မှတ်တမ်းတင်ထားချင်သည့် ဟိုးလေးတကြော်များ

သိပြီး၊ ဖတ်ပြီး၊ မြင်ဖူး၊ တွေ့ဖူးသောသူ အများစုဖြစ်မည်ဟု ယုံကြည်ပါသည်။ ကျွန်တော့်မိတ်ဆွေများ အတွက်ဆိုသည်ထက် ကျွန်တော့်ဘလော့ဂ်တွင် မှတ်တမ်းတစ်ခုအနေဖြင့် သိမ်းဆည်းထားလိုသည့် ရည်ရွယ်ချက်က ပိုများပါကြောင်း ၀န်ခံလိုပါသည်။ အင်တာနက်ပေါ်မှာ ဟိုးလေးတကြော် ဖြစ်ခဲ့သမျှတွေထဲက ကျွန်တော်စိတ်ဝင်စားသည်များကို ပြန်လည်တင်ထားခြင်းသာ...။

(က)

လတ်တလော အင်တာနက်ပေါ်တွင် လူအများ လက်ဆင့်ကမ်း ဖြန့်ဝေပြောဆိုဝေဖန်မှု အများဆုံး အကြောင်းအရာတစ်ခုဟု ဆိုရပါမည်။ လိုရင်းကတော့ မြန်မာနိုင်ငံက ကမ္ဘာ့ဘဏ်သို့ ပေးဆပ်ရမည့် အကြွေးက ၁ ဘီလီယံနီးပါး ရှိသည်ဟုဆိုသည်။ အဆိုပါအကြွေးကို ကမ္ဘာ့ဘဏ်က လျှော်ပစ်လိုသော်လည်း မြန်မာနိုင်ငံမှ နိုင်ငံခြားဘဏ်များသို့ အပ်နှံထားတဲ့ ငွေစာရင်း ငါးခုဟာ စုစုပေါင်းတန်ဖိုး အမေရိကန်ဒေါ်လာ ၁၁ ဘီလီယံနီးပါး ရှိနေတဲ့အတွက် မြန်မာနိုင်ငံရဲ့ အကြွေးတွေကို လျှော်ပစ်ခြင်း မပြုလုပ်နိုင်ကြောင်း သိရှိရပါတယ်။ အခုအချိန်မှာ အားလုံးက စိတ်ဝင်တစား ဖြစ်နေတာကတော့ မြန်မာနိုင်ငံက အကောင့်ငါးခုဟာ ဘယ်သူတွေပိုင်ဆိုင်တဲ့ အကောင့်တွေလဲ ဆိုတာပါပဲ။ ဘယ်သူ့နာမည်နဲ့ လုပ်ထားတဲ့အကောင့်တွေလဲ၊ ဘယ်လိုရပေါက်ရလမ်း တွေကနေ အဲဒီငွေတွေ ရခဲ့သလဲဆိုတာ စိတ်ဝင်စားစရာပါ။ ဆက်လက်ကြားသိရမယ့် သတင်းတွေကို စောင့်မျှော်ဖတ်ရှု နားထောင်ရုံမှတစ်ပါး အခုတော့.....။

(ခ)

အထက်ကဓာတ်ပုံမှာ မြင်တွေ့ရသူကတော့ Lisa Sparks ဆိုတဲ့ အမျိုးသမီးပါပဲ။ ဘာဖြစ်လို့ သူ့ကို တကူးတက မှတ်တမ်းတင်ရသလဲဆိုတော့ အဲဒီအမျိုးသမီးဟာ ထူးထူးခြားခြား မည်သူမျှ စိတ်ကူးယဉ်ခြင်းငှာ မစွမ်းဆောင်နိုင်တဲ့ တစ်ရက်အတွင်းမှာ အမျိုးသားပေါင်း ၉၁၉ ဦးနဲ့ အတူအိပ်ခဲ့လို့ ဖြစ်ပါတယ်။ အဲဒီလို အိပ်စက်မှုဟာ စံချိန်မှတ်တမ်းသစ်တစ်ရပ် ဖြစ်ခဲ့တယ်လို့လည်း ဆိုပါတယ်။ ထူးခြားတာ၊ ဆန်းသစ်တာ၊ ဖောက်ထွက်တာတွေကို ကြိုဆိုပေမယ့် အခုလိုမျိုး လုပ်ရပ်တွေကိုတော့ ကျွန်တော်ကိုဉာဏ် လိုက်လို့မမီတဲ့၊ ဉာဏ်မမီတဲ့ အကြောင်းအရာတစ်ခုအဖြစ် စာရင်းသွင်းလိုက်ကြောင်းပါ။ ကျွန်တော်တို့ မြန်မာအမျိုးသမီးတွေမှာ အဲဒီလို စိတ်ကူးစိတ်သန်းတွေ မရှိတာနဲ့တင် ဂုဏ်ယူလှပါပြီ။ သူ့လိုလည်း စံချိန်တွေ မချိုးကြစေချင်ပါ။ :D

(ဂ)

နယ်မြို့တစ်ခုက ဆီးဂိမ်းလှုံ့ဆော်ရေးပိုစတာဟာ လှုံ့ဆော်ရာမရောက်ဘဲ လှုံ့ရှော်ရာ ရောက်သွားတဲ့ အတွက် ပြောဆိုဝေဖန်စရာ ဖြစ်နေရပြန်ပါတယ်။ မြန်မာနိုင်ငံက အလံအရောင်တွေကို ကိုယ်စားပြုပြီး ဒီဇိုင်းရေးဆွဲရာမှာ ပုံမှာမြင်ရတဲ့အတိုင်း အရောင်တွေ အထက်အောက် ပြောင်းပြန်ဖြစ်နေတာကို ဝေဖန်မှုတွေ ပြုလုပ်ခဲ့ကြခြင်း ဖြစ်ပါတယ်။ မှားတဲ့အခါလည်း မှားပေမပေါ့လို့ စိတ်ထဲမှာ မှတ်သားမိပါတယ်။

(ဃ)

ပုံထဲမှာမြင်ရတဲ့ ရှေ့ဆုံးက ခါးတောင်ကျိုက်နဲ့ ပုဂ္ဂိုလ်ဟာ အခြားမဟုတ်ပါ။ ပဲခူးတိုင်းဒေသကြီး ၀န်ကြီးချုပ် ဦးဉာဏ်ဝင်း ဖြစ်ပါတယ်။ ပဲခူးဒေသအတွင်း ရေကြီးမှုတွေ ဖြစ်ပေါ်တဲ့ဒေသတွေကို သွားရောက်စစ်ဆေး ကြည့်ရှုနေတဲ့ပုံ ဖြစ်ပါတယ်။ မှတ်တမ်းတင်ချင်တာက ဒီဓာတ်ပုံ မဟုတ်ပါဘူး။ ဒီဓာတ်ပုံက ကျွန်တော်ပြောချင်တဲ့ ဓာတ်ပုံထွက်ပေါ်ပြီး တစ်ရက်လောက်ကြာမှ ထွက်လာတဲ့ဓာတ်ပုံပါ။ သူ့အရင် ထွက်ခဲ့တဲ့ဓာတ်ပုံမှာ ၀န်ကြီးချုပ်ဟာ လှေသစ်ကြီးတစ်စင်းပေါ်မှာ ထိုင်နေပြီး ကျန်တဲ့လူတွေက ဘေးကနေ လမ်းလျှောက်နေတဲ့ပုံ ဖြစ်ပါတယ်။ အင်တာနက်ပေါ်မှာ ဘာပြောကောင်းလိုက်မလဲ။ ပြန်လည်ဝေမျှပြီး ဝေဖန်လိုက်ကြတာ ရစရာကို မရှိပါဘူး။ အချို့ဆိုရင် ထိုင်းဝန်ကြီးချုပ် ယင်လတ်ရှင်နာဝပ် ရေကြီးတဲ့ဒေသတွေကို လိုက်စစ်နေတဲ့ဓာတ်ပုံနဲ့ တွဲဖက်ဖော်ပြ ခဲ့ကြပါတယ်။ ရေကြီးတာကို လိုက်ကြည့်တဲ့ ၀န်ကြီးချုပ်က ရေစိုမှာကြောက်ပြီး လှေပေါ်ကနေ သွားတယ်ဆိုပြီး ဝေဖန်တဲ့စာတွေဟာ ဖတ်လို့တောင် မကုန်ပါဘူး။ အဲဒီလို ပက်ပက်စက်စက် ပြောဆိုရေးသား နေကြတုန်းမှာပဲ နောက်တစ်နေ့မှာ အပေါ်ကဓာတ်ပုံ ထွက်ပေါ်လာပြီး လူတွေ ဝေဖန်နေကြတဲ့ ဓာတ်ပုံဟာ ၀န်ကြီးချုပ် လှေစီးပြီး လိုက်စစ်တာမဟုတ်ဘဲ ရေကြီးတဲ့ဒေသတွေကို ထောက်ပံ့ပေးမယ့် လှေသစ်တွေကို စစ်ဆေးကြည့်ရှုတာ ဖြစ်တဲ့အကြောင်း ဖြေရှင်းချက်တွေ ထွက်ပေါ်လာပါတယ်။ ဘာပဲဖြစ်ဖြစ် အဲဒီဓာတ်ပုံ ပျံ့နှံ့ခဲ့တဲ့ နှစ်ရက်၊ သုံးရက်လောက် ဖေ့စ်ဘုတ် တစ်ခွင်လုံး ရေထဲမှာ ခါးတောင်းကျိုက်ပြီး လျှောက်သွားနေခဲ့ကြတာ အသေအချာပါပဲ။ ပွဲဆူစေခဲ့တဲ့ ဓာတ်ပုံကတော့ အောက်မှာ ဖော်ပြထားတဲ့ဓာတ်ပုံ ဖြစ်ကြောင်းပါခင်ဗျာ။

(င)

အင်တာနက်သုံးစွဲသူ မြန်မာတွေ အားလုံးနီးပါး သိပြီးသားမို့ အထူးအထွေ မိတ်ဆက်ပေးဖို့ လိုမယ်မထင်ပါဘူး။ ဓာတ်ပုံထဲမှာ မြင်ရတဲ့ အမျိုးသမီးငယ်က ခင်ဝင့်ပါ ဖြစ်ပါတယ်။ ဘီလာရုစ်နိုင်ငံမှာ ကျင်းပပြုလုပ်ခဲ့တဲ့ Miss Supranational 2013 ပြိုင်ပွဲမှာ ဆန်ကာတင်အဆင့် ၂၀ ဦးထဲကို ၀င်ရောက်နိုင်ခဲ့ပြီး အဆင့် ၁၃ ရရှိခဲ့တဲ့ မြန်မာ့ဂုဏ်ဆောင် အလှမယ်တစ်ဦးပါ။ ဒါ့အပြင် အွန်လိုင်းကတစ်ဆင့် ပိုက်ဆံပေးပြီး မဲပေးယှဉ်ပြိုင်ရတဲ့ Miss Internet ဆုကိုလည်း ရရှိခဲ့ပါတယ်။ အခြားဆုတွေအဖြစ် Most beautiful girl in the world, People choice award, Face of Miss Supranational 2013 တွေကိုလည်း ရရှိခဲ့တယ်လို့ သိရပါတယ်။ ခင်ဝင့်ပါကို မှတ်တမ်းတင်ချင်တာထက် အွန်လိုင်းက မြန်မာတွေရဲ့ သည်းသည်းလှုပ်မှုနဲ့ စည်းရုံးမှုကို မှတ်တမ်းတင်ချင်တာက ပိုပါတယ်။ ပိုက်ဆံပေးပြီးမှ မဲပေးလို့ရတဲ့စနစ်ကို မြန်မာအလှမယ် အနိုင်ရအောင် မဲပေးခဲ့ကြတဲ့ ရွှေမြန်မာတွေရဲ့ စိတ်ဓာတ်ကို ကျွန်တော်က တအံ့တသြနဲ့ မှတ်တမ်းတင်ပါတယ်။ နန်းခင်ဇေယျာနဲ့ ခင်ဝင့်ဝါဟာ မြန်မာ့အင်တာနက်သမိုင်းမှာ မပါအဖြစ် မှတ်တမ်းတင်ရမယ့် သမိုင်းဇာတ်ကောင်တွေပါ။

(စ)

ခင်ဝင့်ပါအကြောင်း ပြောပြီးတဲ့သကာလ တစ်ဆက်တည်းဆိုသလိုပဲ ကျွန်တော့်ရင်ထဲကို ဒိုင်းကနဲ လာဆောင့်ခဲ့တဲ့ ကာတွန်းတစ်ကွက်ကိုလည်း မှတ်တမ်းတင်လိုက်ပါတယ်။ ကြည့်မိဖတ်မိသူတိုင်း နားလည်နေတဲ့ အကြောင်းအရာတစ်ခုကို ကျွန်တော်က ဘာမျှ ဆရာလုပ်စရာမလိုဟု ယူဆပါသည်။ စာဖတ်သူတို့ကိုယ်တိုင် ခံစားကြပါကုန်။

(ဆ)

ဒီအတိုင်းကြည့်ရင်တော့ ဓာတ်ပုံက ဘာလဲဟလို့ မေးစရာရှိပါတယ်။ ဟုတ်ကဲ့... သူ့အကြောင်းနဲ့သူ အဆက်အစပ်နဲ့ဆိုတော့လည်း အဲဒီလို မဖြစ်ပါဘူးခင်ဗျ။ မျက်နှာလည်းမပါ၊ လူလည်းမမြင်ရတဲ့ ဓာတ်ပုံတစ်ခုကို ဘာဖြစ်လို့ မှတ်တမ်းတင်ရသလဲဆိုတော့ ဒီလိုပါခင်ဗျ။ အခုမြင်နေရတဲ့ ဓာတ်ပုံဟာ အမေရိကန် အထက်လွှတ်တော်အတွင်း ဆီးရီးယားအရေးနဲ့ပတ်သက်ပြီး ကြားနာစစ်ဆေးမှု ပြုလုပ်နေစဉ် လွှတ်တော်အမတ်တစ်ဦးဖြစ်တဲ့ ဂျွန်မက်ကိန်းက သူ့ရဲ့ iPhone နဲ့ ပိုကာဖဲ ကစားနေတဲ့ပုံ ဖြစ်ပါတယ်။ အခြားသူတွေရဲ့ အမြင်တွေ၊ ဝေဖန်မှုတွေ အမျိုးမျိုးရှိသလို စာဖတ်သူအနေနဲ့လည်း လွတ်လပ်စွာ သဘောကွဲလွဲ ဝေဖန်နိုင်ကြောင်းပါ။ မှတ်တမ်းတစ်ခုအနေနဲ့ ထည့်သွင်းသိမ်းဆည်းခြင်းပါ။

(ဇ)

ဆရာအော်ပီကျယ်ရဲ့ ကာတွန်းဟာ ရှင်းပြစရာမလိုလောက်အောင် ထိထိမိမိရှိတယ်၊ ပြောင်မြောက်တယ် ဆိုတာ သံသယမရှိပါဘူး။ မြင်တတ်ပါပေ့ ဆရာရယ်လို့ ပြောရမလား၊ တွေးတတ်ပါပေ့ ဆရာရယ်လို့ ချီးကျူးရမလား၊ ကွက်တိဒက်ထိပဲဗျာလို့ ကြုံးဝါးရမလား ကဲ... ကြိုက်တဲ့လူကို မျက်စိထဲမြင်ပြီး ကြိုက်သလိုသာ ခံစားကြပါကုန်။

(စ်)

Miley Cyrus ရဲ့ Wrecking Ball ဆိုတဲ့ MTV ဗီဒီယိုဖိုင်ကို စက်တင်ဘာလ ၉ ရက်နေ့က YouTube မှာ လွှင့်တင်ခဲ့ရာမှာ ဒီနေ့အထိ ၄ ရက်တာကာလအတွင်း အဲဒီဗီဒီယိုဖိုင်ကို ကြည့်ရှုသူပေါင်း ၅၆ သန်း ကျော်သွားပါပြီ။ အံ့သြစရာ အရေအတွက်ဖြစ်ပါတယ်။ တစ်ဆက်တည်း အံ့သြစရာကောင်းတာကတော့ အဲဒီဗီဒီယိုဖိုင်ကို သဘောကျနှစ်သက်ကြောင်း Like လုပ်သူ အရေအတွက်ဟာ ၅ သိန်းကျော်ရှိပြီး သဘောမကျကြောင်း Dislike လုပ်ထားသူ အရေအတွက်ဟာ ၂ သိန်း ၈ သောင်းကျော် ရှိနေတာပါပဲ။ အဲဒီဗီဒီယိုဖိုင်ရဲ့အောက်မှာ ရေးထားကြတဲ့ ကွန်းမန့်ပေါင်းက ၃ သိန်း ၇ သောင်းကျော် ရှိပါတယ်။ အချို့က ကြိုဆိုကြသလို၊ အချို့ကလည်း ဒီလိုမျိုး အရှက်မဲ့ရမလား၊ ဖော်မှချွတ်မှ နာမည်ကြီးတော့မှာလားဆိုပြီး ဝေဖန်အပြစ်တင်ကြတာတွေ ရှိကြပါတယ်။ ဘာပဲဖြစ်ဖြစ် ဒါဟာ ပွင့်လင်းပါတယ်ဆိုတဲ့ သူတို့နိုင်ငံမှာလည်း ယဉ်ကျေးမှုပေတံ၊ အရှက်ပေတံနဲ့ တိုင်းတာတဲ့လူတွေ ဒုနဲ့ဒေး ရှိနေတယ်ဆိုတာကို ပြသနေတာဖြစ်တယ်လို့ ယူဆပါတယ်။ ဘာပဲပြောပြော အခုလတ်တလောကတော့ Miley Cyrus တစ်ယောက် သူမှသူ သတင်းလူသား ဖြစ်နေတော့တာပါပဲ။

အမှတ်တရ

ကိုဉာဏ် (ပန်းလောင်မြေ)

၂၀၁၃ ခုနှစ်၊ စက်တင်ဘာလ ၁၂ ရက်၊ ကြာသပတေးနေ့။

မွန်းလွဲ ၁ နာရီ ၄၆ မိနစ်တွင်ပြီး၏။