မှာပါရစေ ပြောပါရစေ - မိုးဟိန်း (သားဂျာနယ်ကျော်)

(၁)
ကိုယ်သေရင် မငိုနဲ့၊
ပါးစိုရုံရှိမှာပေါ့။
သပိတ်မသွတ်နဲ့
လွတ်ပြီးသား၊ ကျွတ်ပြီးသား။
ထမင်းမထုပ်နဲ့
သိုးစာ၊ ပုပ်စာ၊ ဖြုန်းတီးစာ။
အိုးမခွဲနဲ့၊ အိုးမလို
ဘာကိုမှ ကိုယ်မစွဲဘူး။
အပွင့်အခက် ယူမသွားနဲ့
ပြန်လိုက်ရမယ့် အစားမဟုတ်ဘူး။
ရက်လည်၊ လလည်၊ နှစ်လည်
ဘာကိုမှ မလည်နဲ့၊
သံသရာကြီးမှာ လည်ခဲ့သူ။

(၂)
ကိုယ်သေရင် မငိုနဲ့၊
ကြိုကြိုပြီး သေထားသူ။
"ဘုရားရှင်ရဲ့ဂုဏ်တော်" ကို
မြတ်နိုးပူဇော်ရင်း
အကြိမ်ကြိမ် အသေရင်းထားသမို့
မရဏမင်းဆီ ပျော်ပျော်သွားမှာ။
ပြီးတော့ ပြောပါရစေ
သာသနာ၊ စာပေ၊ ပရဟိတ
လုပ်လက်စတွေကို ဆက်လုပ်ဖို့၊
ဟောဒီ ချစ်ရတဲ့ မိခင်မြေကို
ပြန်လာခဲ့မယ် မုချ။
ဒီတော့ ကိုယ်သေရင် မငိုနဲ့၊
ဖြေသာစမ်းပါ၊ ပြုံးစမ်းပါ
လူသာဆုံးတာ ကျန်တာမရှုံးဘူး။
မှာခဲ့ပြီ၊ ပြောခဲ့ပြီနော်၊ ဒါပါပဲ။

[၁၃၇၂ ခုနှစ်၊ ၀ါဆိုလပြည့် (ဓမ္မစကြာနေ့)]

* * * * * * * * *

မိုးဟိန်း (သားဂျာနယ်ကျော်) သည် ဂျာနယ်ကျော် ဦးချစ်မောင် နှင့် ဂျာနယ်ကျော် မမလေး တို့၏ အငယ်ဆုံးသား ဖြစ်ပါသည်။ ကဗျာများ၊ စာများ အများအပြား ရေးသားခဲ့ပြီး ပရိဟိတလုပ်ငန်းများကို အားသွန်ခွန်စိုက် ဆောင်ရွက်ခဲ့သူဟု သိရပါသည်။ ဆရာကြီးနန္ဒာသိန်းဇံ၏ စာအုပ်တစ်အုပ် (ခယောင်းလမ်းကို ဖြတ်ကျော်ခြင်း) ကို အင်္ဂလိပ်ဘာသာသို့ ပြန်ဆိုရေးသားခဲ့သည်ဟု သိရပါသည်။ အင်္ဂလိပ်ဘာသာဖြင့် ရေးသားခဲ့သော ကဗျာများအတွက် အမေရိကန်နှင့် အာစီယံမှ ချီးမြှင့်သော ဆုများလည်း ရရှိခဲ့သည်ဟု သိရပါသည်။ ဦးမိုးဟိန်း (သားဂျာနယ်ကျော်) သည် လည်ချောင်းကင်ဆာ ရောဂါဖြင့် ၂၀၁၀ ပြည့်နှစ်၊ စက်တင်ဘာလ ၂၃ ရက်နေ့တွင် ကွယ်လွန်သွားခဲ့ပြီဖြစ်ပါသည်။