလွဲချော်ချင်ကြဘူးလို့ ယူဆရပါတယ်။ ခပ်ကြမ်းကြမ်း မကစားကြပေမယ့်လည်း ပွဲရသကိုတော့ အပြည့်အ၀ ခံစားလို့ရအောင် ကစားသွားခဲ့ကြပါတယ်။ ဒိုင်လူကြီးကလည်း အေးအေးဆေးဆေးပဲ ထိန်းသိမ်းသွားခဲ့ပြီး အ၀ါကတ်ပြသခဲ့ခြင်းတောင် မရှိခဲ့တာကို တွေ့ရပါတယ်။ ဘာပဲဖြစ်ဖြစ် ချဲလ်ဆီးနဲ့ မန်ယူအသင်းတို့ရဲ့ ကွန်မြူနတီဒိုင်းလုပွဲဟာ ၀င်ဘလေကွင်းထဲက ပရိသတ် ရှစ်သောင်းကျော်တင်မဟုတ်ဘဲ တစ်ကမ္ဘာလုံးက ဘောလုံးပွဲကြည့်ပရိသတ်တွေကို ကျေနပ်စေခဲ့တဲ့ ပွဲစဉ်တစ်ခုအဖြစ် အသိအမှတ် ပြုရပါတယ်။
နှစ်သင်းစလုံးရဲ့ ပရိသတ်တွေဟာ သူတို့အားပေးတဲ့ အသင်းတွေရဲ့ ကစားပုံတွေကို မြင်တွေ့ခဲ့ကြရပြီးပြီမို့ ရာသီသစ်မှာ ဘယ်လိုအခြေအနေ ရှိနိုင်မလဲဆိုတာကို ခန့်မှန်းမိနေလောက်ကြပါပြီ။ အခြားအသင်းတွေက ငွေဒရဟောသုံးပြီး ကစားသမားသစ်တွေ ၀ယ်ယူဖြည့်တင်းနေကြပေမယ့် ကိုယ့်အသင်းတွေက ငြိမ်သက်နေကြလို့ အားမလိုအားမရ ဖြစ်ခဲ့ကြရတာတွေလည်း ရပ်တန့်သွားလောက်ပါပြီ။ မန်ယူအသင်းဟာ ယခင်နှစ်ကထက် ပိုကောင်းလာတယ်လို့တောင် ခန့်မှန်းရပါတယ်။ ရွန်းနီတစ်ယောက်တည်း အားပြုကစားတဲ့ ပုံစံကို ဖာဂူဆန်တစ်ယောက် ပြောင်းလဲပစ်လိုက်နိုင်ပြီလို့ ယူဆရပါတယ်။ အဲဒီအချက်ကို သက်သေပြချင်တဲ့အတွက် ဒုတိယပိုင်းမှာ ရွန်းနီကိုထုတ်ပြီး ဘာဘာတော့ဗ်နဲ့ ဟာနန်ဒက်ဇ်ကို တွဲပေးလိုက်သလားလို့တောင် တွေးမိရပါတယ်။ အံ့သြစရာကောင်းတာက ပေါစခိုးလ်နဲ့ ဗန်ဒါဆားတို့ဟာ အသက်ကြီးသွားကြပေမယ့် မပျက်စီးကြသေးတာပါပဲ။ ချဲလ်ဆီးအသင်းက စတားရစ်ခ်ျဟာ ဒီနှစ်ပြိုင်ပွဲတွေမှာ စောင့်ကြည့်ရမယ့် လူငယ်ကစားသမား ဖြစ်လာမယ်ထင်ပါရဲ့။ ပီတာဆက်ခ်ျမရှိတဲ့ ဂိုးပေါက်အတွက် အဖြေတစ်ခုခုရအောင် အန်ဆယ်လော့တီ ဖြေရှင်းဖို့လိုနေတယ်ဆိုတာ သိပြီးဖြစ်နေမယ်လို့ ထင်မိတာပါပဲ။ မန်ယူအတွက်ကတော့ ညာနောက်ခံလူနေရာမှာ နဗီးလ်နဲ့ ရာဖေးလ် နှစ်ယောက်စလုံး ဒဏ်ရာကင်းကင်းနဲ့ ရှိနေမှသာလျှင် စိတ်ချရမယ် ထင်ပါရဲ့ဗျာ။
ကိုဉာဏ် (ပန်းလောင်မြေ)
၂၀၁၀ ပြည့်နှစ်၊ သြဂုတ်လ ၉ ရက်၊ တနင်္လာနေ့။
နေ့လည် ၁၂ နာရီ ၅၀ မိနစ်တွင်ပြီး၏။
No comments:
Post a Comment