ချစ်သမီးထံသို့
ချစ်သမီးအတွက် အနည်းငယ် ရေးရဦးမည်။ သမီးသည် ငယ်စဉ်မှစ၍ သူတစ်ပါးအသက်ကို မသတ်ဘဲ အမြဲရှောင်ကြဉ်လာခဲ့သလို၊ မိမိ၏ အသက်ထက်ဆုံး မည်သည့်အခါမှ သူတစ်ပါးအသက်ကို မသတ်ပါဟူ၍ မြတ်စွာဘုရား ရှေ့တော်၌ နေ့စဉ်နေ့တိုင်း အဓိဋ္ဌာန်ပြုပါ။ မြင့်မြတ်သော သီလဖြစ်၏။ လူ့အသက်ကို သတ်ခြင်းမှလည်း ရှောင်ကြဉ်ရမည်။ တိရစ္ဆာန်တို့ အသက်ကို သတ်ခြင်းမှလည်း ရှောင်ကြဉ်ရမည်။ ဤတွင် တစ်ခု ပြောရဦးမည်။ တချို့လူတို့ အထင်မှား၊ အမြင်မှား ဖြစ်နေသည်မှာ ကြက်၊ ၀က်၊ ငှက်၊ ဘဲ စသော တိရစ္ဆာန်များကို မိမိတို့ စားသောက်ဖို့အတွက် သတ်လျှင် အပြစ်ရှိသည်။ ငရဲကြီးသည်။ ဘုန်းကြီးဆွမ်းကျွေးဖို့၊ အလှူလုပ်ဖို့ဆိုလျှင် ငရဲမကြီးဘူး၊ ငရဲကြီးလျှင်လည်း နည်းနည်းပါးပါးသာ ကြီးသည်။ အလှူဒါန ကောင်းမှုက အားကြီးလှသဖြင့် ထိုအနည်းငယ်မျှသော ငရဲသည် ပျောက်သွားတာပဲဟု အယူမှားပြီး သူတစ်ပါးအသက် သတ်ဖို့ ၀န်မလေးကြပေ။ ဤအယူဝါဒသည် မှား၏။ ဘာကိစ္စအတွက်ပင် ဖြစ်စေကာမူ မည်သည့်သတ္တ၀ါ၏ အသက်ကိုမျှ မသတ်ထိုက်၊ သတ်လျှင် ငရဲကြီးမည်။ အပြစ်ဖြစ်သည်။ ဤသို့ သူ့အသက် သတ်ခြင်းမှ ရှောင်ကြည်ပါ၏။ တစ်သက်လုံး ရှောင်ကြဉ်ပါသည် ဟူ၍ အဓိဋ္ဌာန်ပြုပြီးနောက် သူ့ဥစ္စာ ခိုးခြင်းမှ ရှောင်ကြဉ်ပါ၏။ တစ်သက်လုံး ရှောင်ကြဉ်ပါသည် စသည်ဖြင့် ငါးပါးသီလ အစဉ်အတိုင်း စိတ်တွင် စွဲစွဲမြဲမြဲထား၍ တစ်သက်လုံး မသေမချင်း လုံခြုံအောင် စောင့်ထိန်းပါ။
သမီးအတွက် ပစ္စည်းရှာခဲ့သည်
ငါ့သမီး ကြီးလာလျှင် ၀တ်ချင်သလို ၀တ်နိုင်ဖို့၊ စားချင်သလို စားနိုင်ဖို့၊ အိမ်ကောင်းကောင်း၊ မော်တော်ကား ကောင်းကောင်း၊ စိန်ရွှေ အ၀တ်အစား ကောင်းကောင်း ၀တ်နိုင်၊ စားနိုင်ဖို့၊ သူများအောက် မကျဖို့၊ ဟန်နှင့်ပန်နှင့် ခန့်ခန့်ညားညား တင့်တယ်စွာ နေထိုင်နိုင်အောင် သမီးအတွက် ရည်ရွယ်၍ ပိုက်ဆံစုလာခဲ့သည်။ မကုန်တန်တာ မကုန်ဖို့ သတိထားကာ ပစ္စည်းဥစ္စာ စုလာခဲ့သည်။
ယခု ငါ့သမီးအတွက် အတော်အတန် ပစ္စည်းပေးနိုင်သဖြင့် ၀မ်းသာပါ၏။
၅ ပါးသီလ အမွေ
ထိုသို့သော ပစ္စည်း ဥစ္စာများထက် အဆပေါင်း ရာထောင်သိန်းသန်းမက အဖိုးတန်သော အမွေကို ဒယ်ဒီပေးခဲ့မည်။ ထိုအမွေကား ငါ့သမီး မသေမချင်း ၅ ပါးသီလ လုံခြုံရန်ဖြစ်သည်။ ၅ ပါးသီလ လုံခြုံလျှင် မသေခင် လူ့ပြည်၌နေစဉ် မျက်နှာမငယ်ရဘဲ၊ သီလတန်ခိုးတော်နှင့် အသက်ရှည်မည်၊ လူချစ်လူခင် များမည်။ စိတ်ချမ်းသာ၊ ကိုယ်ချမ်းသာ အမြဲရှိမည်။ ဥစ္စာစီးပွား တိုးတက်မည်။ ၅ ပါးသီလကို နေ့စဉ် လုံခြုံစွာ စောင့်ထိန်းရမည့်အပြင် ၀ါတွင်း၊ ၀ါပ ရှစ်ပါး သိျုွ့ဟုတ် ဆယ်ပါးဥပုသ် စောင့်ပါ။ နေ့စဉ် မှန်မှန် ဘုရားရှိခိုးပါ။ လူနတ်ဗြဟ္မာ သတ္တ၀ါ အားလုံးကို နေ့စဉ် မေတ္တာပို့ပါ။ မကောင်းသော စိတ်တို့ကို ပယ်ဖျောက်၍ ကောင်းသောစိတ်တို့ကို မွေးမြူပါ။ အကုသိုလ် ဒုစရိုက်ဟူသမျှ ရှောင်ပါ။ ကုသိုလ် သုစရိုက် အမှုများကိုသာလျှင် အားထုတ်ပါ။
စိတ်ထက်သောအမျိုး
နောက်အရေးကြီးတာတစ်ခု သမီးအား ဒယ်ဒီ မှာခဲ့ဦးမည်။ ဒယ်ဒီတို့အမျိုးသည် အဖေမျိုး၊ အမေမျိုး နှစ်ဖက်သော အမျိုးတို့ စိတ်အလွန်ထက်ကြသည်။ စိတ်ကောင်း ရှိကြသည်။ သို့သော် သူတစ်ပါး စော်ကားလာလျှင် မခံချင်သော စိတ်ထားက အလွန်အားကြီးကြ၏။ စိတ်ပြင်းထန်၏။ သူများတကာက တစ်ချက်ရိုက်လျှင် ကိုယ်က အချက် ၂၀ ပြန်ရိုက်ချင်သည်။ သူတစ်ပါးက တစ်ချက်ထုလျှင် ကိုယ်က အချက် ၅၀ ပြန်ထုလိုက်ရမှ စိတ်ကျေနပ်သည်။ လက်စား ပြန်မချေရလျှင် တစ်သက်လုံး မမေ့နိုင်၊ မစားနိုင်၊ မနေနိုင်သလို ရှိကြသည်။ သူများကို သွား၍ မစော်ကားနှင့်။ သူများတကာက ကိုယ့်ကို စော်ကားလျှင် ပြန်ချရမည်ဟု အဆင့်ဆင့် အမွေပေးခဲ့သည့်အလား ဒယ်ဒီတို့တစ်မျိုးလုံး ဤသို့ချည်း ရှိကြသည်ကို တွေ့ရ၊ မြင်ရ၊ ကြားရသည်။ ငါ့သမီး ဤသို့ သဘောမရှိလေနှင့်။ မိမိကို စော်ကားမည်ထင်သူနှင့် အပေါင်းအဖော် မလုပ်နှင့်။ အကယ်၍ တစ်စုံတစ်ယောက်က ရန်မူလာလျှင် သည်းခံပါ။ သည်းခံခြင်းသည်ပင်လျှင် ကုသိုလ်ရေး ဖြစ်တော့၏။ သည်းခံသူသည်သာ အနိုင်ရ၏။ ငါတို့ မြတ်စွာဘုရား ကိုယ်တော်မြတ်ကြီး၏ အလိုတော်၊ တရားတော်နှင့် အညီဖြစ်၏။ လူသာဓု၊ နတ်သာဓု ခေါ်၏။ သတ္တ၀ါအားလုံးအား မေတ္တာထားသူ၊ မိမိရန်သူအပေါ် သည်းခံနိုင်သူကို နတ်များက စောင့်ရှောက်သည်။ နတ်များက မ,စ၏။ သူတော်ကောင်းတို့က ချီးမွမ်း၏။ သာဓုခေါ်ကြ၏။
သူယုတ်မာများနှင့် မပေါင်းသင်းနှင့်
မည်သူနှင့်မဆို စကားပြောရာတွင် သိမ်သိမ်မွေ့မွေ့ ယဉ်ယဉ်ကျေးကျေး၊ ပျော့ပျော့ပျောင်းပျောင်း၊ ဣနြေ္ဒရရ၊ တည်တည်ကြည်ကြည်၊ ချိုသာစွာ ပြောဆိုပါ။ လူကြီးလူကောင်းတို့၏ သမီး၊ ဆွေကောင်း မျိုးကောင်းတို့ ဆိုသည်မှာ ဤသို့ ပြောဆိုရမည်။ ဣနြေ္ဒနှင့် နေထိုင်ရမည်။ သူယုတ်မာများနှင့် အပေါင်းအသင်း မလုပ်ရ။ သူတော်ကောင်းတို့ကို ဆည်းကပ်ပါ။
သူယုတ်မာဆိုသော စကားကို သမီးနားလည်ထားဖို့ ရှင်းပြရဦးမည်။ သူယုတ်မာ ဆိုသည်မှာ လူဆင်းရဲတွေကို ဆိုလိုသည်မဟုတ်။ တချို့လူချမ်းသာ ဖြစ်သော်လည်း သူယုတ်မာ ဖြစ်နေတတ်၏။ အချို့ မည်မျှဆင်းရဲစေကာမူ၊ သူယုတ်မာမဟုတ်၊ သူတော်ကောင်း ဖြစ်၏။ သူယုတ်မာ ဆိုသောစကား၌ များစွာ ကျယ်ဝန်းသော အဓိပ္ပါယ်ရှိ၏။ သူယုတ်မာတို့သည် သစ္စာမရှိကြ၊ သီလမရှိကြ၊ ထို့ကြောင့် သမီးသည် သူယုတ်မာထဲ မပါအောင် သစ္စာရှိရမည်။ သီလရှိရမည်။ အကျင့်စာရိတ္တ ကောင်းရမည်။ သမီးသည် သီလရှိသူ မှန်လျှင်၊ သစ္စာရှိသူဖြစ်လျှင်၊ အကျင့်စာရိတ္တနှင့် ပြည့်စုံလျှင် သူတော်ကောင်းတစ်ယောက် ဖြစ်တော့၏။ သူတော်ကောင်းဆိုလျှင် သိကြားနတ်အပေါင်း ချစ်မြတ်နိုးကြ၏။ ရဟန်းရှင်လူ သူတော်ကောင်းအပေါင်းတို့၏ မေတ္တာကို ခံယူရ၏။ လူမိုက်တစ်သောင်း ကဲ့ရဲ့ငြားသော်လည်း လူလိမ္မာတစ်ယောက် ချီးမွမ်းလျှင် ပျောက်၏ ဆိုသောစကားကို သတိပြုပါ။ လောက၌ လူမိုက်တွေ၊ လူညံ့လူဖျင်းတွေ အလွန်များ၏။ သတိထားပါ။
နောက်အမွေတစ်ခု
အရေးအကြီးဆုံး၊ အဖိုးအတန်ဆုံ၊ နောက်အမွေတစ်ခု ပေးရဦးမည်။ ထိုအမွေကား အခြားမဟုတ်။ ဘုရား၊ တရား၊ သံဃာ ရတနာသုံးပါးကို အမြဲဆည်းကပ်ရမည်။ ဤခေတ်၊ ဤအခါကြီးကား ဘုရား၊ တရားကို သိသူ၊ သံဃာတော်များကို ကိုးကွယ်သူ၊ ရတနာသုံးပါးကို ကိုင်းရှိုင်းသူ အလွန် နည်းပါး၏။ အလွန်ရှား၏။ အထူးသဖြင့် ၀မ်းနည်းစရာ ကောင်းတော့၏။
လူ့ဘ၀ကို ရဖို့ အလွန်ခဲယဉ်း၏။ ဘုရားသာသနာနှင့် ကြုံကြိုက်ဖို့ရာ အလွန်ခဲယဉ်း၏။ ယခု သမီးတို့မှာ လူ့ဘ၀ကို ကံအားလျော်စွာ ရောက်လာ၏။ အလွန် အဘိုးတန်သည့် မြတ်စွာဘုရား သာသနာတော်ကြီးနှင့် ကြုံကြိုက်လျက်ရှိ၏။ မသေမီ နေရသမျှ အချိန်ကလေးအတွင်းမှာ ရတနာသုံးပါးကို နေ့ရောညဥ့်ပါ ဆည်းကပ်ကိုးကွယ်ပါ။ ၀ိပဿနာ တရားများ အားထုတ်ပါ။
မြတ်စွာဘုရား၏ ဗုဒ္ဓသာသနာတော်ကြီး၏၀န်ကို ထမ်းဆောင်လျက် ရှိကြကုန်သော ဆရာတော် သံဃာတော်များကို အမြဲကိုးကွယ် ဆည်းကပ်ပါ။ အလှူဒါန ပြုပါ။
လိမ္မာစွာ နေရစ်ပေတော့
မြန်မာပြည်၌ ဘုန်းတော်ကြီးတွေ များနိုင်သလောက် များအောင် ပဉ္စင်းခံ၊ ရှင်ပြုတို့ကို ငါ့သမီး တတ်နိုင်သလောက် လုပ်ပါ။ ရဟန်းဖြစ်ပြီးလျှင် ကိုယ်တော်အရှင်မြတ်များကို ဆွမ်းကျွေးခြင်း၊ သင်္ကန်းလှူခြင်း၊ ကျောင်းဆောက်ကိုးကွယ်ခြင်း၊ ပေးလှူခြင်းများ ပြုလုပ်ပါ။ သူတော်ကောင်းများသော နိုင်ငံအဖြစ်နှင့် မြန်မာပြည်သည် ကမ္ဘာတွင် ထင်ရှားပါစေ။ ဤသို့ဖြစ်ရန် ငါ့သမီးသည် တတ်နိုင်သမျှ ပါဝင်ကူညီပါ။ ဆောင်ရွက်ပါ။ ဘုရားသာသနာတော် အကျိုး၊ သတ္တ၀ါများ၏ အကျိုး၊ မိမိကိုယ်ကျိုးအတွက် ဖြစ်ပေမည်ဟူ၍ တစ်သက်လုံး မှတ်ထားပါ။ ဘုန်းတော်ကြီးများသည် ဗုဒ္ဓမြတ်စွာဘုရား၏ တပည့်များ၊ သားကောင်းရတနာများ ဖြစ်ပေသည်။ သမီးသည် ဆရာတော်၊ သံဃာတော် အရှင်မြတ်များကို အမြဲကိုးကွယ်ပါ။ ဆည်းကပ်ပါ။ လှူဒါန်းပါ။ ဒါန၊ သီလ၊ ဘာဝနာ၊ ကုသိုလ် ကောင်းမှုများကို အမြဲအားထုတ်ပါ။ ဤကား ငါ၏ ချစ်သမီးအား ပေးအပ်ခဲ့သော အမွေပင်တည်း။
မောင်စော
* * * * * * * * * * * * * * * * * *
၆-၅-၁၉၄၈ ရက်နေ့ထုတ် သံတော်ဆင့် သတင်းစာ၌ ပါရှိသည့် မူရင်းအတိုင်း ပြန်လည်တင်ဆက်ပေးထားကြောင်း ဆရာတက္ကသိုလ်စိန်တင်က ရေးသားထားပါသည်။
RELATED:
ဂဠုန်ဦးစောက ဇနီးထံ နောက်ဆုံးပေးစာ
Thank you for this post.
ReplyDelete