စွမ်းအား
အများလူတို့ သည်းမခံနိုင်သောအရာကို သည်းခံနိုင်မှ အကြီးအကဲ ပီသသည်။
သည်းခံခြင်းဟူသော စွမ်းအားကို ကျော်လွန်နိုင်သည့် စွမ်းအားမရှိတော့ချေ။
ရေနှင့်မီး
ရေချမ်းအိုးကဲ့သို့ကျင့်လျှင်၊ အများချစ်ခင်မည်။
မီးကဲ့သို့ကျင့်လျှင် အများကြောက်ရွံ့လေးစားခံရမည်၊ သို့သော် ချစ်ခင်နှစ်သက်ခြင်းကို မခံရရာ။
ဘေးကိုကြိုတင်ရှောင်ပါ
ကြံဖန်ကြောက်တတ်သူဟု ထင်ချင်လျှင်ထင်ပါစေ၊
စိုးရိမ်သင့်သောအရာ၊ စိုးရိမ်သင့်သောအခါများတွင်
စိုးရိမ်မကင်းသောစိတ်ဖြင့် ရှောင်သင့်သည်ကိုရှောင်ပါ၊ တင်ကြိုပြုသင့်သည်ကို ပြုပါ။
ချီးမြှောက်ခြင်း
လူကောင်းလူတော်ကို ဖော်ထုတ်၍ ချီးမြှောက်ခြင်းပြုရာ၏။
လူကောင်းလူတော်သည် မိမိအား ချီးမြှောက်သူအား အသက်ကိုပင်စွန့်၍ အကျိုးပြုတတ်သည်။
လူကောင်းလူတော်
သူတော်သဖြင့် သူ့အပေါ်မှာ
ကောင်းသည်ကိုတွေ့ကာမျှနှင့် သူတော်ကောင်းဟု မထင်မှတ်ရာ။
အများအပေါ်၌ ကောင်းမှသာ သူတော်ကောင်းမည်ပေသည်။
အကျိုးနှင့်အကြောင်း
အကျိုးခံစားလိုလျှင် အကျိုးဖြစ်စေမည့် အကြောင်းကိုပြုရာ၏။
အကျိုးခံစားရမည့် အကြောင်းကိုမပြုဘဲ အကျိုးခံစားရန် မဖြစ်နိုင်။
အကြီးအကဲ
အကြီးအကဲမရှိလျှင် ပျက်စီးတတ်သည်။
အကြီးအကဲ များလွန်းလျှင်လည်း ပျက်စီးတတ်သည်။
မိန်းမကြီးစိုးလျှင်လည်း ပျက်စီးတတ်သည်။
လူငယ်ကြီးစိုးလျှင်လည်း ပျက်စီးတတ်သည်။
သတိနှင့် ၀ီရိယ
ပညာရှိတို့ကား၊ စိုးရိမ်သင့်သည်ကို အရာအားလျော်စွာ အခါအားလျော်စွာ၊ သတိဝီရိယကို လက်ကိုင်ပြုသဖြင့် ဘေးရန်ဥပဒ်ကင်းကွာလျက် အကျိုးဖြစ်ထွန်းလေသည်။
သူမိုက်တို့ကား၊ စိုးရိမ်မရှိ ပေါ့တန်ဘိသဖြင့် အန္တရာယ်ရောက်လျက် အကျိုးပျက်ရလေသည်။
မိတ်ဆွေပီသမှု
မိတ်ဆွေမပီသသော၊ စိတ်ပြောင်းလွယ်သော၊ သဘောထားမမှန်သောသူအဖြစ်နှင့် အသက်တစ်ရာနေရသော်လည်း၊ ဂုဏ်သတင်းမတည် အသက်တိုသည်ဆိုရာ၏။ မိတ်ဆွေပီသစွာ အကျိုးဆောင်လျက် သဘောထား တည်မြဲမှန်ကန်သူအဖြစ် တစ်ရက်တစ်လမျှ နေရစေကာမူ၊ အသက်တစ်ရာ နေရသူထက် သူ၏ဂုဏ်သတင်းမှာ သားစဉ်မြေးဆက် အရှည်တည်သည်။
ရိုးဖြောင့်ခြင်း
မဖြောင့်မတ်သော စီးပွားရှာခြင်းဖြင့် ချမ်းသာကြွယ်ဝသူထက် ရိုးဖြောင့်စွာ စီးပွားရှာလျက် ဆင်းရဲစွာနေရသူက မြင့်မြတ်သည်။ မရိုးမဖြောင့် စီးပွားရှာလျက် ကြွယ်ဝသူကား၊ မကောင်းသတင်းဖြင့် ကမ္ဘာကျေသော်လည်း ဥဒါန်းမကျေ ဖြစ်ရာ၏။
လူကဲခတ်နည်း
စကားပြောသံကို ကြားရသဖြင့် လိမ္မာသည်၊ မလိမ္မာသည်၊ ကောက်ကျစ်သည်၊ ဖြောင့်မတ်သည်ကို သိရာ၏။
အနေအထိုင်ကိုမြင်သဖြင့် ပေါ့တန်သည်၊ အမူအကျင့်ညံ့သည်၊ လောဘကြီးသည်ကို သိရာ၏။
ရိုသေခြင်း
ကြောက်၍ ရိုသေခြင်းကို မလိုမရှိရာ၊
ချစ်၍ရိုသေခြင်းကို အလိုရှိရာ၏။
သူတော်ကောင်းတို့သဘော
သူတော်ကောင်းကား ကုန်းစကားကို ယုံခဲ၏။
အပြစ်ရှိသော်လည်း သည်းခံနိုင်၏။
ဒေါသဖြစ်ဖွယ်တွေ့သော်လည်း ချစ်ခင်မြဲ။
အနီးကပ်မပေါင်းအပ်သူ
- ကောင်းရာကောင်းကြောင်း တိုင်ပင်သည်ကို ဖျက်ဆီးတတ်၏။
- မဆင်ခြင်မစဉ်းစားဘဲ ပြောဆိုတတ်၏။
- နှုတ်မစောင့်တတ်။
- စဉ်းလဲကောက်ကျစ် လျှို့ဝှက်တတ်၏။
- အပြောအဆို ကြမ်းတမ်း၏။
- ဒေါသကြီး၏။
မိုက်လွန်းသူနှင့် အလိမ္မာပိုသူ
မိုက်လွန်းလျှင်လည်း အရာမရောက် ပျက်တတ်သည်။
လိမ္မာလွန်းလျှင်လည်း အရာရောက်လွန်း၍ ပျက်တတ်သည်။
နှိုင်းနှိုင်းချိန်ချိန် ပြုတတ်မှသာ အကျိုးဖြစ်ထွန်းမည်။
ချီးမွမ်းခြင်း
ချီးမွမ်းတတ်မှ ပညာရှိပီသသည်။
ဆရာကို ရှေ့တွင်ပင် ချီးမွမ်းရာ၏။
မိတ်ဆွေကို ကွယ်ရာမှာ ချီးမွမ်းရာ၏။
အမှုထမ်းကို လုပ်ကိုင်စဉ်မှာ ချီးမွမ်းရာ၏။
ဂုဏ်ဟူသည်
ကိုယ်ကို စောင့်ရှောက်သကဲ့သို့ ဂုဏ်သတင်းကို စောင့်ရှောက်ရာ၏။
ကိုယ်ကား အသက်မဲ့သော် မတည်နိုင်၊ ပျောက်ပျက်ရာ၏။
ဂုဏ်သတင်းကား ဥဒါန်းမကျေ ရှိရာ၏။
သေသောရှင်သောနေ့
သူယုတ်ကို အကျွမ်းဝင်သောနေ့သည် သေသောနေ့ မည်၏။
ပညာရှိသူတော်ကောင်းနှင့် ကျွမ်းဝင်ရသောနေ့သည် အသက်တစ်ဖန် ရှင်ပြန်သောနေ့မည်၏။
ဆိုခဲ၊ မြဲစေ
ဆိုလွယ်ပြုလွယ်ခြင်းကား မှားခဲ့သော် လုံးလုံးမှားရာ၏။
ဆိုခဲ ပြုခဲသော် မှားသော်လည်း လုံးလုံးမမှားပေ။
တွေးတော ဆင်ခြင်မှု
တွေးတောခြင်းသည် စိတ်ပျံ့လွင့်မှုတစ်မျိုးသာ ဖြစ်သည်။
ဆင်ခြင်မှုသည် တွေးတောခြင်းနှင့် တခြားစီဖြစ်၏။
တွေးတောရာတွင် ပညာမယှဉ်သည်က များသည်။
ဆင်ခြင်မှုမှာ ပညာပါသည်။
ဆင်ခြင်မှုသည် တွေးတောခြင်းကဲ့သို့ ရောက်တတ်ရာရာ အာရုံပြုရာနောက် မလိုက်ပါ။
တစ်ခုသောအရာကိုသာ အာရုံပြု၍ ခွဲခြမ်းစိတ်ဖြာ စိစစ်ခြင်းသည်ပင် ဆင်ခြင်မှုဖြစ်သည်။
အဆိပ်
မြွေအဆိပ်သည် အစွယ်မှာရှိသည်။
ကင်းမြီးကောက်အဆိပ်သည် အမြီးမှာရှိသည်။
မိန်းမယုတ်၏ အဆိပ်သည် နှုတ်ဖျားမှာ ရှိသည်။
လူယုတ်မာတို့၏ အဆိပ်ကား ကိုယ် နှုတ် နှလုံး သုံးပါးလုံးတွင် ရှိသည်။
သားကောင်းသမီးကောင်း
"အဘိုးရာဇာ၊ လူတို့တွင် မိကောင်း၊ ဖကောင်း သားသမီးကား ဖြစ်လွယ်၏"။
"သားကောင်း၊ သမီးကောင်းတို့၏ မိဘမူကား အလွန်ပင် ဖြစ်ခဲသည် မဟုတ်တုံလော" ဟု မင်းကြီးမင်းခေါင်မှ မေးတော်မူ၏။
(မြန်မာသက္ကရာဇ် ၇၁၀ - ၇၈၃)
No comments:
Post a Comment