ကားလ်မာ့ခ် Karl Marx (1818-1883) ၏ အဆိုအမိန့်တစ်ခု

သူ၏ အပြောင်မြောက်ဆုံးသော အဆိုအမိန့်မှာ အောက်ပါအတိုင်း ဖြစ်သည်။

From each according to his abilities, to each according to his needs.

သူ၏ အဆိုအမိန့်များကို မူရင်း အင်္ဂလိပ်ဘာသာအတိုင်း တင်ပြရသည့် အကြောင်းရှိပါသည်။ ဤ၀ါကျကို ဖတ်ကြည့်လျှင် အင်္ဂလိပ်ဘာသာ ၀ါကျတစ်ခုအနေဖြင့် ထူးခြားချက်တစ်ခု ရှိပါသည်။ ဤထူးခြားချက်ကား verb မပါခြင်း ဖြစ်သည်။ ထိုဝါကျကို တစ်လုံးချင်း မြန်မာလို ဘာသာပြန်လျှင် "တစ်ဦးချင်းထံမှ သူ၏ အရည်အချင်းများအလိုက်" ဟူ၍ ဖြစ်သည်။ တွေးကြည့်လေ အဓိပ္ပါယ်တွေ ပေါ်လာလေ ဖြစ်ပါသည်။ verb မပါသည့်အတွက် ထိုနေရာတွင် ကိုယ် စိတ်ကူးရှိရာများကို အစားထိုး၍ အတွေးနယ်ချဲ့နိုင်ပါသည်။

စာရေးသူ ဉာဏ်မီသလောက် အနည်းငယ် တွေးပြရလျှင် from each = တစ်ဦးချင်းထံမှ၊ တစ်နည်းဆိုသော် လူတစ်ဦးချင်းထံမှ၊ ရယူရမည်မှာ (ထို verb သည် သူ၏ အဆိုထဲတွင် မပါဝင်ပါ။ စာဖတ်သူအနေဖြင့် ဖြည့်စွက်၍ အဓိပ္ပါယ်ဖွင့်ခြင်း ဖြစ်သည်။) according to his abilities = သူ၏ အရည်အချင်းများအလိုက် ဖြစ်။ (ထို verb ကိုလည်း စာဖတ်သူအနေဖြင့် ဖြည့်စွက်၍ နားလည်ရခြင်း ဖြစ်သည်။) to each = တစ်ဦးချင်းသို့၊ လူတစ်ဦးချင်းသို့ ပေးရမည်မှာ (ထို verb သည်လည်း ၀ါကျထဲတွင် မပါရှိပါ။ စာဖတ်သူအနေနှင့် ဖြည့်စွက်၍ အဓိပ္ပါယ်ဖော်ရခြင်း ဖြစ်ပါသည်။) according to his needs = သူ၏ လိုအပ်ချက်အလိုက် ဖြစ်သည်။

ယင်းအဆိုကို အမျိုးမျိုးတိုးချဲ့၍ အဓိပ္ပါယ်ဖွင့်ဆိုနိုင်သည်။ ဥပမာ - လူတစ်ဦးချင်းထံမှ သူ၏ အရည်အချင်းအလိုက် ရယူရမည်ဟူရာ၌၊ စပါးစိုက်တတ်သူကို စပါး စိုက်ခိုင်းရမည်၊ စက်ပြင်တတ်သူကို စက်ပြင်ခိုင်းရမည်။ စာရေးတတ်သူကို စာရေးခိုင်းရမည်။ ဤသည်ကား လူတိုင်းကို သူ့အရည်အချင်းအလိုက် နိုင်ငံအကျိုးရှိအောင် လုပ်ခိုင်းခြင်းဖြစ်၏။ လူတစ်ဦးသို့ ပေးရမည်မှာ သူ၏ လိုအပ်ချက်အလိုက် ယူရာတွင်လည်း စိုက်ပျိုးသူကို စိုက်ပျိုးရေးပစ္စည်း၊ နည်းပညာများ၊ ဆေးဝါးကုသူကို ဆေးနှင့် ဆေးပစ္စည်းများ ပေးရမည် စသည်ဖြင့် နားလည်နိုင်သည်။

ကားလ်မာ့ခ်၏ အဆိုသည် စာဖတ်သူ ဉာဏ်ကွန့်လျှင် ကွန့်သလောက် တိုးချဲ့၍ နားလည်နိုင်သည်။ ထို့ကြောင့် စာရေးသူအနေဖြင့် ကားလ်မာ့ခ်၏ ကွန်မြူနစ်နှင့် ဆိုရှယ်လစ်ဝါဒတို့ကို လုံးဝမကြိုက်သော်လည်း သူ့ကို ဤအဆိုအမိန့် တစ်ခုကြောင့် ပုဂ္ဂိုလ်ရေးအရ အလွန်လေးစားမိသည်။

[ပြည်သူ့ခေတ်ဂျာနယ်၊ အတွဲ-၁၊ အမှတ်-၁၀၊ စာမျက်နှာ-၂၂ တွင် ဖော်ပြပါရှိသည့် ဒေါက်တာခင်မောင်ဝင်း (သင်္ချာ) ၏ နိုင်ငံရေးပညာရှင်များနှင့် ၀ါဒအနှစ်ချုပ် မှ ပြန်လည်ထုတ်နုတ်ကူးယူဖော်ပြပါသည်။]