ရှေ့နေကြီးများ၏ သတင်းစာကြေညာချက်များ ဂရုပြုဖွယ် - ဦးနေလ (တရားရုံးချုပ်ရှေ့နေ)

နေ့စဉ်သတင်းစာများတွင် ရှေ့နေကြီးများ၏ ကြေညာချက်များ တွေ့နေရသည်။ မမြင်ချင်မတွေ့ချင်၍ မရ။

အများပြည်သူတို့အလယ်တွင် ရှေ့နေကြီးများ၏ ကြေညာချက်များကို အာရုံစိုက်ဖတ်ရှုနေသူတို့ ရှိနေသည်။ ထိုသူတို့က ကြေညာချက်ကို အထူးစိတ်ဝင်စားသူများ ဖြစ်ကြသည်။ ထိုသူတို့၏ အသံကို နားထောင်သင့်သည်။

ရှေ့နေကြီးများ၏ ဘွဲ့ထူးဂုဏ်ထူးကိစ္စ
ဆန်းစစ်လေ့လာသူအချို့က ဆိုသည်။

ရှေ့နေကြီးများ၏ အဓိက ကြေညာချက်နှင့် ရှေ့နေကြီးများ၏ ဘွဲ့ထူးဂုဏ်ထူးတို့သည် သတင်းစာ၌ အညီအမျှ နေရာယူထားသည်။

ဘွဲ့ထူးဂုဏ်ထူး များပြားသောသူများပေတည်း။

ငွေကြေးစိုက်ထုတ်သူက ကြည်ဖြူပါရဲ့လား။

အများအမြင် ကဲ့ရဲ့ခြင်း ကင်းလွတ်ပါရဲ့လား။

မိမိ၏ ဘွဲ့ထူးဂုဏ်ထူးများထက် ရှေ့နေကြီးများ၏ နာမည်က ပို၍ အရေးမကြီးပေဘူးလား။

ရှေ့နေကြီးများ၏ နာမည်ကို မှန်ဘီလူးဖြင့် ရှာရပေမည်။

ရှေ့နေကြီး၏ ဘွဲ့ထူးဂုဏ်ထူးတွင် ဖော်ပြသောဘွဲ့ထက် အရန်ဒီပလိုမာများ၊ လက်မှတ်များက ပို၍ ရှည်လျားလွန်းလှသည်။

H.G.P., LL.B., LL.M.,
D.L.P (WIPO) (Graduate Intellectual Property)
Geneva, Switzerland.,
D.M.L., D.I.L., D.A.Psy., D.A.E.
Dip. in Globel English
M.A. II (Business Law)
Diploma in Business Law,
စီးပွားရေးနှင့် ဥပဒေအတိုင်ပင်ခံ
Advocate

များပြားသော ဘွဲ့ထူးဂုဏ်ထူးများကို မျက်စိလည်ရသည်။

မည်သည့်အတွက် ဥပဒေဘွဲ့၊ မဟာဥပဒေဘွဲ့များ ဖော်ပြပြီးနောက် သေးငယ်သော ဒီပလိုမာကို Diploma in Business Law ဟု အရှည်ဖော်ပြရတာလဲ။

အကြွားပိုသည်ကို ဂုဏ်ယူစရာဟု မှတ်ယူနေခြင်းပေလား။ အများအပြောလွတ်စေချင်သည်။ ဘွဲ့ထူးဂုဏ်ထူးများသည် ထိုသူတို့၏ အမည်ထက်ပို၍ အရေးပါသွားကြကုန်သည်။

အများအမြင်ရိုင်းသော ကြေညာချက်များ
ရှေ့နေတစ်ဦးက သတင်းစာတွင် ကြေညာသည်။ ကျန်ရှေ့နေတစ်ဦးက ပြန်လှန်ကန့်ကွက် ကြေညာသည်။ ရှေ့နေတို့သည် အမှုသည်တို့၏ ညွှန်ကြားချက်အရ ကြေညာခြင်း ဖြစ်သည်။

ဤသည်ကို ဘယ်နေ့သတင်းစာပါ ရှေ့နေကြီး ဘယ်သူနှင့် ဘယ်သူတို့၏ ကြေညာချက်သည် မမှန်မကန် ကြေညာခြင်းဖြစ်ကြောင်း ကန့်ကွက်နေကြသည့် ကြေညာခေါင်းစဉ်တို့ ပါရှိသည်။

မည်သည့်အတွက်ကြောင့် တစ်ဖက်ကြေညာသော ရှေ့နေ၏အမည်ကို ပြန်လည်ထည့်သွင်း ကန့်ကွက်ကြေညာရတာလဲ။

အပြန်အလှန်ကြေညာချက်များသည် ရန်တွေ့သည့်သဘောများ တွေ့ရသည်။ အချို့က ပြင်းထန်စွာ ဖြေရှင်းတုံ့ပြန်သည်ကို တွေ့ရသည်။ ငါ့စကားနွားရ ကြေညာနေကြသည်။

ဤသည်ကို အများပြည်သူတို့က ရင်သပ်ရှုမော ကြည့်ရှုနေကြသည်။ သူတို့တစ်တွေဟာဖြင့် တိုက်ပွဲပြင်းထန်နေကြပုံပဲ။

ထိုကြေညာချက်များကို စိတ်ဝင်စားခြင်းထက် စိတ်ရှုပ်စရာဟု မြင်ကြသည်။

ရှေ့နေကြီးများသည် အမှုကို ကြေညာခြင်းလား၊ မိမိကိုယ်မိမိ ကြေညာခြင်းလား ဆန်းစစ်ကြပါ။ အမှုသည်များ၏ ကြော်ငြာကုန်ကျစရိတ်ကိုလည်း ငဲ့ညှာသင့်ပေသည်။

သတင်းစာတွင် တစ်လက်မ ကော်လံကို ကျပ် (၇၅၀၀) ပေးသွင်းရသည်။ တချို့ဆိုလျှင် သတင်းစာကြေညာချက်ကို စာလုံးအသေးဖြင့် သုံးကော်လံမျက်နှာပြည့် ရေးသားနေကြသည်။

သာမန်မျက်လုံးကောင်းသူပင် ဖတ်ရှုရန် ခက်ခဲသည်။ ဖြစ်သင့်ရဲ့လား စဉ်းစားကြပါကုန်။

ရှေ့နေတို့၏ ကြေညာချက်၏ သဘောသဘာဝ
သတင်းစာ၌ ကြေညာခြင်းသည် အသံကောင်း ဟစ်ခြင်းမဟုတ်။

တစ်ဖက်ကို ပုတ်ခတ်စော်ကားရန်လည်း မဟုတ်။

အငြင်းပွားတိုင်းသည်လည်း သတင်းစာပေါ် မရောက်ရှိကြ။ လိုအပ်၍ မကြေညာလျှင်မဖြစ်၍ ကြေညာရခြင်းသာဖြစ်ကြောင်း သိစေအပ်ပါသည်။

အများအားဖြင့် "တရားစွဲဆိုခြင်း" မပြုမီ ဟန့်တားသင့်သည်ကို ဟန့်တားရန်သာ ဖြစ်သည်။

ပစ္စည်းနှင့်ပတ်သက်၍ အမှုဖြစ်ဖွယ်ရှိသည်ကို မလွှဲပြောင်းရန် ကြိုတင်ဟန့်တား ကြေညာလေ့ရှိသည်။

ဤတွင် စကားဦးသန်းခြင်း မပေါ်ပေါက်ရန် လိုအပ်သည်။

အချို့ကြော်ငြာများတွင် တရားစွဲပြီးနောက်တွင်မှ ပစ္စည်းကို မလွှဲပြောင်းရန် တားမြစ်လေ့ရှိသည်။ အန္တရာယ်များလှပေစွ။

အမှုအတောအတွင်း ပစ္စည်းလွှဲပြောင်းလျှင် တရားမ၀င်ကြောင်း ဥပဒေပြဋ္ဌာန်းချက် အခိုင်အမာရှိသည်။ လိုအပ်လျှင် "ယာယီတားဝရမ်း" လျှောက်ထား၍ ဟန့်တားနိုင်သည်။ ဤသည်ကို သတင်းစာမှ အသံကောင်းဟစ်ရန် မလိုအပ်။

အမှုတစ်ခုတွင် ရှမ်းပြည်နယ်တရားရုံး၌ "အပေးစာချုပ် ပျက်ပြယ်ကြောင်း မြွက်ဟကြော်ငြာပေးစေလိုမှု" တရားစွဲဆိုသည်။ အမှုအတောအတွင်း တရားစွဲသူက အချင်းဖြစ်ပစ္စည်းကို ရောင်းချခြင်း၊ ပေါင်နှံခြင်း၊ ပေးကမ်းခြင်း စသည်တို့ လွှဲပြောင်းခြင်းမပြုလုပ်ရန် "သတိပေးတားမြစ်ကြေညာချက်" ကို သတင်းစာမှ ကြေညာသည်။ ယင်းကြေညာချက်သည် အများပြည်သူတို့ အထင်အမြင် လွှဲမှားစေသည့်အတွက် တရားစီရင်ခြင်းကို အနှောင့်အယှက် ပြုရာရောက်သဖြင့် တရားရုံးများ မထေမဲ့မြင်မှု အက်ဥပဒေ ပုဒ်မ (၃)အရ အရေးယူရန် လျှောက်ထားခဲ့သည်။

ဗဟိုတရားရုံးစီရင်ရေးအဖွဲ့က အမှုဖြစ်ပစ္စည်းကို ရောင်းချခြင်း၊ ပေါင်နှံခြင်း၊ လွှဲပြောင်းခြင်း၊ ပေးကမ်းခြင်း၊ ခွဲဝေခြင်း၊ အာမခံတင်သွင်းခြင်း စသည်တို့ကို မပြုလုပ်ရန် သတိပေးတားမြစ်ကြောင်း ဖော်ပြထားခြင်းဖြင့် အချင်းဖြစ်ပစ္စည်းကို တစ်ဖက်အမှုသည်ပိုင် မဟုတ်ဟု "စကားဦးသန်းရာ ရောက်သည်"။

တရားဖြောင့်မှန်ရေးလမ်းစဉ်ကို နှောင့်ယှက်နိုင်သော အရေးအသားအားလုံးသည် တရားရုံးကို မထီမဲ့မြင် ပြုလုပ်ခြင်းများဖြစ်သည်ဟု အဆုံးအဖြတ် ပြုခဲ့ပြီးဖြစ်သည်။

ရှေ့နေရှေ့ရပ်တို့သည် "ဟိတ်ဟန်" များတတ်ကြသည်။ များကြပါ။ သို့ရာတွင် အများပြည်သူတို့အလယ်တွင် "ဟိတ်ဟန်" များသည် မျက်စိစပါးမွှေးစူးသလို မဖြစ်စေလိုပါ။

အများအမြင်တွင် ရှေ့နေကြီးတို့၏ ကြေညာချက်သည် ခံ့ညားရန်လိုသည်။ ကြေညာချက်ပါ အကြောင်းခြင်းအရာအပေါ် လို-တို-ရှင်း နားလည်စေရန်နှင့် ဥပဒေအမြင်ဖြင့် ထည့်သွင်းဖော်ပြရန် လိုအပ်ပေသည်။

ဘွဲ့မဟုတ်သော ဒီပလိုမာ၊ အောင်လက်မှတ်များအား အသားပေးဖော်ပြရန် မဟုတ်။

ထို့အတူ အမှုသည်အချင်းချင်း ရန်ဖြစ်နေတိုင်း ရှေ့နေကြီးများက ပါဝင်ရန်မဟုတ်ဆိုသည်ကို သတိချပ်သင့်ပေသည်။

ကျမ်းကိုး
၁၉၈၆ ခုနှစ်၊ မြန်မာနိုင်ငံစီရင်ထုံး၊ စာ-၁၃၃။

[လျှပ်တစ်ပြက်၊ အတွဲ-၂၊ အမှတ်-၉၇၊ ၂၀၁၀ ခုနှစ်၊ သြဂုတ် ၆၊ စာမျက်နှာ-၃၀]