ပြည်သူ့နီတိ ထွန်းကား ပြန့်ပွားရေး

ပြည်သူ့နီတိနှင့် စပ်လျဉ်း၍ စာနယ်ဇင်းအချို့တွင် စိတ်ဝင်တစား ဝေဖန်ပြောဆိုကြသည်ကို တွေ့လာရသည်။ ပြည်သူ့နီတိ (Civics) သည် တိုင်းကြီးပြည်ကြီးသားများအဖြစ် ကျင့်ကြံနေထိုင်ရေး လမ်းညွှန်ဖြစ်သည်။ ယဉ်ကျေး သိမ်မွေ့ လောက၀တ် (Etiquettes) နှင့် လူ့ကျင့်ဝတ် (Ethics) တို့သည် ပြည်သူ့နီတိ၏ အစိတ်အပိုင်းများသာလျှင် ဖြစ်သည်။

ယဉ်ကျေး သိမ်မွေ့ လောက၀တ် (Etiquettes) သည် လူမျိုးနှင့် ထုံးဓလေ့အလိုက် ကွဲပြားခြားနားမှု ရှိနိုင်သည်။ ဥပမာ အနောက်တိုင်း လူ့အဖွဲ့အစည်းတွင် အစား,စားနေစဉ် လေချဉ်တက်ခြင်းကို ရိုင်းသည်ဟု ယူဆသည်။ အရှေ့တိုင်းရှိ တရုတ်လူမျိုးတို့ကမူ လေချဉ်တက်ခြင်းသည် စားလို့ကောင်းလွန်း၍ ကျေနပ်ကြောင်း အိမ်ရှင်ကို အမူအရာဖြင့် ပြောပြခြင်းဟုဆိုကာ ရိုင်းသည်ဟု မဆိုချေ။

လူ့ကျင့်ဝတ် (Ethics) သည် လောက၀တ်ကဲ့သို့ တမင်လုပ်ယူရခြင်း မဟုတ်ချေ။ လူရယ်လို့ ဖြစ်လာလျှင် တိုင်းပြည်နှင့် လူမျိုးမရွေး ဆောက်တည် ခံယူ ကျင့်သုံးရမည့် ကျင့်ဝတ်ဖြစ်သည်။ အများပြည်သူ စီးနင်းလိုက်ပါသော ကား၊ ရထား၊ ရေယာဉ် စသည်တို့ပေါ်တွင် ကိုယ်ဝန်ဆောင် မိန်းမများ၊ သက်ကြီးရွယ်အိုများ၊ မသန်မစွမ်းသူများ၊ သားသည်မအေများအား နေရာဖယ်ပေးခြင်းသည် လူဖြူ လူညို လူဝါ လူမည်း လူမျိုးမရွေး လိုက်နာ ကျင့်သုံးကြသည့် လူ့ကျင့်ဝတ် ဖြစ်သည်။ ယင်းသို့သော လူ့ကျင့်ဝတ်အသီးသီးနှင့် ပြည်သူတို့ သိသင့်သိအပ် လိုက်နာအပ်သော တိုင်းရေးပြည်မှု၊ လူရေး လူမှုများကို ပြည်သူ့နီတိ (Civics) ဟု ခေါ်သည်။ ပြည်သူ့နီတိသည် ပို၍ ပြည့်စုံသော လူ့ကျင့်ဝတ် လမ်းညွှန် ဖြစ်သည်။

ကွယ်လွန်သူ စာရေးဆရာကြီး မောင်ထင်၏ ကိုယ်ရေးအတ္ထုပ္ပတ္တိ တစ်စိတ်တစ်ပိုင်းဖြစ်သော "မောင်ထင်၏ရုပ်ပုံလွှာ" စာအုပ် (ဇန်န၀ါရီ ၂၀၁၀) တွင် "ကျွန်ုပ်တို့၏ ပြည်သူ့နီတိ" ခေါင်းစဉ်ဖြင့် အခန်းတစ်ခန်း ထည့်သွင်း ရေးသားထားသည်ကို တွေ့ရသည်။ ဆရာမောင်ထင်၏ ရေးသားချက်အရ ဗြိတိသျှအုပ်ချုပ်ရေးခေတ် အစိုးရကျောင်းများတွင် ပြည်သူ့နီတိ (Civics) ဘာသာရပ်ကို သင်ကြားပို့ချခြင်း မရှိခဲ့ကြောင်း၊ အမျိုးသားကျောင်းစသော တိုင်းရင်းသားကျောင်းများ တည်ထောင်သောအခါ အမျိုးသားပညာရေးကောင်စီက ယင်းဘာသာရပ်ကို သတ္တမအဆင့်မှ ဧကဒသမ အဆင့်အထိ သင်ကြားစေရန် ပြဌာန်းကြောင်း ဖော်ပြထားသည်။

ပြည်သူ့နီတိဟူသော ပညာမှာ တိုင်းသူပြည်သား တစ်ဦးအနေဖြင့် တိုင်းသူပြည်သားကောင်းတစ်ယောက် ဖြစ်လာဖို့ရာ နိုင်ငံရေး၊ အုပ်ချုပ်ရေး၊ စီးပွားရေးစနစ် စသည်တို့၌ တတ်သိလိမ္မာအောင် အုတ်မြစ်ချပေးသော အဓိပ္ပါယ်ရှိသည်။ ဆရာမောင်ထင်တို့ ကျောင်းသားဘ၀ ၁၉၂၅ ခုနှစ် ၀န်းကျင်ခန့်တွင် ပြည်သူ့နီတိ သင်ကြားရေးကို ရှေးဦးပထမ မြေစမ်းခရမ်းပျိုးသဘောဖြင့်သာ ဆောင်ရွက်ခဲ့ကြရသည်။ ပြည်သူ့နီတိ ကျောင်းသုံးစာအုပ်ဟူ၍ပင် မရှိခဲ့ချေ။ ထိုနောက်တွင်မှ Civil Government For India Students ဟူသော စာအုပ်ကို ကျောင်းသုံး ပြည်သူ့နီတိစာအုပ်အဖြစ် ပြဌာန်းလိုက်သည်။ မြန်မာပြည်သည် အိန္ဒိယနိုင်ငံ၏ ပြည်နယ်တစ်ခုအဖြစ် သွတ်သွင်းခံထားရ၍ အိန္ဒိယကျောင်းသားများအတွက် စာအုပ်ကိုပင် ပြဌာန်းစာအုပ်အဖြစ် သင်ယူခဲ့ကြရခြင်း ဖြစ်သည်။

ဆရာမောင်ထင်က "ထိုကျောင်းသုံးစာအုပ်၏ ကျေးဇူးကြောင့် ကျွန်တော်တို့သည် အုပ်ချုပ်ရေးစနစ် အမျိုးမျိုးအကြောင်း၊ ဒေသန္တရ အုပ်ချုပ်ရေး အဖွဲ့အစည်းများအကြောင်း၊ အရင်းရှင်စနစ်၊ ဆိုရှယ်လစ်စနစ်၊ ကွန်မြူနစ်စနစ် စသော စနစ်နှင့် မူဝါဒများအကြောင်းကို အခြေခံအားဖြင့် နားလည်လာကြသည်။ ယင်းအချက်တို့ကို ဆင်ခြင်ကြည့်လျှင် အမျိုးသားပညာရေးစနစ်ကို အကောင်အထည်ဖော်ပေးသော တိုင်းရင်းသားခေါင်းဆောင်များသည် ကျွန်တော်တို့ လူငယ်များအား လူမျိုးတစ်မျိုးအနေဖြင့် တွေးခေါ်၊ ပြောဆို၊ လုပ်ကိုင်နိုင်ကြစေရန် လွတ်လပ်ရေး ကြိုးပမ်းမှုမျိုးစေ့ကို ပြုစုပျိုးထောင်ပေးခြင်း ဖြစ်သည်။ အနောက်တိုင်းများရှိ ကျောင်းများတွင် ထိုပြည်သူ့နီတိဘာသာရပ်ကို သီးသန့် ပို့ချပေးသည့် သာဓကများစွာ မရှိပါ။ သို့ရာတွင် ထိုနိုင်ငံများရှိ ကျောင်းများတွင် သမိုင်းနှင့် ပထ၀ီစသည့်တို့နှင့် ဇီဝဗေဒဘာသာရပ်တို့ကို သင်ကြားပေးသောအခါ ကြားညှပ်၍ ပြည်သူ့နီတိ သဘောတရားများကိုလည်း သင်ကြားပေးသော ဓလေ့ရှိပါသည်" ဟု ရှင်းလင်း ရေးသားထားသည်။

သို့ဖြစ်ရာ ပြည်သူ့နီတိသည် တိုင်းကြီးပြည်ကြီးသားများအဖြစ် မည်သို့ တွေးခေါ် ပြောဆို နေထိုင် ဆက်ဆံရမည်ကို သင်ကြားဆည်းပူးရသော ပညာဖြစ်၍ ကျွန်ုပ်တို့အနေဖြင့် ပြည်သူ့နီတိ ထွန်းကားရေးကို ကြိုဆိုလျက် ပြည်သူ့နီတိ ပြန့်ပွားရေးကို ထပ်ဆင့်နှိုးဆော်လိုက်ရပေကြောင်း။

[၂၀၁၀ မေလ ထုတ် အတွေးအမြင် အမှတ် (၂၁၈)၊ စာမျက်နှာ ၅၊ ၆ တွင် ဖော်ပြပါရှိသည့် "ခေါင်းကြီး" ကို ပြန်လည်ကူးယူဖော်ပြပါသည်]