ဆေးလိပ်သောက်ခြင်းသည် ......

ဆေးလိပ်သောက်တာ မကောင်းတဲ့အကြောင်း နည်းနည်းလေး ဆရာလုပ်လိုက်ပါဦးမယ်။ ဆေးလိပ်သောက်တာ မကောင်းဘူးဗျ။ အဲဒီလိုပြောရင် ခင်ဗျားကပြန်ပြီး ဘုတောဦးမယ်။ ကျုပ်သိသားပဲ။ အလကားလာပြီး ဆရာလုပ်နေတယ်လို့။ ကျွန်တော့်ပတ်ဝန်းကျင်မှာရှိတဲ့ ကျွန်တော့်သူငယ်ချင်းတွေကတော့ သိသိကြီးနဲ့ကို ဆေးလိပ်ကို မက်မက်မောမော သောက်နေကြလို့ ကျွန်တော့်မှာ ပြောစရာစကား ရှာလို့မရပါ။ ကိုယ်က ဆေးလိပ်သောက်တာဟာ ဘယ်လိုဆိုပြီး စမယ်ပဲကြံသေးတယ်။ သူတို့က ဆေးလိပ်ဆိုတာ ဘယ်လို၊ ဘာဓာတ်တွေပါတယ်၊ ဘာရောဂါတွေဖြစ်နိုင်တယ် စသည်ဖြင့် ကျွန်တော့်ကိုတောင် ပြန်ပြီးရှင်းပြကြပါသေးတယ်။ မသိလို့မှားတာထက် သိသိကြီးနဲ့မှားနေတာက နည်းနည်းများပိုပြီး ဆိုးဝါးသလားလို့ ကျွန်တော်တွေးမိပါတယ်။ မသိလို့ပဲ ဖြစ်ဖြစ်၊ သိသိနဲ့ပဲဖြစ်ဖြစ် မှားတာကတော့ မှားတာပါပဲ။ ဒါပေမယ့် အမှန်ကိုသိနေရဲ့သားနဲ့ ဆက်မှားနေတာကတော့ နားလည်ရခက်နေသလားလို့ပါ။

ဘာပဲဖြစ်ဖြစ် ကျွန်တော်ကတော့ ကြုံရင်ကြုံသလို ဆေးလိပ်သောက်နေတာ တွေ့တဲ့လူတိုင်းကို ဆေးလိပ်သောက်တာ မကောင်းတဲ့အကြောင်း၊ ပတ်ဝန်းကျင်ကလူတွေကို ထိခိုက်စေတဲ့အကြောင်း၊ တစ်ကမ္ဘာလုံးမှာ ဆေးလိပ်သောက်ခြင်းကို ဆန့်ကျင်နေကြပြီဖြစ်တဲ့အကြောင်း၊ တချို့နိုင်ငံတွေဆိုရင် ဆေးလိပ်သောက်တာကို လုံးဝကို ပိတ်ပင်လိုက်ပြီဖြစ်တဲ့အကြောင်း ကိုယ့်ထမင်းကိုယ်စားပြီး မေတ္တာတွေပို့သခံကာ ပြောဖြစ်နေပါသေးတယ်။ ဆေးလိပ်ထုတ်တဲ့လူတွေက ဘူးခွံတွေပေါ်မှာ ဆေးလိပ်သောက်ခြင်းသည် ကျန်းမာရေးကို ဆိုးရွားစွာထိခိုက်စေနိုင်ပါသည် လို့ ထင်ထင်ရှားရှားကြီး ရေးပေးထားတာကို သောက်တဲ့လူတွေက ဘာကြောင့် ပိုက်ဆံအကုန်ခံပြီး သောက်နေကြသလဲလို့ မေးကြည့်တော့ သောက်ချင်လို့ သောက်တာတဲ့။ ရှင်းသွားရော။ ဘာမှကို ပြောလို့မရတော့ဘူး။ ဆေးလိပ်သောက်ခြင်းကြောင့် ထွက်လာတဲ့ ကိုယ့်ရဲ့ဆေးလိပ်မီးခိုးငွေ့ဟာ ကိုယ့်ပတ်ဝန်းကျင်က မိသားစုဝင်တွေ၊ မိတ်ဆွေအပေါင်းအသင်းတွေ၊ အခြားလူတွေကို ရောဂါဖြစ်စေတဲ့အကြောင်း တတ်သလောက်မှတ်သလောက် ပြောပြတော့ မိတ်ဆွေတစ်ယောက်က ဟာသလေးတစ်ခုပြောပြတယ်။ ဆေးလိပ်သောက်တဲ့လူရဲ့ဘေးမှာရှိတဲ့ ဆေးလိပ်မသောက်သူတစ်ယောက်ဟာ ဆေးလိပ်မီးခိုးငွေ့ကြောင့် ရောဂါတစ်ဝက်ရနိုင်ကြောင်းပြောတော့ ဆေးလိပ်သောက်တဲ့လူက အဲဒီလို ဖြစ်မလားဗျ။ ကျွန်တော်က ဆေးလိပ်ဝယ်သောက်ရတယ်၊ မသောက်တဲ့လူက ဘေးကနေပြီး အလကားနေရင်း ရောဂါတစ်ဝက်ရတယ်ဆိုတော့ ဆေးလိပ်ဖိုးကို အဲဒီမသောက်တဲ့လူဆီက တစ်ဝက်ဖိုးတောင်းရမယ်တဲ့။ ကဲဘယ်လောက်များ မှတ်သားစရာ ကောင်းလိုက်ပါသလဲဗျာ။

နောက်ပြီးရှိသေးတယ်။ လူပြောများတဲ့ ဟာသလေးပါ။ ဘာတဲ့ ဆေးလိပ်မသောက်တဲ့ အိုင်းစတိုင်းထက် ဆေးလိပ်သောက်တဲ့ ၀င်စတန်ချာချီကြီးက အသက်ပိုရှည်တယ်ကွတဲ့။ ကျွန်တော်လည်း ဘယ်နေလိမ့်မလဲ။ ပြန်ပက်လိုက်တာပေါ့။ အေးဟုတ်တယ်၊ ၀င်စတန်ချာချီသာ ဆေးလိပ်မသောက်ခဲ့ရင် သူဟာ အသက်တစ်ရာကျော်လောက်အထိ နေရမယ့်လူကွ၊ အခုတော့ အသုံးမကျတဲ့ ဆေးလိပ်တွေသောက်တဲ့အတွက် အသက် (၉၁)နှစ်မှာ သေသွားရရှာတယ်။ အတော်ညံ့တဲ့လူပေါ့ကွာလို့။ ကိုယ်တော်တွေရဲ့ မျက်စောင်းတွေနဲ့ မကြားတကြားစကားလုံးတွေတော့ လက်ဆောင်ရလိုက်တာပေါ့ဗျာ။

ကဲ ထားလိုက်ပါတော့ဗျာ။ အာလူးဖုတ်လိုက်တာ အတော်တောင်များသွားတယ်။ အောက်မှာ ဆေးလိပ်မသောက်ဖို့အတွက် တားမြစ်ထားတဲ့ ကြော်ငြာလေးတွေပါ။ အများကြီးရှိတဲ့အထဲကမှ ထိရောက်ပြီး စိတ်ဝင်စားစရာကောင်းမယ်ထင်တဲ့ ကြော်ငြာပုံလေးတွေကို တင်ပေးလိုက်တာပါ။ စာဖတ်သူဟာ လက်ရှိသောက်နေတဲ့လူများဆိုရင် ဆေးလိပ်ဖြတ်ဖို့ အကြံပေးတိုက်တွန်းပါရစေ၊ ဆရာချစ်နိုင်(စိတ်ပညာ)စကားကို ငှားပြောရရင် ချစ်လို့ပြောတာမှတ်ပါပေါ့ဗျာ။ ဆေးလိပ်ကို စသောက်ဖို့ ကြိုးပမ်းစိတ်ကူးနေသူဆိုရင် အစမလုပ်ဖို့ တောင်းပန်အကြံပြုလိုပါတယ်။ ဆေးလိပ်မသောက်တတ်သူဆိုရင် ကိုယ့်ပတ်ဝန်းကျင်က ဆေးလိပ်သောက်နေတဲ့လူတွေကို ဆေးလိပ်ဖြတ်အောင် တိုက်တွန်း၊ အကြံပြု၊ ဆုံးမ၊ တားမြစ်ပေးဖို့ မေတ္တာရပ်ခံလိုပါတယ်။ ဆေးလိပ်သောက်ခြင်းဟာ သောက်သူမိမိကိုယ်တိုင်ကိုသာမကဘဲ ပတ်ဝန်းကျင်က မသောက်တဲ့လူတွေကိုလည်း ရောဂါဖြစ်စေပါတယ်။ အိမ်ထောင်သည်ဖြစ်လာရင်လည်း မိမိရဲ့ ဇနီးမယား၊ ခင်ပွန်း၊ သားသမီးတွေ ဆေးလိပ်ရဲ့ ဒုက္ခတွေကို ခံစားရစေနိုင်ပါတယ်။ ဘာပဲဖြစ်ဖြစ်ဗျာ ခင်ဗျားတို့ ကျွန်တော်တို့ အားလုံးနီးပါးလောက်ဟာ မိမိတို့ရဲ့ မျိုးဆက်အတွက်တော့ အိမ်ယာထူထောင်ကြဦးမှာ အသေအချာပါပဲ။ မိမိတို့ရဲ့ ရင်သွေးရတနာ သားသမီးလေးတွေအနေနဲ့ ငါတို့ ဖေဖေကြီး၊ ငါတို့မေမေကြီးဟာ ဆေးလိပ်မသောက်ဘူးကွဆိုပြီး ဂုဏ်ယူစွာပြောဆိုခွင့်လေးတော့ ရသင့်တယ်လို့ ထင်ပါတယ်။

ကျွန်တော်လည်း ဂုဏ်ယူတာပေါ့ဗျာ။ မြန်မာ့သွေးဘလော့ဂ်ကို လာဖတ်တဲ့ ငါ့မိတ်ဆွေတွေဟာ ဆေးလိပ်မသောက်တဲ့လူများတယ်ကွဆိုပြီးလေ။ တလောလေးက သင်သည် ဆေးလိပ်သောက်သူဖြစ်ပါသလားဆိုပြီး ကျွန်တော် Poll တစ်ခု လုပ်ထားခဲ့တယ်လေ။ No ဆိုပြီး vote လုပ်ထားတဲ့ မသောက်တဲ့လူတွေများတဲ့အတွက် တကယ်ကို ကျွန်တော်ဝမ်းသာဂုဏ်ယူရပါတယ်။

သြော် တစ်လက်စတည်း မှတ်မိနေတဲ့ သွားလေသူဆေးလိပ်ကြိုက် ကဗျာက၀ိကြီး ဆရာတင်မိုးရဲ့ ကဗျာလေးတစ်ပုဒ်ကို ရေးပေးလိုက်ပါတယ်။ ဆရာတင်မိုးဟာ အင်မတန်ဆေးလိပ်ကြိုက်သူဖြစ်ပါလျက်နဲ့ ဘာကြောင့်များ အဲဒီကဗျာကို ရေးခဲ့သလဲဆိုတာ စဉ်းစားကြည့်ရင် အင်မတန်စိတ်ဝင်စားစရာ ကောင်းပါတယ်။ ထားပါဗျာ။ အဲဒါတွေ ဆွေးနွေးဖို့ မဟုတ်ပါဘူး။ ကဗျာက ဒီလိုပါ -

ဆေးလိပ်သောက်တာ
မကျန်းမာ
ရွံလည်းရွံစရာ
ငွေကုန်သံပြာချောင်းတွေဆိုး
သောက်ဟဲ့ သေချင်းဆိုး။

ဆေးလိပ်မီးခိုးငွေ့ကင်းသော ပတ်ဝန်းကျင်ကို ၀ိုင်းဝန်းတည်ဆောက်ကြပါစို့ဟု ဆန္ဒပြုရင်း.........။
ကိုဉာဏ် (ပန်းလောင်မြေ)
၂၀၀၉ ခုနှစ် သြဂုတ်လ ၂၆ ရက်နေ့၊ ဗုဒ္ဓဟူးနေ့။
နံနက် ၀၀ နာရီ ၀၆ မိနစ်တွင် ပြီး၏။

အခုတော့ အောက်ကပုံလေးတွေကို ခံစားလိုက်ကြပါဦး။